المرشح المناضل

(المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات، ولكن أحيانا يجعل من يسمعه هو الذي يغشى عليه).
(المثقف جالسا يحني رأسه وهو صامت، يقترب حصاوي منه ).
حصاوي: ممكن أأقعد جنبك؟
المثقف: سيبني في حالي دلوقت يا حصاوي وحياة أبوك.
حصاوي: ما لك إيه اللي مزعلك؟
المثقف: إنت عاجبك نتيجة الانتخابات؟
حصاوي: لا طبعا مش عجباني، معقولة السيسي ياخد الأصوات دي؟
المثقف: يعني أنت شايف إنها غريبة ؟
حصاوي: طبعا، إيه يعني ستة وتسعين وشوية في الميه؟ بقى دا كلام؟
المثقف: مش فاهم، تقصد كتير ولا قليل ؟
حصاوي: دول ولا حاجة، كان مفروض ياخد أكتر من كده بكتير.
المثقف: نعم؟ كمان؟ أنا فاكر هتقول إن كان فيه تلاعب وانتهاكات في الانتخابات.
حصاوي: فعلا، فيه تلاعب، حد يعمل انتخابات في الجو الحر دا؟
المثقف: بس اللجنة العليا زودت يوم علي أيام الانتخابات عشان السيسي ياخد أصوات أكتر.
حصاوي: ومين قالك؟ مش يمكن قصدوا أن أنصار حمدين ينتهزوا الفرصة دي ويزودوا أصواتهم لحمدين؟ بس واضح إنهم ما انتهزوش الفرصة، وبالعكس اللي حصل إن أنصار السيسي انتهزوها هما والمرشح التالت.
المثقف: هو كان فيه مرشح تالت؟
حصاوي: طبعا اللي كانوا بيروحوا يبطلوا أصواتهم وخدوا نسبة أعلى من نسبة حمدين.
المثقف: إنت بتهرج بقى.
حصاوي: ليه هو مش دا اللي حصل؟
المثقف: ودا اللي بتحسبه ضد حمدين ؟
حصاوي: مؤكد، لأن بعض اللي أدوا أصواتهم لحمدين في أول يومين ما كنوش معاه، كانوا ضد السيسي، ولما حسوا إن حمدين مش هياخد أكتر من كده راحوا عشان يبطلوا أصواتهم، وبكده يعلنوا إنهم مش معاه ولا مع السيسي، وإن هما القوة التالتة.
المثقف: إنت بتسفسط، ومش فاهم أي حاجة.
حصاوي: يا حرام، إنت زعلان علي حمدين؟
المثقف: لعلمك حمدين طلع من المعركة دي مرفوع الرأس.
حصاوي: بأمارة إيه؟ هو صاحبك مش ناصري عتيق ونزل الانتخابات باعتباره مرشح الثورة ؟
المثقف: وهو كده فعلا.
حصاوي: يبقى كان مفروض يكسب الانتخابات وياخد 99, 999 في المية وإلا ما يبقاش ناصري ولا حاجة.
المثقف: عشان إيه بقى؟
حصاوي: عشان دي النسبة اللي كان بياخدها عبد الناصر في كل الانتخابات، آسف.. قصدي في كل الاستفتاءات.
المثقف: إحنا في عصر تاني خالص.
حصاوي: عصر أحسن ولا أوحش ؟
المثقف: عصر مختلف.
حصاوي: وإيه رأيك في العصر اللي كان قبله اللي كان فيه انتخابات حقيقية، مع إن كان فيه ملك وأحزاب كتيرة ؟
المثقف: لكن كان فيه تزوير في الانتخابات.
حصاوي: وهو محمد نجيب نزل قدام عبد الناصر في انتخابات وخسرها؟ ولا نفاه وعاش محبوس من غير تهمة لحد ما مات عبد الناصر؟
المثقف: يكفي إن حمدين أعلن على الملأ لأنصاره إنه بيرضخ لإرادة الشعب المصري.
حصاوي: وهو بمزاجه؟ دا غصب عنه؛ لأن الأرقام ما تكذبش، وإن كذبت ما تكذبش للدرجة دي، خاصة وفيه آلاف من الجمعيات الأجنبية كانت بتراقب الانتخابات يعني ما كنش يقدر يغالط كل دول.
المثقف: يعني أنت مش عايز تلاقي له أي شيء محترم في اللي قاله ؟
حصاوي: اللي أعرفه إنه بعد ما يقول إنه يرضخ لإرادة الشعب المصري يكملها ويقول إنه يعلن تأييده للسيسي.
المثقف: إزاي وهو هيستأنف نضاله من موقع المعارضة.
حصاوي: وفيه واحد يعارض إرادة الشعب المصري كله؟ يعني ما فيش وطني غيره؟
المثقف: وهي المعارضة جريمة؟ وليه ما تقولش إنه هيكسب معركة الرئاسة اللي جايه؟
حصاوي: هيلحق يوعي كل الشعب في أربع سنين؟ وهياخد ساعتها كام صوت إذا كانوا اللي رافضين السيسي كانت أصواتهم أكتر منه هو؟
المثقف: يكفي موقفه التاني أنه لن يشارك في السلطة في أي موقع.
حصاوي: وهو حد قال إنهم هيعرضوا عليه أي سلطة عشان يوافق ولا يرفض؟ أنت محشش ولا مؤاخذة؟
المثقف: احفظ أدبك أحسن لك .
حصاوي: هي عاد فيها أدب يا راجل؟ ومع ذلك أنا خايف حد يعزم عليه بحتة من السلطة ولو على قد اللي انتخبوه، يقوم يرجع في كلامه.
المثقف: مش هيحصل أبدا، دا أعلن لأنصاره أنه فخور بيهم.
حصاوي: الحمد لله، وأنا كل أملي يفضل يفخر بيهم في أي انتخابات جاية.
(المثقف: يغشى عليه ).
لينين الرملي
624
هرش مخ
الأحد 1 يونيو 14
1 الحقيقة والخيال
لم يصل السيسي إلى رقم 99.999 الذي حصل عليه عبد الناصر في كل الاستفتاءات، وهو الفرق بين الانتخابات الحقيقية وبين التزوير!
21
2 اشمعنى هو؟
بالمناسبة كان حمدين ينتظر فوزًا يقارب ما كان يحصل عليه عبد الناصر في الانتخابات.
مش الراجل ثوري وناصري وكل العرب معاه ؟!
22
3 حالات نفسية
الذين أبطلوا أصواتهم يعانون حالات نفسية صعبة، والسبب أنهم أجهدوا أنفسهم رايح جاي على اللجان ومحدش هيعرف أسماءهم!
18
4 الأفضل
الأصوات الباطلة أكثر من الذين صوتوا لحمدين في الانتخابات، مش كان أحسن له يرشح نفسه عن حزب البطالين وكان طلع التاني ؟!
22
5 شكر واجب
شكرا لحمدين لأنه أثبت للعالم مدى قوة التفاف الشعب حول السيسي !
12
6 ذكاء
تجمع السلفيين أمام لجان الانتخاب كديكور، أما كوادرهم فلم تدخل لتنتخب، هو لسه عندكم أمل؟!
17
7 اتفاق يحترم
اثنان اتفقا علي وجود تزوير في الانتخابات، الأول أسمه مرسي المعزول، والثاني اسمه حمدين الخاسر!
14