برلمان "كندوز" مِدي على جملي

هى فزورة ؟ لأ .. مش فزورة !! .. برلمانا حتة "كندوز" مِدي علي جملي ، متستعجلوش ، جنابه جاي .. جاي ، ماكانش النهارده يبقى بكره ، بعده ، الشهر اللي جاي ، ما كانش يبقى السنة اللي ما نعرفلهاش رقم ، أقولك ريح دماغك ، كَبّر الجمجمه ، إحسبها تكسبها ، قول ورايا ، أنا مش عاوز برلمان.. أنا كده حلو ولطيف ، وخِلصت ، كرر بأة الجملة دي تلاتين خمسين الف مرة هتلاق نَفَسك انقطع وطلع السر الالهي ، عم محلب عاوز كده ، أيوه عاوز كده ، جنابه مستلم البشر اشتغالات وكل طَلعت شمس والتانية يضربله تصريح من إياهم ، مولد البرلمان قرب ، البرلمان بعد رجب ، لأ .. ، خليه في شعبان .. ، آخر كلام ، صلّوا العيد وكلوا الكعك وكله يجهز نفسه في الدايرة اللي تخصه ، بُصّوا ودي آخر كلام عندي : " البرلمان يا سادة يا محتارين ربما في نوفمبر وأجري علي الله ، بلا خوته .. " .