ماحدش منوّر ولا متنوّر

(المواطن الغلبان حسن حصاوى يغشي عليه من حين لآخر. وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشى عليه).
حصاوي (حصاوي جالس بالمقهى يقرأ في جريدة حينما يدخل المثقف ليجلس علي بعد أمتار من مائدة حصاوي) (ثم تظلم أنوار المقهى فجأة)
حصاوي (مبادرا للمثقف): منور يا عسل.
المثقف: هو أنا اللي وشي خلى النور ينقطع؟
حصاوي: العفو. ومالها الضلمة؟ ما إحنا عشنا حوالي سبع تلاف سنة في الضلمة. حصل لنا إيه؟
المثقف: دي عصور الظلام لكن مش في عصرنا.
حصاوي: وهي الضلمة منعت المصريين يعملوا حضارة عظيمة؟
المثقف: إحنا مش في إمبارح، إحنا في النهارده.
حصاوي: بأمارة إيه؟ هو إحنا قادرين نعمل واحد علي مية من اللي عملوه أجدادنا. دا إحنا اللي علمنا الدنيا يعني إيه حضارة. ويعني إيه استنارة. تقدر تقول لي إحنا دلوقت بنعمل إيه؟
المثقف: هنعمل كتير.
حصاوي: لما نبقي نعمل.
المثقف: يعني انت سعيد بالضلمة دلوقت؟
حصاوي: أدينا قاعدين بنكلم بعض وشايفين بعض في الضلمه. ماخسش علينا حاجة. كفاية أن حضرتك منور الدنيا كلها.
المثقف: حضرتك بتتريأ؟
حصاوي: أعوذ بالله. قصدي أن مصر منورة بأهلها. وخاصة المثقفين اللي زي حضرتك.
المثقف: المثقفين أيوه. بس مش الجهلاء من أمثالك.
حصاوي: الجهلاء أمثالي زى بقية الشعب المصري صبورين. ويقدروا يتحملوا الضلمة. سنين ويكفيهم نور ربنا. ويمكن كمان نور فوانيس الشوارع اللي بينور الصبح وينطفي بالليل لكن نفسهم يبقي فيه تنوير في البلد.
المثقف: وإيه رأيك في الآلاف اللي بيسرقوا الكهربا وما بيدفعوش مليم؟
حصاوي: وهو أنا المسئول عنه ولا حكوماتنا الرشيدة؟ ناقص ياخدوا من مرتباتنا مع أن البلد فيها آلاف مؤلفة من المصريين والأجانب بيسرقونا عيني عينك والحكومة طناش.
المثقف: المشكلة أن الناس تستهلك أكتر من حاجتها عشان سعر الكهربا رخيص.
حصاوي: مش الفقراء بالتأكيد لأن القرش عندهم يساوي جنيه. وبعدين كانت فين الحكومات اللي فاتت واللي كانت بتسمح للتجار من كل نوع يهربوا السلع المدعمة لإخوانا في غزة والناس عندنا بتتخانق ع العيش والغاز والبنزين وحتى الدوا؟
المثقف: خلي بالك أن إخواتك في غزة هما كمان غلابة ومش لا يقيين ياكلوا.
حصاوي: المثل عندنا بيقول اللي يحتاجه البيت يحرم على الجامع. وبعدين همّ اللي بيحكموا في حماس مش بياخدوا شيء وشويات من كل سلعة بيهربوها من تحت إيدهم ؟ يعني همّ كمان بيسرقوا الغلابة عندهم.
المثقف: كل دا خلاص بطل ودلوقت والحكومة بتهدم الأنفاق.
حصاوي: بعد خراب مالطة؟ ومع ذلك بلادنا لسه قدامها أنفاق ياما مفتوحة وبتسرق الغلابة. والبلطجية همّ اللي بيكسبوا واللي يحصل يكسر.
المثقف: والحكومة تعمل لكم إيه أكتر من كده.
حصاوي: تفتح عينيها الاثنين بدل ما تغمضهم.
المثقف: يعني مش عاجبك حاجة خالص؟
حصاوي: وأنا في أيدي إيه؟
المثقف: إدّيني حل.
حصاوي: ما قلت لك الحل مش في النور. الحل في التنوير.
المثقف: وفيه تنوير من غير ما يبقى فيه كهربا كافية عشان تولد لنا النور للجميع؟
حصاوي: طبعا ممكن.
المثقف: إزاي بقي إن شاء الله.
حصاوي: قولي أنت أنهي نور اللي عمل التنوير في البلاد اللي اتقدمت وسبقتنا.
المثقف: مش فاهم قصدك.
حصاوي: هو أول واحد عمل المصباح الكهربائي عمله إزاي؟
المثقف: اخترعه.
حصاوي: إزاي يعني؟ في النور ولّا في الضلمة؟
المثقف: في نور ربنا طبعا.
حصاوي: طب ما الدنيا كلها فيها نور الصبح. إشمعني هو اللي اخترع المصباح الكهربائي؟
المثقف: أهي جات معاه هو.
حصاوي: برضه إشمعني هو؟ لأنه ما كانش بيقعد علي حيله. يعني كمل محاولته في الضلمة. بس كان فيه قدامه شموع. زيه زى ناس كتير في كل أنحاء الدنيا.
المثقف: قصدك إيه؟
حصاوي: قصدي أقول لك هو دا الفرق بين النور وبين التنوير. المشكلة مش في الفقر قد ما هو في التنوير. مافيش تنوير عندنا بقاله سنين واللي بيفلح بياخد بعضه ويهج على أوروبا وأمريكا عشان يسهم في التنوير في البلاد دي. فهمت ولا أشرح كمان؟
(المثقف يغشي عليه)
هرش مخ
1 سبب الحب
بعض النخبة يأخذون علي السيسي أنه ليس له حزب. لا يعرفون أن هذا بالذات ما يحبب الناس فيه!
2 مين أشطر؟
أنا سعيد بالخلاف بين جامعة النيل وجامعة زويل لأنه انتهى بتقرير وجود الاثنين وسنرى ماذا سيقدم كل منهما!
3 يا رب
إخوان لندن حذّروا بريطانيا أن تعتبر الجماعة إرهابية لأن هذا سيفتح الباب ضدها.
يا كريم يا رب!!
4 النفي إثبات
نفى حمدين صباحي ما ردده راشد الغنوشي الإخواني في تونس بوجود اتصالات بينه وبين التنظيم الدولي للإخوان، الظاهر الغنوشي عايز يسقطهم!
5 للذكرى
فاكرين لما هنأ الأمريكان بعضهم البعض بقتل بن لادن فصرّح مسئول إخواني عندنا بأن الجماعة تحتسب بن لادن شهيدا! ولكن مخابرات أمريكا لم تعرف!
6- انقطاع النور
انقطاع الكهرباء سيسهم في تقليل ميزانياتها. لكن الإظلام المبكر سيشجع علي المزيد من النسل. ولكن هذه مشكلة الوزارة القادمة، وإحنا مالنا؟!
7 اتهامات
حملة حمدين صباحي تتهم المنحلين من الحزب الوطني بمهاجمتها وسبق اتهامها للمؤيدين للسيسي، ونفت أن الإخوان معها.. رأيك إيه؟!