النصائح الذكية للمرأة الفيس بوكية

سُئل حكيم عن المرأة فقال قلب به صفاء، وعقل رغم نقصه فيه دهاء، إن وضعتك في قلبها رفعتك للسماء، وإن وضعتك في عقلها لن يحل عليك مساء، عزيزتي المرأة لا تجعلي نفسك فريسة لكل من هب ودب، ولا تجعلي من نفسك ورقة تحركها الرياح مثلما تشاء، ضعي لنفسك دوما خططا محبوكة واصنعي لكل شيء في حياتك سيناريو، ففي عالم التكنولوجيا من الممكن أن تحبي دون أن تتأكدي من هوية الطرف الاخر، لذا سنقدم لك بعض النصائح التي ستساعدك على كشف حقيقة المحروس وأغراضه، وانتبهي دوما لو هو بالفعل يستاهل وبترسمي عليه لجوازة، اعرفي انك موش لوحدك اللى بترسمي عليه، لانك أكيد موش البنت الوحيدة على صفحته، لذا عليك التفوق عليهن جميعا..
*في الأول طبعا هيعمل لايك لكل حاجة انتى كاتباها حتى لو كانت قديمة، بعد كده هتبدأ مرحلة التعليقات واللى هتبدأ دايما بكلمة "حضرتك"، وهتلاقيه دايما بيضحك على كل تعليقاتك الضاحكة حتى لو كانت رخمة، وطبعا هيكون منتظر منك المعاملة بالمثل انك تعملي لايك لتعليقاته، لكن خلي بالك دا معناه انك اديتى له الضوء الأخضر علشان تكلميه إنبوكس.
*أول كلامه معاكي انبوكس هيبدأه تبع تعليقاتك انتى، يعنى لو لاقاكى شخصية جادة هيقولك مثلا مساء الخير – ودا طبعا حسب التوقيت لكن في الغالب هيبدأ معاكي كلام بالليل- لو لاقاكى شخصية طريفة ومضحكة هيقولك هاي، موش دا المهم، المهم أنه طبعا علشان يثبت أنه واد مثقف هيناقشك في البداية في السياسة، وعلشان يطمنك من ناحيته هيكلمك شوية في الدين والاخلاق.
* بعد شوية من الكلام في السياسة وسلوكيات الناس اللى ضاعت والثقة اللى مابقتش موجودة، هيدخل عليكى بالعبارة الشهيرة، اسمحيلى أسألك سؤال، طبعا انت هتوافقي، هيقولك انا حاسس انك متضايقة شوية، اعذرينى في تدخلي، طبعا هو كدة ثبتك بكلمتين، لو انتى ناوية ترسمى عليه ألفي أي حكاية قوليها له حتى لو انت متضايقة فعلا ماتقوليش السبب الحقيقي، أحسن يطلع ندل وينشره على كل الجروبات.
*ومن هنا بقى تبدأ المرحلة التالتة، البيه هيبدأ يكلمك كتير عن نفسه، وشوية شوية هيقولك أشهر تانى عبارة عن الرجال حتى ولو كان لسه قاصر، أنا عرفت قبلك بنات كتير جدا لكن حبيتك من أول ما قريت بوستاتك وحبيتك أكتر أول ماشوفت صورة بروفايلك- اللى هي أصلا موش حقيقية وانت ضرباها من أي حته- ونفسي أرتبط بيكي طبعا انت عارفة أنه بيسرح بيكى لكن اعملي نفسك مصدقاه.
* كدة انت قربتي على النهاية خدي كل بياناته وادي اخوكى الصغير خمسين جنيه وخليه يجيب لك قراره وان كان صادق ولا كداب، لو كداب كلنا عارفين طبعا هنعمل ايه، طبعا بلوك، لو صادق يبقى انت كدة دخلتى على مرحلة الوحش، لكن خليكي محتفظة بهدوئك، طبعا هيقولك عندك برنامج سكايبي، طبعا كده هتفهمى إنه بيرسم يشوفك لايف، قوليله اصلا انا ماعنديش كاميرا، طبعا هيفرح ويقولك خلاص تعالي نتقابل برة قوليله ممتاز تعالى بيت أهلي، لو اختفى يبقى انت كده عرفتي الجواب و لو قالك موافق، قوليله طب ممكن طلب أخير، هيقولك اتفضلي، قوليله عاوزة الباسورد بتاعتك، طبعا هو هيفهم انت عاوزاها ليه، لو هو فعلا بطل صياعة وتاب زي ماقالك يبقى هيديها لك وييجى البيت وتشربوا الشربات، لو مالقيتهوش تاني يوم على قائمة الشات اعرفى أنه عملك بلوك ومعلش خيرها في غيرها.
ملحوظة أخيرة: اختارى ديما أشخاص في متناول اليد يعنى ما تختاريش واحد من كوالا لامبور وتقولى اخويا موش هيعرف يروح هناك يسأل عليه.