بالصور.. موقف العاشر تحت حصار الفوضى

ربما تظن عندما تدخل هذه المنطقة أنك في مجتمع آخر؛ بل دولة داخل دولة غير التي تعيش فيها وتعرفها.. ستظن أنك سافرت عبر القارات لتصل إلى هناك ولكنك لا تدرك أنك ابتعدت فقط بعض الكيلو مترات عن منزلك، نحن على أعتاب موقف العاشر نحتاج إلى إهدار بعض الوقت لدخول هذا الموقف.
"البوابة نيوز" تحدثت مع عم عاشور، أحد سائقى الميكروباصات بموقف العاشر وواجهتهم باتهامات الحكومة والمواطنين لهم إنهم سبب التزاحم وعدم السير في الخطوط المحددة للميكروباصات والمغالاة في الأجرة، ولكن دافع عاشور عن نفسه قائلًا: إحنا تعبانين، الكل محسسنا إن إحنا السبب في الحوادث، هبسطلك الموضوع، في خطوط سير أنا بحمل على خط المرج - موقف العاشر، وطبعا عقبال لما أحمل هتحاسب على الوقت اللي وقفته داخل الموقف، فأجبر على الوقوف خارج الموقف ومن هنا تأتي الزحمة والمخالفات وطبعا دي مشكلة تانية مهمة لأني عندما أحصل على مخالفة يدفعنا ذلك إلى دفع مبالغ مالية وبسببها نجري فى الطريق لتعويض المبلغ اللي دفعته ومن هنا تأتي حوادث الميكروباصات.
قال أحمد سالم، أحد ساكني مدينة الشروق المتواجد بصفة يومية بالموقف، إحنا واقفين دلوقتي في سوق اللي عاوز ميكروباصات، أكل، خضار، تشتري موبايلات وإكسسورات، أي حاجة هتلاقيها هنا، من الآخر موقف العاشر بتاع كله.
طبعا ده مأثر علينا بالسلب في التأخير في مواعيد العمل بسبب الزحام، أصوات البياعين اللي فاكرين نفسهم مطربين، والميكروباصات اللي بترفع الأجرة على مزاجها، تتكلم معاه يقولك "لو مش عاجبك انزل" مافيش أخلاق.
وأكد سالم، أن الحل هو تطبيق القانون على الكل ومنع الرشاوي بتشديد العقوبة عاوزين نبقى في تحضر شوية مش كل حاجة سيبها على الله، اجتهد في عملك بضمير واحترم قوانين الدولة وبعد كده سيب الرزق على ربنا.
ومن جهة أخرى رصدت "البوابة نيوز" عم محمد، أحد الباعة الجائلين بالموقف والذي قال: نحن ضحايا المجتمع الكل شايفنا احنا اللي خاربين البلد من الزحمة المرورية والبلطجة والسرقة، أنا مش بقول إننا ملايكة بس بلاش نظرة إننا السبب في كل حاجة، أنا خريج دبلوم صنايع أكيد مش هسيب فرصة عمل في مجالي وأتمسك بالشغلة دي.
من ناحية أخرى أشار عم محمد إلى أن موقف العاشر يعتبر محطة حيوية للمسافرين إلى المدن الجديدة، وجوده بالقرب من الطريق الدائري لازم يكون مليان بالمواطنين والبياعين، وعلى فكرة إحنا بنسهل على المواطنين حاجات كتير هما بيحتاجوها.
أيوه أنا بعترف إن موقف العاشر زحمة جدًا والحكومة لا بد من التدخل بس مش على حسابنا يشوفلنا حل ممكن يعملوا لينا أماكن مخصصة نقف فيها ويكون بموقف العاشر نفسه مش يحدفونا في أماكن بعيدة زي اللي حصل في رمسيس ووسط البلد.