الحلوة تفاحة.. للسفر والسياحة

- ميكروباصات وتاكسيات وقطارات إيفرى وير.. أكيد طبعا ركبت أي وسيلة مواصلات عامة من دول.. استحالة حياتك تعدى من غير ما تكون عشت المغامرة دى.. حتى لو عندك عربية أكيد في يوم اتعطلت وركبت مضطرا واحدة من المواصلات العامة.
- الفلوس اللى الحكومة بتصرفها على ضحايا القطارات.. لو عرفوا يستغلوها علشان يصلحوا ويجددوا القطارات دى كانوا وفروا علينا حوادث كتير أوى.
- جوا المواصلات يف نوع لزج من أنواع البشر.. لو فتحت الموبايل لو فتحت كتاب تحس دماغه قبل منك جوا الحاجة اللى في إيدك.. والأسمج بقى أنه ممكن يعلق على حاجة من الحاجات دى لو مش عاجبها.. وده طبع متأصل ف المصريين بصورة بشعة.
- وسيلة المواصلات المستحدثة نوعا ما " التوكتوك" اللى هو تحس انك ممكن تقع في أي لحظة مرجيحة اكتر منه وسيلة مواصلات.. ده غير استعماله في الدعايات الانتخابية وصور المرشحين اللى بتتعلق عليه.. وفيه تكاتك بيستخدموها ف الزفة كنوع من انواع الروشنة أو التوفير.
- حاول تتخلى عن تناكتك شوية من السواق والتباع بتاعه لأن انت تحت ايديه وف منقطته وممكن ينزلك ف مكان بعد اللى انت عايز تنزل فيه ومتقدرش تنطق.
- متجادلش كتير في الاجرة علشان هيسبلك بالدين.. رغم صور الآيات القرانية اللى مالية العربية.
- كمان ممكن تلاقى لافتة في العربية ممنوع التدخين وتكتشف أن السواق حريقة سجاير.. وملفوفة كمان.
- التاكسي.. ده حل بيلجأ ليه الناس المرفهة اللى فلوسها كتير أو الناس المستعجلة وعايزة توصل بسرعة أو اللى رايح انترفيو وعايز يحتفظ بمظهره سليم.. بس ده مايمنعش طبعا أن التاكسيات أكثر وكسة من الميكروباصات.. حيث أن سواق التاكسى اصلا بيختار الزبون اللى على مزاجه مش اللى عايز يركب.. آه عربيته وهو حر فيها.
- لو انتى بنت تسلحى بأكثر من سلاح وانتى رايحة تركبى ميكروباص لو مفيش أسلحة.. كفاية دبوس الطرحة تخرمى بيه الايد اللى تتمد عليكى.. آه ومتخافيش ويكأنك زباين عاديين مش ف الميكروباص أساسا.
- حاول وانت ف الميكروباص متقعدش جنب راجل عجوز لأنه غالبا هيكرهك ف العيشة واللى عايشينها من كتر التحسر على حال البلد على ايامه.
- حاول كمان متقعدش جمب حد على وش جواز لأن ده بقى هيكفرك من كتر الحاجات اللى مش موجودة والحاجات اللى لسه هيشيريها والحكومة اللى عايزة قطع رقبتها.
- متركبش جنب السواق خصوصا لو كنتِ بنت وخصوصا لو هو مصمم.. أظن واضح طبعا.
- أقولك متركبش مواصلات أصلا اشترى عربية ودلع نفسك.