كتالوج التوفير للعربيات الملاكي

1 - متشغلش التكييف.
2 - نور في منازل الطريق.
3 - ممنوع تحرق على الغيار.
4 - بطل العربية وانت نازل تشترى حاجة حتى لو 20 ثانية.
5 - متشغلش التكييف.
6 - بطل العربية في الأشارات.
7 - متسافرش بالعربية بعد كده.
8 - لو معاك عربية اكتر من 1600 CC بيعها.
9 - لو معاك عربية اكتر من 1200 CC بيعها برضه.
10 - متشغلش التكييف.
11 - ممنوع تركب اكتر من اتنين معاك في العربية.
12 - ممنوع تفتح اكتر من شباك وانت سايق.
13 - لو السكة زحمة اركن على جنب لغاية ما تسلك.
14- خلى معاك حبل في العربية عشان حتحتاجة كتير.
15 - متشغلش التكييف.
16 - لو في اكتر من عربية في الاسرة انصحك بالاستغناء عن واحدة أن لم يكن كلهم.
17 - شغل التيربو والديفيل وفلتر هواء الرياضى ده تنزل تشيله وتولع فيه وقتى.
18 - حاول تسترزق في السكة خدلك واحد من الطريق وخد اللى فيه النصيب.
19 - الشد مع عربيات في السكة دى بقت اسمها فقرة الذكريات.
20 - ابوس ايدك متشغلش التكييف.
21 - اللى معاه جيب أو عربية دفع رباعى ده راجل يستحق الصدقة دلوقتى متنساهوش عشان ربنا يفتكرك.
22 - عصر الشهامة " وانزل اوصلك يا حاج انتهى " ياريت تراجع نفسك تانى قبل ما تتشاهم.
23 - لو ابوك قالك انزل وصل اختك أو انزل هاتلى حاجة اعمل نفسك ميت.
24 - القيادة فوق 100 كم/ساعة اسراف وتبذير ربنا حيحاسبك عليه.
25- متشغلش ام التكييف.
26 - اللى معاه عربية دلوقتى يستحق أي حسنة..عامله كانه فقير.
27 - المشوار اللى اكتر من 20 دقيقة قيادة متروحش بالعربية.
28 - لو ساكن بعيد عن شغلك يا تسيب شغلك يا تعزل اوفرلك صدقنى.
29 - أي حاجة بتزود في حرق البنزين صلحها من دلوقتى احسنلك.
30 - الغى التكييف من العربية احسن.
31 - اتعلم تسوق موتوسيكل أو عجلة حتحتاجهم قريب.
32 - لو عربيتك قديمة شوية استعمل بنزين 80
33 - ادعى ربنا في صلاتك أن السكة متكونش واقفة وانت بالعربية.
34 - حاول تصاحب سواق ميكروباص وانسى ستايلك دلوقتى.
35 - متشغلش التكييف عشان خاطر اولادك.
36 - الاحتياطي في التانك أهم من رصيد في البنك.
37 - تسخين العربية ميزدش عن 30 ثانية كحد أقصى.
38 - بدل ما تروح لواحد صاحبك بعلبة شيكولاتة خدلك جركن بنزين احسن.
39 - متفولش العربية عشان العداد حيغريك انك تمشى اكتر حط 10 لتر بس.
40 - متشغلش التكييف حيتخرب بيتك..
ملحوظة: بلاش تشغل التكييف أحسن لك