مسرحية "بركة الضفادع" ل"زياد إبراهيم"

نص المسرحية:
المكان
بركة مائية مليئة بالضفادع والفراشات والنحل فيها بعض الأشجار وبها مرتفعات وأوراق خضراء جميلة والكثير من الزهور والورود
بركة الضفادع
الفصل الأول.. المشهد الأول
تحية العلم
ترقص فراشات البركة في استقبال الصباح... إيقاع مارش تدخل عليه الضفادع في صفوف... مستعدين لتحية العلم
نشيد دو.. ضفدف العظيم....
بعد النشيد تدخل التماسيح.. في ترقب وتتجه لصاري العلم وتنكس على البركة وترفع العلم الأسود.. تنفض الضفادع في حيرة وقلق شديدين.. ويحتل قطيع التماسيح وسط البركة ويهزوا بكلمات تحيًّ قائدهم الجنرال كروكو.. بعد ذلك يلتف قطيع التماسيح حول 6 ضفادع فقط..
بلاك
****
.. تجلس مجموعة ضفادع في تكتل محاولين فهم ما حدث في الصباح.. تدخل الفراشة رسال إلى البركة.. يدخل الضفدع "عنبر" بترقب شديد بحاول أن يصطاد رسال يقترب أكثر فأكثر متخفيًا في لونه الأخضر والأزهار الموجودة في البركة.. تراه الفراشة فيصيبها الهلع وتحاول الطيران ولكنه يحاوطها في المكان ولا تجد طريق للهرب
رسال: استنى استنى ماتكلنيش.. اوعي تفكر تلزق لسانك المقرف دا فيا.. استنى هاقولك !.. (تحاول أن تبتعد والضفدع يحاوطها)
عنبر: يا سلام.. ماهو لو انا استنيت هاتطيري ! !
رسال: لأ مش هاطير.. دا انا هاقولك على حاجة خطيرة خطيرة... خطيرة مش هاتصدق !!
عنبر: ياسلام ما انت كل مرة بتقولى كدا.. وبرضو بتطيري
رسال: اه دا حقيقي.. بس المرة دي ياعنبر.. في خبر مهم.. وخطير خطير خطييييييييييييير( عنبر يقترب منها أكثر)ٍ
عنبر: طب قوليلي الخبر وبعدين نشوف هاسيبك ولا هاتطيري.. أأ.. أأ مش هاتطيري.. لو طلع مهم أوي أوي خالص..هاسيبك ونبقي اصحاب قولي بقي
رسال: انا كنت هنا في البركة امبارح بلليل وسمعت الجنرال وهو مجتمع مع كل التماسيح
عنبر: هااااا هو دا الخبر المهم.. أكلك بقي دلوقتى ؟ ها؟
رسال: (تحاول تقفز) استنى استنى يا عنبر.. التماسيح عايزيين يطردوكو من البركة عشان.. يقاطعها عنبر
عنبر: عشان كدا نكسوا العلم النهاردة؟
رسال: عشان صوتكم مزعج مزعج جدًا جدًا.. الشرط زمان كان انكم ما تدخلوش البركة وهما نايميين
و اللى كان مسؤؤل عن الشرط دا القائد ضُفدُف العظيم
فستق: ايوة بس ضُفدُف العظيم مات من يومين.. ايه دا.. مفيش ضُفدُف العظيم..يبقي مفيش سلام مع التماسيح ؟ (echo)
رسال: همم.. أتاري الجنرال كوروكو كان محموووء أوي وفضل يقول للتماسيح أن الضفادع مخلوقات مزعجة ولزجة ومللًزَقة وطعمكو وحش وحش وحش.. وإن لازم كل التماسيح توافق على طردكو من البركة.
سلكة: يعنى ايه.. يعنى انا مش هاعيش هنا تانى عشان انا مزعج ولزج.. وللا عشان ضُفدُف العظيم مات.. طب هنروح فين.. انت سمعتى حاجة تانية ؟
مستكة: الجنرال قال هيعمل معانا ايه ؟
توت: طب لو مامشيناش يعنى ايه اللى هايحصل؟
رسال: لأ محدش قال هاتروحو فين بس هو قال لازم يكون في قائد مسئول نفس مسئولية ضُفدُف العظيم
عنبر: قائد مكان ضُفدُف..
توت: قائد مكان ضُفدُف.. مين؟
مستكة: قائد مكان ضُفدُف.. إزاي؟
سلكة: قائد مكان ضُفدُف.. ليه؟
رسال: مش عارفة ! همم همم.. فكري فكري.. هم قائد مكان ضُفدُف.. قائد مكان ضُفدُف؟.... ممكن تعملوا انتخابات (echo)
عنبر: انتخابات ؟
مستكة: انتخابات ؟ إزاي؟
توت: انتخابات ؟ مين؟
رسال: فكرو مع بعض وأنا هاروح أجمع الضفادع
****
المشهد التاني
اجتماع بركة الضفادع
مجموعات الضفادع بتتكلم مع بعض ويتحركو وصوتهم عالى وعاملين دوشة وعنبر بيصرخ فيهم عشان يعرف يتكلم معاهم
عنبر: ضُفدُف العظيم مات وهو اللى كان مسئول عن أمان البركة بلليل ومفيش حد مكانه دلوقتى
توت: اها... التماسيح عايزيين يحكمونا ويسكتونا..
