ناشط سياحي يستنكر تعامل المسئولين مع زيارة "توم هانكس" للغردقة

قال هشام الدسوقي، صاحب إحدى شركات البالون الطائر بالأقصر، وناشط في محال السياحة، تعقيبًا على زيارة النجم العالمي "توم هانكس" للغردقة، إن القائمين على قطاع السياحة بمصر كانوا يعلمون أن هناك فيلمًا عالميًا يتم تصويره في الغردقة بطولة الفنان توم هانكس، أي أنه كان من المفترض أن يتم استغلال هذا الحدث لتنشيط السياحة بدون أي تكاليف، بدلا من إقامة الولائم والمؤتمرات، وصرف الأموال فيما لا يفيد.
وأكد الدسوقي، في تصريح خاص، أن الحكومة أخطأت عندما تم استقبال النجم العالمي من قبل قوات الشرطة فقط، وقيام شركة السياحة بتوفير سيارة خاصة له ولحراسته، لأن هذا يعني أننا بلد غير آمن، قائلًا: "تخيلوا كدة صورة توم هانكس في المطار وسط السياح ووسط المصريين من غير قوات أمن، وقمنا باستغلال تلك الصورة وسوقناها وبعتناها لكل المواقع العالمية، كان المردود الخارجي هيكون أيه؟، تخيلوا الأجنبي لما يشوف توم هانكس في مصر ومش محاط بكتيبة شرطة، هيقول مصر فعلًا بلد أمن وأمان، ده توم هانكس هناك وبيصور فيلم كمان".
واستنكر الدسوقي، عدم قيام مسئولين باستقبال النجم العالمي الذي يزور الغردقه لأول مرة، قائلًا: "فين رئيس مدينة الغردقة أو رئيس غرفة السياحة أو محافظ البحر الأحمر من استقبال توم هانكس، ليه محدش راح وعبره، ومحدش يقول لازم نعمل معاه كدة علشان نحميه، احنا بتيجي لينا فرص ننشط بيها السياحة الميتة من سنين ومش بنعرف، علشان مش فاضيين إلا لمحاربة إرهاب وغيره".
واختتم: "طالما هناك عقليات تفكر بمثل هذا الأسلوب وتتحكم في السياحة وبتتحكم في موارد البلد وبتعمل اللي هي عايزاه، السياحة مش هتقوم تاني، ولو قامت هتكون مجرد مسكنات، السياحة مش هترجع تاني إلا لو القرار كان في إيد العاملين في القطاع، سواء كانوا مرشدين سياحة أو تورليدرات، أو أي شغلانة في القطاع أيًا كانت، كفاية كدة حرام عليكم تعبتونا".
كان النجم العالمي توم هانكس، قد غادر مطار الغردقة الدولي، صباح أمس الإثنين، بعد الانتهاء من تصوير فيلمه الجديد A Hologram for the King في مدينة الغردقة، بعد أن كان قد وصل الجمعة الماضي، على متن طائرة خاصة، قادمًا من ألمانيا وسط إجراءات أمنية مشددة.