سمر طاهر تكتب: جوابات حلاوة القط بنت أختك «1»

رنة غريبة من نمرة غريبة على موبايلي، هي النمرة غريبة.. مش اللي رشا أديتهالي...لكن الساعة تلاته إلا ربع ..معاد رجوع زينة من المدرسة... زي رشا أختك ما قالت لي...ماهي كلمتني أمبارح وقالت لي زينة هتجيلي علشان هي بتخلص ورق مهم عشان الأجازة بتاعتها..

أخدت المفتاح ونزلت ووقفت عند البوابة...الجو حلو..

البواب ماسك الخرطوم وبيرش الجنينة اللي تحت العمارة..الأتوبيس لم يأت..

مضطرة أتابع رمضان البواب وأركز معاه..لسه بيرش...بس الحنفية اللي متوصل فيها الخرطوم بايظة..قصدي يعني الوصلة بايظة..مش عارفة المهم أن الخرطوم بيطلع رزاز على نطاق 360درجة داير مايدور..

أسترخي يا حنان ...ده مجرد رذاذ..المفروض يعني إنه يعمل نعنشة..الرذاذ وصل لعندي، ضايقني، مستمر في الدوران والوصول لوجهي المكفهر بسبب الشمس اللي ضربت في وشي بعد ما طلعت من ورا السحابة..

أنادي على البواب أهزأه طيب؟ ما إحنا قلنا له بلاش الميه الكتير عمال على بطال الشارع مش ناقص طين. وحرام كل الميه دي... أف يا رمضان الله يسامحك

واقف أصلا بعيد أوي مش عارفه أنادي عليه..طب يرش الزرع ماشي بس ليه الرصيف كمان والأسفلت يا رمضان... دمي بيغلي يا ناس وركبي سابت ..ضغطي بيعلى والا بيوطى والا إيه ؟

- يا رمضااااان ...الحنفية بايظة.

( ياريتك كنت هنا يا حبيبي .. كنت تزعق أنت.. ده أنت صوتك عالي ومش بتسكت....قصدي مش بتسكت على الغلط ..صحيح أنا بعمل دور الطيبة اللي بجبر خاطر الناس بعد زعيقك بس برضه.. صدق اللي قال من غير مناسبة .. ضل راجل ولا ضل حيط..)

- يا رمضااان ..الخرطوم بايظ "أرحمني يا ابن ال .."

- أنا لسه شاريه النهارده يا مدام..

بدأ رمضان يمشي ببطء ويفحص الخرطوم..وواضح أنه أكتشف المشكلة لأنه جاب كيس بلاستيك وبدأ بدأب وهمة يربطه حوالين الوصلة اللي مسببة المشكلة..

الحمد لله الرذاذ خف ورمضان مكمل برضه رش في الرصيف... يالا جايز يجيب طراوة..

الأتوبيس أتأخر ...صوت الخرطوم خرق وداني.. هو ده صوت خرير الماء اللي بيقولوا عليه؟!

ضغطي بيعلى وهنفجر...الأرض طينت..إزاي أقنع رمضان أنه بيضر كوكب الأرض وهو فاكر أن دوره المقدس في الحياه هو مسك الخرطوم ورش الشارع أو الجنينة أو العربيات أو الرصيف أي حاجة وخلاص...أفهمه إيه وهو بيشتغل بضمير..

يارب الأتوبيس يوصل وآخدها ونخرج..نخرج إزاي أنا بهدوم البيت ومش معايا المحفظة والا الموبايل !

هطلع أجيبهم وألبس وننزل...نخرج شوية نتفسح... قديمة نتفسح دي...ننزل شوية

هروح فين؟ أزور حد؟ أنا مش قادرة أتفاهم مع حد...لو رحت لناس عندها عيال بيعصبوني أكتر وخصوصا العيال اللي مش متربية..يالا مش هنربي الناس.. دع الخلق للخالق

ماله البيت؟ سترة والله ..نطلع نترزع فوق

بس النهارده الخميس وبكرة أجازة.. الواحد زهقان...نخرج أنا وهي فين؟ في الجونينة؟

نروح النادي نتغدى...بس مش أقل من ساعتين سواقة في الزحمة يكون كتافي خدلت ورجليا نملت...يخرب بيت الزحمة على الشوارع.

حتى لو الواحد استحمل الزحمة هيروح فين؟ الأماكن في مصر مش متنوعة.. حتى الهرم والمتحف والسيرك بقوا موضة قديمة.. والله حاجة تكسف .. الخروجات بقى فيها موضة.. ماهو طبعا كل المرافق والخدمات بتاعت أي حاجة متهالكة وكمان الصيانة.. يعني المحافظة على الأماكن وتحسينها في مصر ياخد صفر من عشرة

حتى مفيش مكان مفتوح ونضيف ببلاش للناس..مفيش حديقة عامة محترمة

لو الواحد عايش بره كان ينزل يتمشى عادي كده هيلاقي مناظر حلوة..في مصر القبح مبدأ ..يالا مش ناقصة فلسفة هي دلوقتي

الخروج في مصر بقى يا إما أكل ...يا إما سينما.....

