حصاوي اشتراكي ثوري

(المواطن الغلبان حسن حصاوي يغشى عليه من حين لأخر، وعندما يفيق لا يفهم ما حدث حوله من تغيرات ولكن أحيانّا يجعل من يسمعه هو الذي يغشى عليه).
(حصاوي جالس على المقهى.. يأتي شاب يسأل عن الشخص السلفي)
حصاوي: زمانه جاي.. اتفضل حضرتك ارتاح
الثوري: ولا حد من حركة كفاية أو 6 أبريل؟
حصاوي: ولا القرضاوي حتى.. تصور؟
الثوري: واحنا مالنا ومال القرضاوي؟
حصاوي: معلش.. أصل أنا ما بفهمش في السياسة
الثوري: دا واضح
حصاوي: حضرتك صاحبه؟
الثوري: لأ ولا من حزبه لكن دا ما يمنعش أني أكون رفيقه في الكفاح، وكنا متواعدين كلنا هنا.. لأن قضيتنا واحدة في اللحظة دي
حصاوي: أسكت.. مش القضية اتحكم فيها
الثوري: أنهي قضية؟
حصاوي: قضية القرن.. ومبارك واللي معاه خدوا حكم بالبراءة
الثوري: وأنت إيه رأيك؟
حصاوي: أنا ماليش رأي.. ما أنا قلت لحضرتك مليش في السياسة
الثوري: يعني مبسوط بالحكم ولا ثائر ضده؟
حصاوي: لا دا ولا دا.. الحكم طلع وخلاص.. أصل أنا مش قاضي
الثوري: وكونك مش قاضي يبقي ملكش رأي؟
حصاوي: حتى لو عندي رأي هعمل إيه؟
الثوري: تعمل كتير يا مواطن.. ترفض الحكم دا وتثور عليه
حصاوي: فهمت.. يبقى أكيد حضرتك قاضي
الثوري: إطلاقا.. إنما دا ما يمنعش أني أغضب
حصاوي: وإيه الفايدة دلوقت، ما دام لا أنا ولا أنت بنشتغل بالقضاء؟
الثوري: بس المفروض يبقى الحكم للشعب مش للقضاء.. ولسه واحد صحفي مستنير كاتب النهار دا الكلمة دي.
حصاوي: دا واحد من الشعب.. إنما الشعب كله يحكم أزاي؟
الثوري: يرفضوا الحكم دا ويشجبوه ويتكتلوا كلهم ضده
حصاوي: بس حضرتك قلت إنك مش قاضي.. بالمناسبة حضرتك بتشتغل إيه ولا مؤاخذه؟
الثوري: أنا من الاشتراكيين الثوريين
حصاوي: مش فاهم.. يعني حضرتك موظف في إيه بالظبط؟
الثوري: دي مش وظيفة.. دي حركة ثورية يا مواطن زيها زي الأحزاب
حصاوي: كويس برضه ما تشرفناش بوظيفة حضرتك
الثوري: أنا عمري ما كنت موظف ولا هكون
حصاوي: أمال بتقبض من مين؟
الثوري: (بغضب) قصدك تتهمني أني بتلقى معونات من الخارج؟
حصاوي: من الخارج أو الداخل.. المهم بتلاقي حتة تاكل منها عيش.. إلا بقى إذا كنت من الناس المتريشة.
الثوري: بقول لك اشتراكي.. تقولي من الناس المتريشة يا جاهل؟
متابعا: أنا ضد الرأسماليين وضد الرأسمالية كلها.. واضح إن وعيك ناقص.
حصاوي: الظاهر كدا.. بس أنت بقى توعيني بالناقص.. يعني أنت ضد الحكم على مبارك بالبراءة لأنه قتل الثوار فعلا ؟
الثوري: طبعا.. ولا بد الشعب هو اللي يصدر الحكم عليه بالإعدام.. أنت لسه عندك شك؟
حصاوي: الحقيقة أنا مش متأكد.. لكن هو اللي خرج المسجونين من سجن طرة بالآلاف بعد 3 أيام وجاب لنا مرسي واللي معاه عشان يحكمنا ويزوروا له الاستفتاء.
الثوري: أعترض.. لأنه ما صدرش حكم بكدا
حصاوي: واحنا مالنا ومال القضاء بقى؟
متابعًا: مش أنت اللي قلت لازم الشعب هو اللي يحكم
الثوري: لكن ما حدش طلع مظاهرات ضده
حصاوي: يعني أنت مع مرسي والإخوان؟
الثوري: لا طبعّا
حصاوي: أمال تفسر إزاي أن الشعب طلع في 30 يونيو بالملايين وسقطه وبالذات عشان غير الدستور على مزاجه وحط نفسه بدل القضاء؟
الثوري: لأن الشعب كان مخدوع
حصاوي: إذا كان دا صحيح، يبقى ما ينفعش هو ولا غيره اللي يحكم بنفسه بدل القضاء
الثوري: لكن المرة دي الشعب نزل يتظاهر ضد الحكم
حصاوي: دول عدد صغير خالص
الثوري: لكن هما دول اللي بيعبروا عن رأي الشعب كله
حصاوي: وأنت نسيت المتظاهرين اللي طلعوا عشانه قبل الحكم وهتفوا وزغرطوا بعد ماخد البراءة؟
الثوري: دول جماعة قليلة لا يعتد بها
حصاوي: طبعّا واحنا نعمل إيه دلوقت.. نعمل استفتاء بين الشعب ونشوف الشعب مع مين؟
الثوري: برضه لأ
حصاوي: تبقى خايف الشعب يديه صوته حتى ولو بفرق كام صوت
الثوري: مفيش وقت عشان نعمل دا كله واحنا في مرحلة حرجة وكتير بيتربصوا بالبلد
حصاوي: طب ما تقول لنفسك.. أنت واللي معاك
الثوري: واضح إنك من أذناب مبارك
حصاوي: ولا عمره عمل لي أي حاجة.. بالعكس وبالذات آخر عشر سنين وأغلبنا شاف فيها الويل.
الثوري: يعني أنا معايا الحق
حصاوي: إنما الحكم كان على أنه قاتل أو مش قاتل
الثوري: أمال مين اللي قتل الشباب في الميادين؟
حصاوي: الإخوان اللي هربوا من السجون بالقوة واللي حرقوا أقسام الشرطة وحرقوا البلد كلها.. إلا إذا كان مبارك اتفق هو والإخوان واللي زيكم علينا
(الاشتراك الثوري يغشى عليه).