وزير إيجار مؤقت

في حوار مع الإعلامي اللولبي "هشام أبو حته" ، سُئل الوزير المستجد محمد يوسف وزير التعليم الفني والتدريب : سعادتك تابع ولا متبوع ..؟؟ .. رد الوزير : مش فاهم .. السؤال يبدو غامض ومغمض عينيه الاتنين .. ممكن تفتح وتوضح .
* أبو حته : سهله جنابك .. جيت ف جمل : وزارتك مع التعليم " الواطي " ولاّ " العالي" ؟
& يوسف بوضوح وعمق : تقدر تقول أنا وبلا فخر وزير انشطاري لا مع ده ولا ده ، دكانه حكومية إيجار مؤقت سنتين على ما نشوف هنعمل إيه في العيال بتوع الصنايع وعفاريت التجارة وفلاحين الزراعة ..
* أبوحته : وخطة جنابك ؟؟
& الوزير : يا مُسهل .. لسه بنتكتك كم تُكتيكة على كم فُكيرة وأكيد أكيد هنشوف مع بعض مفاجآت قريبا ..
* زي إيه جنابك ؟؟
& الوزير : أولوياتي خطة عاجلة لاستنساخ شباب صنايع مودرن ، بخلطة نسيجية ميكانيكية لإنتاج خريج مطبوخ جاهز لسوق الأكل والبلع ..
*أبوحته : وولادنا بتوع الزارعة .. ؟؟
&الوزير : هندربهم على كيفية الزرع والقلع وتنقية الدودة م الأرض بطريقة اللهو الخفي بالإضافة إلى كورسات في طرق زرع الكوسة والخيار والتدريب على حلب الجاموس بالكارت الذكي ..
* أبوحتة : كارت ذكي !!
& الوزير : متندهش .. ده الجديد بتاعي .. كارت ذكي بمجرد وضعه على ضهر الجاموس ينزل اللبن على أبوه مباشرة .