يالا هنتبطر؟ الحمد لله ..وعلى رأي المثل غيرنا مش لاقي...

الناس مموته نفسها عشان رغيف عيش وأنا من جبروتي عايزة أتفسح.. ؟

طب والمصحف ما أنا نازلة

الأتوبيس الزفت ده فين؟ الجيران بيركنوا وطالعين..هيشوفوني وأنا منظري كده؟ والله معرفهومش، أول مرة أشوفهم دول..جايز ضيوف طالعين عند حد..

الواد المفعوص أبنهم نزل جري من العربية وهما لسه بيتلكعوا...الواد جه وقف جنبي..لذيذ أوي بس يا حرام عنده كحة جامدة..كحته وحشة زي بنت نهى صاحبتي..الله يخرب بيت السحابة السوداء..

كح كح كح كح...تستمر محاولاتي في الاسترخاء بلا جدوى مع كل هذه الكحكحة اللعينة من الواد

كح كح كح..إخرس يا مقصوف الرقبة عصبتني بجد..لومسكتك هخنقك..

على رأي الدكتور اللي بييجي مع دعاء عامر....صدق لما قال: "الكحة مرض مزعج للأم وليس للطفل ولكنه ذاتي الشفاء"!

لسه سامعه الجملة دي امبارح ومفهمتهاش... وتساءلت..طب ليه الكحة مش مرض مزعج للأب؟؟ جايز لما أخلف أعرف..

كل ده وأهله بيلموا حاجاتهم من العربية؟ هما ناويين على بيات والا إيه؟

الحمد لله أخيراً طلعوا..

الأتوبيس أتأخر.. والله ما انا مستنية... أنا طالعه بيتي..

بصيت من البلكونة الأتوبيس لسه ما ظهرش.. بس الشارع أتحول لطين بفضل رمضان أفندي ..

حتى لو عايزة أخرج لازم أتطين لغاية ما أوصل للعربية..حسبي الله ونعم الوكيل..دايما أنا كده...منحوسة

الأتوبيس أهوه ..ظهر فجأة ودخل الشارع بسرعة وهاتك يا كلاكسات... طب جاي متأخر وبتضرب كلاكس جامد ليه ياض؟

هو انا اللي أتأخرت عليكو؟ كأنكوا مستنيني من سنة.. عارفة أنا طريقة خدوهوم بالصوت دي..

طب والله لأنزل على أقل من مهلي عشان أفرسكم زي ما فرستوني.. لطعتوني تلت ساعة في الشارع..

تلت ساعة حفرت على وشي تجاعيد عميقة .. ما هو من البوز اللي أنا كنت ضارباه ... ببص في مراية الأسانسير... على رأي المثل وشي بقى يقطع الخميرة م البيت..

مشرفة الباص مبتسمة لي جامد..أنفجرت فيها..

-أنتوا مش منظمين خالص..أنا واقفة في الشارع بقالي ساعة إلا ربع .. وبعدين إيه الكلاكسات دي كلها؟ هو مين فينا اللي اتأخر؟

-إحنا واقفين من بدري يا مدام

-!#^^*؟!؟؟!؟

دخلت البيت وانفجرت في العياط..قلبي بيدق جامد

-هو فيه إيه يا طنط؟

-مفيش يا حبيبتي أصل أنا استنيت كتير وزعلانه إني زعقت للميس..هكلمها أتأسف لها..

( أنا آسفة إني عليت صوتي يا ميس أميرة بس انتوا أتأخرتوا عليا.)

قفلت السكة وحاولت أسترخي...أستمتع بقى بصحبة زينة..أمورة أوي بنت أختك ما شاء الله عليها..الأطفال أحباب الله فعلاً .. أبتسامتها بريئة.. أنا كمان أبتسمت لها..ياريت كل يوم مامتها تروح مشوار وتسيبها لي.. آهو تدريب على الأمومة..

-خلاص يا حبيبتي كلمتها ...أنتي وحشتيني أوي وفرحانة أنك جيتي عندنا.. تقعدي معانا على طول ؟؟

أوعي تكوني زعلتي مني عشان أنا كنت مكشرة جامد...

أنتي مابترديش ليه؟ زعلانه يا حبيبتي من اللي حصل؟ سرحانة في إيه يا روح مرات خالو؟

-هو أحنا هنتغدى إيه النهارده ياطنط؟

أحبيبتي أزينه.. همك على بطنك زي خالك...

هذه الجوابات من وحي خيال المؤلفة وأي تشابه مع الواقع هو مسئولية كل زوج !

... يتبع ...