هيدي كرم تطالب بعودة "مترو مصر الجديدة"

عبرت الفنانة هيدي كرم عن رغبتها في عودة مترو مصر الجديدة من جديد، وكتبت عبر حسابها على تطبيق "انستجرام":" المترو في مصر الجديدة مش بس جزء من تراث المكان.. مش هانتكلم عن ده علشان ده كلام الناس المرفهين.. لكن لو هانتكلم عن الرحمة اللي هايرحمنا منها المترو.. هانقول كتير.. زحمة الميكروباصات المكدسة دلوقتي في كل مناطق مصر الجديدة واللي بقت عاملة أزمة مرور لكل الناس..زحمة الاوتوبيسات العامة اللي بقت موجوده بشكل كبير.. ومع مشكلة البنزين وزيادة أسعار المحروقات كل المواصلات دي غليت جدا.. المترو وسيلة مواصلات سهلة ورخيصة وسريعة لكل الناس.. وسكان مصر الجديدة بمختلف مستوياتهم كانوا في وقت من الأوقات بيركبوا المترو ده..وعلى فكرة مترو الأنفاق مش تعويض عن المترو العادي.. المترو العادي له محطات كتير جدا جوة مصر الجديدة ومعمول علشان يخدم المنطقة نفسها غير مترو الأنفاق.
وتابعت "هيدي":"كتير من البلاد المتقدمة عندها مترو انفاق لكن عندها كمان مترو عادي لأنها عارفة كويس اوي أهميته.. ده غير بقا ان مترو مصر الجديده جزء مهم اوي من تراث المكان لأن عمره من عمر انشاء البارون لمصر الجديدة.. وبأكد على كلمة تراث لأننا بلد سياحيه. لو عايزين تدعموا حملة مترو جديد في مصر الجديدة ابعتوا فيديو لمدة عشر ثوان تتكلموا فيه عن مترو مصر الجديده ذكرياتكم أهميته أو اَي حاجه عايزين تقولوها عن الموضوع ده".
يذكر أن "كرم" عرض لها مؤخرا مسلسل "طلعت روحي" وهو من بطولة إنجي وجدان، نيكولا معوض، إسلام إبراهيم، ميار الغيطي، تامر فرج، حمدي عباس، نهال عنبر، صفاء الطوخي، إنعام سالوسة، وإخراج رامي رزق الله، تأليف شريف بدر الدين.