بندق: احنا مش عارفين ننأنأ.. ربنا خلقنا ولقينا دي بركتنا.. وهو دا صوتنا
مستكة: ياللا ننأنأ كلنا.. نقييق.. نقيق....نقيق
عنبر: بس إهدو..........
عنبر: يا ضفادع.. يا ضفادع.. لازم نلاقي حل.. لازم نلاقي قائد زي ضُفدٌف العظيم
توت: بس ماتقولش عظيم.. دا كان كاتم صوتنا ومقيد حريتنا.. ربنا خلقنا بننأنأ.. اسكت ازاي يعنى
سلكة: انا اللى هاخد مكان ضُفدُف وأنا هاعرف.....
توت: و ليه انت ؟!
مستكة: و ليه مش أنا ؟
إيقاع مارش لتهدئة صوت الضفادع.. ونشوف على الداتاشو كاركاتير يشرح عملية الانتخاب والتصويت
عنبر: لازم نعمل انتخابات ونشوف أصواتنا هتروح لمين وأكتر ضفدع هايجمع أصواتنا هو اللى هاياخد مكان ضُفدُف العظيم
مستكة: يعنى ايه انتخابات يا عنبر
عنبر: يعنى نختار ضفادع مننا نرشخهم وننتخبهم
فستق: يعنى ايه ننتخبهم
عنبر: يعنى كل ضفدع من المرشحين هيبقي ليه صندوق وبطاقات عليه صورته وكل ضفدع فينا يختار يحط الورقة بتاعته في الصندوق اللى هو يختاره
توت: اه.. يعنى احنا هننتخب قائد جديد..
مستكة: طيب مين المرشحين
الجنرال: (ضحكات متقطعة شريرة) انتخابات (سخرية) لازم تلاقوا حد مكان ضُفدُف وبسرعة.. أنا بقرف منكم.. انتم مزعجين ولزجين وطعمكو وحش وعددكو كتييير وانا مش عايزكو هنا... لو عرفتو تنتخبو وتختارو حد مسئول عشان اتكلم معاه.. ساعتها ممكن نوصل لحل يخليكو تعيشو معانا.. أو نطردكو بره البركة
الضفادع تترتب في صفوف ويخرج عن الصف.. عنبر ومستكة وتوت وبندق وفستق
توت: ولو دا محصلش
الجنرال: (يتحرك نحون مستكة ويهجم عليها ويعورها ) يخرج
****
الفصل الثانى
المشهد الأول
الخيانة (الجنرال ومساعديه يستقطبوا سلكة)
الجنرال: انا سمعتك وانت بتقول " ليه عايزيين قائد مكان ضُفدُف العظيم "
سلكة: أصل..أصل انا مش عارف ليه عايزين قائد جديد
الجنرال: هاهااها.. انا عارف.. ومش هاقولك ههاههاهاه..
"يلتف ويكمل "
بس هاقولك أن انتو الضفادع عددكو كتير وضُفدُف كان مسئول عنكم وعن صوتكم المزعج.. بس كان مريحنى من دوشتكم..و صوتكم المزعج.. جدًا.. جدًا
سلكة: انا عارف أنه...
