هشام إسماعيل ناعيا محمود الجندي: كان أبا للجميع

نشر الفنان هشام اسماعيل، عبر صفحته الشخصية بشبكة التواصل الاجتماعي فيس بوك، رثاء للفنان الراحل محمود الجندي، الذي رحل عن عالمنا فجر اليوم الخميس.
وقال هشام: "إنا لله وإنا إليه راجعون 00 الأستاذ محمود فى ذمة الله 00 الف رحمة ونور على حضرتك يارب ويجعل مثواك الجنة يا استاذ يا عظيم".
وأضاف: "نفسى اقول حاجات كتير جدا عن ازاي هو فنان حقيقى جدا جدا جدا الى اقصى حد فهو اصلا مخرج سينمائى وممثل بارع اي دور ح تشوفهوله مش ح تقدر تفصل بينه وبين الشخصية 00 راجع زيزينيا او انا وانت وبابا فى المشمش او الشهد والدموع او شمس الزناتى او ابو العلا البشرى او اللعب مع الكبار أو حكايات الغريب او اي فيلم قديم او جديد شارك فيه 00 اروع من غنى من الممثلين صوته حلو جدا جدا وعاشق الطرب الأصيل وحضور رهيب على المسرح وعن تجربة شخصية فى مسرحية " اللى بنى مصر" اللى تشرفت بالشغل قدامه طول العرض وجسد فيها من اروع شخصياته دور طلعت حرب كان اب حقيقى لينا كلنا ومسرحى بارع فى الاداء تراجيديا وكوميديا وكان فيه مونولوج بيترحم فيه على القطن وصناعة الغزل والنسيج اللى شبه انتهت 00 والله العظيم يوميا عينه تدمع بجد واستغرب ازاى يعنى ما بقى لنا 6 شهور بنعرضها عادى 00 انما الصدق والشغف موضوع فى دمه 00 ربنا يصبر اهله الطيبين ويعوضنا خير ولو ان الاساتذة الكبار دول كل ما حد منهم بيسيبنا حتة جديدة من فن مصر بيضلم ومابتنورش تانى".
الجدير بالذكر أن الفنان محمود الجندي توفي فجر اليوم الخميس، عن عمر يناهر 74 عاما، وتقام الجنازة اليوم من مسقط رأسه بالبحيرة.