لولو مكتئب

ماذا تفعل لو كلبك من النوع النرفز والانفعالي ؟ ، في مصر، الإجابة عن هذا السؤال المعضلة بسيطة خالص مالص من غير عُقد ولا قلايع، حاجة من اتنين، يا اخبطه خبطة ف السليم على نفوخ أهله بقالب طوب واخلص منه، يا ادبحه وارميه لكلاب السكك زمايله وأصحابه الأنتيميين ويبقى ده الشهيد رقم اتنين ف الكلاب بعد كلب شبرا الشهير، ونتعب ليه! بلاها دبح، بلاها خبط وخسارة قالب طوب، عليك وعلى أقرب سطح عمارة وشيّعه وخِلصت.
في بلاد بره الوضع غير كده خالص، دلع، وحنية، وملاغية وطبطبة وساعات ساعات « تَبنّي» .. آه والفول النابت، شعارهم: "قلبى على كلبي انفطر وقلب كلبي على حجر"، حدث واتعتر الكلب في عتبة غرفة نوم جنابه ، ينقلب حالهم الرايق غَمْ وجرى على أقرب فشخانة للتداوي والعلاج، عِطس بسلامته، عالطول ، شريطين تلاتة فلورست يبلبعهم، زادت حالة الرعشة ينام على سرير الولاد ويمدد والصبح يستحم بشامبو البنات،.. ظبطوه «منفعل»، يتعبوا ، ويتقهروا ، ويسألوا ، ويفتشوا: "الكلب لولو منفعل ليه!"، .. فيك إيه يا غالي ؟ .. سلامتك يا لولو يا نونو ياننوس عين مامته ، وعلى أقرب سباك نفساوي للعلاج والاطمئنان، ماكنش يعلقوله ال"شيراسيرو آم" في رقبة جنابه ب«أربعين لحلوح امريكي »، وده جهاز للإخوة غير المثقفين، يراقب تصرفات الكلب وتحليلها أثناء غياب السيد صاحبه بهدف سرعة اكتشاف حالة جنابه المزاجية، وعلاج سبب عياطه ليلًا وسبب اكتئابه نهارَا .