الجنرال: انا عايز حد يسيطر على الضفادع.. مش عايز اسمع صوتهم بالليل.. ولو ساعدتنى في اللى انا عايزه هاخليك العظيم بتاعهم
سلكة: العظيم بتاعهم.. يااه.. بجد؟
الجنرال: انا عايز نعيش مع بعض في سلام وأمان زي الأول بس المرة دى تحت سلطتى انا.. سيطرتى أنا.. فاهم ؟
سلكة: فاهم.. فاهم.. بس إزاي
الجنرال: ههاههاهها: هفهمك تعمل ايه
****
الفصل الثانى.. المشهد الثانى
الحملة الانتخابية
مشهد موسيقي.. حملة انتخابية.. صور المرشحين.. الضفادع تحمل يفط وعلامات وشعارات مرسومة.. عدد كبير يحمل صور عنبرو سلكة.. مشهد دقيقتين حركي موسيقي
استعراض جميل جدًا جدًا ينتهي بتمهيد للمناظرة
المناظرة
عنبر وسلكة في مناظرة أمام مجموعة الضفادع ورسال تسألهم والضفادع تصفق لعنبر وسلكة
رسال: ما رأيك في ضفدف العظيم
عنبر: قائد عظيم وصانع سلام البركة
سلكة: الله يرحمه.. مات
رسال: ليه اترشحت في الانتخابات
عنبر: عشان هي دى الطريقة الصح في نظام ديموقراطي نزيه وأقدر استشيركو في أمور الضفادع
سلكة: عشان انا عايزأكون قائد عظيم زي ضفدف.. وأكون العظيييم بتاعكم
رسال: هتعمل ايه مع الجنرال كروكو
عنبر: لازم نتفق على أمن وسلام وبقاء الضفادع في البركة ونحافظ على الشرط القديم من غير خوف وبمنتهي الثقة
سلكة: اللي هوا عايزه طبعًا لأنه هو اللى ممكن يطردنا من البركة
رسال: هتاخد قراراتك ازاي
عنبر: هاخد قراري مع كل الضفادع والقرار للأغلبيه.. لأن الضفادع هما القوة الأكبر في نظامنا الديموقراطي
سلكة: هاخد قراري في هدوووء يا ضفادع ولما نعمل اللى الجنرال عايزه هيسيبنا نعيش في هدوووء
الضفادع تتكلم بصوت منخفض بعد تصريحات المرشحين وتدور نحوهم الفراشات والتماسيح ويرتفع صوتهم في البلاك ويقطعهم صوت الجرس معلنًا بدء العملية الانتخابية
****
الفصل الثالث
الانتخابات
مشهد الانتخابات.. التماسيح بقيادة الجنرال على االمنصة لمراقبة الانتخابات.. عنبر ومستكة في حركة تفحص للجنة الانتتخابية.. الضفادع تقف طابور في وضع استعداد.. أمام التماسيح صندوقين يحمل أحدهم صورة عنبرو الأخر يحمل صورة سلكة.. مع كيو مزيكا تبدأ العملية الانتخابية وأثناء ذلك.. تطير رسال بسرعة وتخبر عنبر باتفاق الجنرال مع سلكة..
رسال: يا عنبر ياعنبر.. الحق يا عنبر الانتخابات هتتزور
عنبر: ايه.. ليه بتقولى كدا
رسال: الجنرال.. الجنرال ياعنبر.. (تنهج) اتفق مع سلكة أنه لو ساعدهم يزورو الانتخابات هيخليه قائد على ضفادع البركة وتبقي البركة كلها تحت سيطرة الجنرال
عنبر: فهمت..
مستكة: ايه الكلام دا.. هتعمل ايه ياعنبر؟
توت: لازم نفضحهم يا عنبر.. أوعي تسكت
رسال: لو الانتخابات اتزورت مش هتعرفوا تعملو حاجة والبركة هتبقي تحت سيطرة الجنرال
مستكة: أكيد في حل.. لازم نعمل خطة.. (تفكر)
بندق: احنا لازم نراقب الجنرال وسلكة كويس ونعرف هما هيزورو الانتخابات ازاي
عنبر: رسال عايزك تراقبي سلكة من غير ما يحس
رسال: حاضر
عنبر: مستكة.. ماتنزليش عينيك من على الجنرال
مستكة: حاضر
يتجه عنبر إلى طوابير الانتخاب ليتحقق من أن كل ضفدع يعبر عن رأيه بنزاهه.. إلى أن تنتهي كل الضفادع ويعلن التماسيح عن بدء فرز النتائج.. ثم تصيح رسال
رسال: يا عنبر الحق سلكة بيهرب
تتجه مستكة لتقف أمام الجنرال بثبات وتهدده بلسانها ويجري عنبر وباقي الضفادع ليمسكو بسلكة ثم يعودو به ومعه كيس ملئ بالبطاقات التي تحمل صورة عنبر
و بعدما يكتشف الضفادع خيانة سلكة يلقو به خارج البركة
يردد الضفادع بصوتهم خاين.. غشاش...كان عامل فيها بكاش
وبعد ذلك يحملوا عنبرعلى أكتافهم معبرين عن فوز عنبر وينصرف الجنرال والتماسيح في خزي
عنبر: يا ضفادع البركة.. التماسيح كانو عايزيين يطردونا من بركتنا..
مستكة: من وطننا اللى مانعرفش غيره عشان احنا من غير قائد..
بندق: و عملنا انتخابات وكلنا شاركنا فيها
فستق: عشان كل حد صوته مهم..
لوز: و كلنا لازم نشارك في الانتخابات..
توت: عشان دي بركتنا ودا وطننا ومحدش يقدر يطلعنا بره
توت: مدام عملنا انتخابات صح يبقي هنعيش في نظام صح
مستكة: و كمان عندنا قائد صح هيستشيرنا وهيحمينا ويجيبلنا حقوقنا
و تصيح كل الضفادع بالهتاف
عنبر قالها مرة قوية.. الضفادع مش سلبية
يحمل الضفادع عنبر على اكتافهم ويتوجهوا به إلى الصاري لرفع العلم الجديد ويرددو النشيد الجديد
النهاية