تقرير | بعد وصفهم بالشحاتين .. نجوم الأندرجروند ل حلمي بكر: شكلك هتزعل جامد!

شرين جمال - أسماء الألفي - دعاء سعيد
في أحدث تصريحاته، وصف الموسيقار حلمي بكر، فناني الأندرجروند والفن المستقل بالشحاتين ، وان معندهمش فن ويجب أن تتصدي الشرطة للفرق الغير مسجلة بنقابة الموسيقيين، هذا التصريح أحدث ردود أفعال سلبية لدي نجوم الفن المستقل ورأوا فيه أهانة لهم.
ومن جانبه قال مادو، في تصريح خاص ل الفجر الفني : أحنا شحاتين لأننا بنصنع نفسنا بمجهودنا من غير مساعدة حد، مش مغنيين كباريهات شارع الهرم زي حبايبك، وميفرقش معانا رأيك خليه للبنات اللي في سن أحفادك اللي بترتبط بيهم .
وأكد سوني رحالة، انا رأيي ان دة راجل حقود .. بيحقد علي اي حد بيملك موهبة حقيقية وبيعرف يوصلها من غير ما يعاني زي ما هو وابناء جيله عانوا، واننا وقفنا سوقه وسوق اللي زيه في شغلهم عشان الناس ابتدت تتجه للأندرجراوند وتسمعهم .. ف مبقاش فيه سبوبة في الموضوع بالنسبة ليا زي الاول .. أنما لو بنشتغل معاه وبندفعله هنبقي زي ال فرخة بكشك بالنسبة ليه و مش هيقول عننا كدة .
بينما رد أحمد مصطفي، عضو مدينة باند من خلال صفحته الرسمية عبر موقع التواصل الاجتماعي فيس بوك .. قائلآ: ردا علي الأستاذ حلمي بكر.. شحاتين الغرب زي شحاتين مصر وشحاتين العالم ومش شتيمه ياريت نقدر نكون بنعبّر عن الشحاتين في كل مكان ونوصلهم، لو حضرتك كنت سافرت برّه بنظره مختلفه علي إنك تصنف الموسيقيين علي أساس طبقي... كنت اكتشفت كمية الفن إللي في الشارع إلي توازي ستوديوهات مصر كلّها... ومش لازم تسافر... أفتح الإنترنت واليوتيوب و إكتب وشوف الفن عامل إزاي. Street Musicians .
وأضاف نقابة الموسيقيين مش بالضروري تجمع ناس بتعرف موسيقي.. في ناس بتطلع الكارنيه ده عشان تشتغل في شارع الهرم... وإحنا ما عندناش مانع إللي عايز يعمل إيه يعمله....لكن عمر الفن كان بيتقيّم بكارنيه خاصة إن في وقت من الأوقات نقيب الموسيقيين كان مصطفي كامل ومن أعظم أعماله قشطه يابا ...قشطه، حضرتك فتحت علي نفسك فاتحة كبيرة جدآ.. وهتلاقي بكره بدل الأغنية 20 أغنية بتنتقد حضرتك في إللي هيقدر يمسك لسانه وينتقد بموضوعيه.. وفي إللي مش هيمسك لسانه وهيزعّل حضرتك جامد وغالبا حضرتك هتزعل جامد.. و قد أعذر من أنذر يا حلمي بكر باشا .
ووجه أحمد سليمان، مغني الراب رسالة ل بكر علي صفحته الرسمية عبر موقع التواصل الاجتماعي فيس بوك قائلآ: حلمي بكر، أحنا مش متسابقين في برنامجك الفاشل صوت الحياة ولا نسيت أنه كان أفشل برنامج أتعمل للمواهب، وحكمك علي الاندرجرواند أنه مجال شحاتين ..الشحاتين دول هما اللي بيمثلو بلدك دلوقتي ف بلاد تانيه زي رامي عصام، وغيرو والناس دي لو مكنش عندهم فن ولا كان ده هيحصل .
وتابع ومنعدمين الفن دول بردو هما اللي بقوا عاملين أشهر إعلانات التلفزيون فبلاش العنتظة الكدابه اللي انت فيها دي مش لوحدك أللي فنان ومش مجالك بس اللي ناجح، الاندرجرواند فن يحترم وواجب عليك أحترامه وأحترام فنانينه ومحدش فينا مستني رائيك فيه .. ولما تنتقض ابقي انتقض بشكل بناء يا فنان يا محترم مش سويقه هي .