حصاوي والحزب الثوري

(المواطن الغلبان حسن حصاوي يغشي عليه من حين لآخر، وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشى عليه).
( حصاوي جالس بالمقهى يقترب منه شاب ومعه ورقة من أعضاء الحركة الثورية الاشتراكية).
الاشتراكي: تسمح تمضي لي على الورقة دي.
حصاوي: دي بخصوص إيه؟
الاشتراكي: طلب الإعلان عن الذي اللي قتل الشهيدة شيماء في ميدان التحرير.. ولا أنت مش
مع ده؟
حصاوي: لا معاك طبعا. وفي أسرع وقت ممكن.
الاشتراكي: برافو عليك, يبقي تمضي علي الطلب دا, عشان الحكومة تسرع بإلقاء القبض
علي المجرم وتقديمه للعدالة وإعدامه في أقرب وقت.
حصاوي: بس السلطات بدأت فعلا في التحقيق في الواقعة.
الاشتراكي: مفهوم لكن إحنا بنستعجل لإعلان المتهم بسرعة والحكم عليه بالإعدام.وبلا هواده.
حصاوي: طب مش لما نعرفه الأول؟.
الاشتراكي: القاتل معروف.
حصاوي: حضرتك محامي ؟
الاشتراكي: هو لازم أكون محامي؟.
حصاوي: لأ.. بس لازم تكون قاضي.
الاشتراكي: يعني إيه نستني سنة مثلا لحد ما نعرف الجاني ونوقع العقوبة عليه؟
حصاوي: دي مش شغلتنا.. دي شغلة القضاة.. وعندك مثلا مرسي المعزول اللي داخل على
سنتين وأكتر ولسه قضيته منظورة دا غير أنه متهم في عدة قضايا منها التخابر
والجاسوسية والنهب هو وجماعته وغيرها.
الاشتراكي: بس حالة الشهيدة شيماء.. لازم يبت فيها بسرعة.
حصاوي: خلي بالك إن مئات ويمكن آلاف من ثوار 25 يناير ومصابيها وثوار 30 يونيو
لسه ما اتحكمش في أكثرها لحد دلوقت.
الاشتراكي: لكن جريمة قتل شيماء واضحة ومعروف مين اللى ارتكبها.
حصاوي: مين؟.
الاشتراكي: الشرطة طبعا لأن هما الطرف الوحيد اللي كان موجود ساعتها.
حصاوي: دا مجرد استنتاج.. يمكن يكون صحيح وممكن لأ.
الاشتراكي: يعني هيكون مين غير الشرطة؟
حصاوي: أنا معرفش طبعا.. دي مش وظيفتي.
الاشتراكي: لازم تكون عرفت لأن الشرطة كافحت المظاهرات من بداية يوم 25 يناير ألفين
وحداشر.
حصاوي: اللي أعرفه أن أغلبية أقسام الشرطة اتحرقت واتقتل كتير من ضباطها وجنودهم.. وإن أماكن كتيرة حصل فيها نفس الشيء زى المتاحف والمجمع العلوي ومبني ومباني الحزب الوطني مؤسسات كتيرة للدولة منها المحاكم نفسها.. دا غير هروب المساجين من سجن طره ومعاهم آلاف من المسجونين اللي طاحوا في أملاك
خاصة بالسرقة والنهب والقتل وترويع الناس.دول كمان كانوا من الشرطة؟.
الاشتراكي: معرفش.
حصاوي: يبقي لازم نستني لما نعرف.. وخلي بالك إن انتخاب الرئيس السيسي بأغلبية ساحقة من الشعب معناه أن الاتهام ما كنش للشرطة.
الاشتراكي: أنت بتغير الموضوع ليه؟ أنا بكلمك علي اغتيال الشهيدة شيماء في وضح النهار وفي وجود الشرطة اللي كانت بتحاول تطردهم من الميدان.
حصاوي: كانت بتحاول تطردهم بالرصاص؟
الاشتراكي : لأ لكن حد من الشرطة قتلها بالرصاص.
حصاوي: يعني أنت تعرف الجاني وشفته بيقتلها؟
الاشتراكي: لا لكن ما كانش فيه غير الشرطة هي اللي قصادهم.
حصاوي: وليه ما يكونش حد من الإخوان هو اللي ضربها عشان يعمل الوقيعة دي بين الشرطة والناس؟
الاشتراكي: قول بقي إنك مع الشرطة ضد الشعب.
حصاوي: أنا بتكلم على احتمال.. ومع ذلك تقدر ترفع قضية عليا أني بتستر على الجاني اللي حضرتك عرفته عشان أخد جزائي.. وبعدين سيبني دلوقتي عشان أنا الهم راكبني
الساعة دي.
الاشتراكي: يبقي لازم ضميرك بيعذبك.
حصاوي: هو سيادتك ما قريتش جرايد النهار دا قبل ما تيجي؟.
الاشتراكي: هيكون فيها إيه جديد يعني؟.
حصاوي: يعني أنت شايف اللي بيعمله الإخوان من تفجيرات وقتل وترويع لكل الناس؟
الاشتراكي: ما هو دا حاصل كل يوم, إيه الجديد؟.
حصاوي: الجديد المقتله اللي عملها الإخوان و"قتل فيها 31 ضابط وجندي و74 مصاب" لحد
دلوقت.. والعدد قابل للزيادة.
الاشتراكي: وإيه علاقة دا باستشهاد شيماء؟
حصاوي: أنت مش شايف أي علاقة؟ مش حاسس بالكارثة اللي البلد كلها فيها؟.
الاشتراكي : الكارثة هي اضطهاد حزبنا الثوري الاشتراكي.
(حصاوي هذه المرة يغشي عليه)
لينين الرملي
570
تعريفات حصاوي
بعض اللجان الحكومية
**بصدد حصر أموال الإخوان المنهوبة للتحفظ عليها. مش كان لسه بدري شويه؟!
بعض الخبراء عندنا
** يستعينون بخبراء أجانب لفحص قناع الملك توت الذي رممناه بشكل خاطئ
لماذا لا ننقله للخارج ولما يوحشنا نزوره في بلاد بره!.
تصرفات الإخوان عندنا
** تقول إنهم هم الذي قاموا بالعمل الأهم في ثورة يناير.. وهو الاستيلاء عليها
عنوة!.
بعض الكتبة عندنا
** يقرون أن الإخوان يقتلون ويخربون ويخونون.. لكن بعضهم يرون أن قتل
شيماء بطلقة في ظهرها من شرطي.وأوافقه بأنه شرطي من خلايا الإخوان
النائمة!
حتى الآن عندنا
** لا نعرف من الذي قام بحرق القاهرة.. لا في عهد النحاس ولا في عهد ناصر.
أشمعني هنعرف دلوقت مين اللي قتلت شيماء؟!.
بعض المسجونين عندنا
** هربوا من سجوننا كي يحرروا منظمة حماس من براثن منظمة فتح الخائنة!