جنابه وزير انشطاري

في اول حوار مع الاعلامي اللولبي " هشام ابو حته " ، سُئل الوزير المستجد محمد يوسف وزير التعليم الفني والتدريب : سعادتك تابع ولا متبوع ..؟؟ .. رد الوزير : مش فاهم .. السؤال يبدو غامض ومغمض عينيه اللتنين .. ممكن تفتح وتوضح .
* أبو حته : نسهله جنابك جيت ف جمل : وزارتك مع التعليم " الواطي " ولاّ " العالي" ؟
& يوسف بوضوح وعمق : تقدر تقول انا وبلا فخر وزير انشطاري لا مع ده ولا ده ، دكانه حكومية ايجار مؤقت سنتين علي ما نشوف هنعمل إيه في العيال بتوع الصنايع وعفاريت التجارة وفلاحين الزراعة ..
* أبوحته : وخطة جنابك ؟؟
& الوزير : يا مُسهل .. لسه بنتكتك كم تُكتيكة علي كم فُكيرة وأكيد أكيد هنشوف مع بعض مفاجآت قريبا ..
* زي إيه جنابك ؟؟
& الوزير : اولوياتي خطة عاجلة لاستنساخ شباب صنايع مودرن ، بخلطة نسيجية ميكانيكية لانتاج خريج مطبوخ جاهز لسوق الاكل والبلع ..
*ابو حته : وولادنا بتوع الزارعة .. ؟؟
&الوزير : هندربهم علي كيفية الزرع والقلع وتنقية الدودة م الارض بطريقة اللهو الخفي بالاضافة الي كورسات في طرق زرع الكوسة والخيار والتدريب علي حلب الجاموس بالكارت الذكي ..
* ابوحتة : كارت ذكي !!
& الوزير : متندهش .. ده الجديد بتاعي .. كارت ذكي بمجرد وضعه علي ضهر الجاموس ينزل اللبن علي أبوه مباشرة ..
* وكيف يتم طريقة شحن الكارت ؟؟
& الوزير : مرة كل شهر من خلال توصيل الكارت بحلمة الجاموس لمدة تلت ساعة ، يعقبه نقع نص ساعة في حلة لبن متجبن .