بلاغ للنائب العام .. السخان بايظ

إلى نائب عام الجمهورية بتاعتي..
أنا المواطن المستأجر المقهور للشقة الكائنة بحارة المقهورين في الشارع المتفرع من "شارع المطحونين" اللي بأوصله بعد وصلة رقص من كتر الحارات الملتوية يمين وشمال وشمال ويمين وكأني في حلقة ذكر.. المهم مش هطول عليك هما كلمتين هنقولهم علشان نخلص.
من يوم ما استلمت الشقة إيجار مؤقت كانت الدنيا ماشية زي الفل لحد ما دخل الشتا وجه اليوم اللي ما يعلم بيه إلا ربنا بجرب السخان لقيته بايظ يا دي المصيبة.. إيه الحل.. أكلم صاحب البيت اللي مأجر لي الشقة يصلحه ولاّ مكلموش .. أنا مأجر والمفروض استلمه سليم .. وكلّمت حضرته، مرة واتنين وعشرة ولا حس ولاخبر .. على طول يرد بكبسولة مسكنة .. عيوني .. تؤمر يا تاج راسي .. ماشي وينفض وخد على ماشي دي كم ألف تنفيضة لما طلع نفسي وتعب صدري من عفرة التنفيض.. ما خبيش عليكو زهقت .. قلت له أصلحه واخصم من الإيجار قال لي هخصم من الخلو... طاب أعمل إيه؟.
بذمتك يا جناب النائب العام ده كلام يدخل الدماغ .. أنا كل مرة باستحمى فيها بتكون عذاب لدرجة إني نسيت الموضوع بلاها حُما هيّا ناقصة كحة ورشح وبرد ولسع في العضم .. لو ترضاها جنابك لابنك هاستحمى بالتلج ورشح رشح إنشالله أموت من الكحة.