احنا شرطة

الموضوع ده حصلّي إمبارح الثلاثاء 23/10/2012…كنت في طريقي لبيت أهلي و مراتي معايا في العربية الساعة 5:00 المغرب، الشوارع كانت زحمة أوي (مش حاجة جديدة خصوصاً في الميعاد ده).. دخلت من شارع صلاح سالم يمين لشارع إحسان عبد القدوس، الشارع اللي فيه الحرس الجمهوري، وإدارة الشرطة العسكرية (وصلت للمكان ده بعد ساعة تقريبا من كتر الزحمة، مع العلم إن المشوار من بيتي لبيت أهلي مش باخد أكتر من تلت ساعة
( واللي منكم عارف المكان ده يعرف قد ايه بيبقي زحمة علشان في ملف دوران للخلف أول ماتدخل الشارع، وعربيات راكنة علي اليمين وعالشمال، وعربيات جاية من النفق اللي قدام عمارات العبور، وعربيات جاية من صلاح سالم زي حالاتي..
المهم، بعد ما عديت الملف لقيت العربية اللي في الصورة دي ماشية في الإتجاه العكسي و اللي سايق بينور النور العالي علشان أوسع له، لكن حظه الوحش إنني مقرر مع نفسي إنني مش هسكت لأي حد أياً كان إنه يمشي عكسي قدامي فوقفت قدامه علشان مايعديش و يرجع بضهره لحد الملف اللي جاي منها ويدخل طريقه تاني، لكنه ماتحركش وبدأ يشاورلي من عربيته إنني أمشي من جنبه وأوسعله يعدي (مع العلم إن الشارع في الجزء ده بيعدي 3 عربيات بالعافية والشارع زحمة جدا) ساعتها قررت أنزل من العربية أسأله هو جاي منين وماشي عكس الإتجاه ليه (علشان مراتي قالتلي يمكن يكون تايه أو مش عارف يروح فين) واللي حصل بالحرف هو التالي:
أنا (بلهجة حادة) : ممكن أعرف أنت ماشي عكسي ليه ؟ يعني رايح فين عكسي في الزحمة دي وماشي بقالك قد ايه عكسي ؟
الشباك الخلفي بيتفتح و بترد عليه "السيدة المحترمة" اللي في الصورة بردو (بصوت عالي وعجرفة متناهية): هااااااه… خلصت كلامك ؟!! ده السواق بتاعي، وأنا اللي قلتله يمشي كده.
أنا (لسه محتد في الكلام): بس كده غلط، كده عكسي لو مش واخدة بالك.
"السيدة المحترمة" تنزل من عربيتها: إنت مالك عكسي ولا مش عكسي، ماتمشي وتخليك في حالك ؟ وبعدين إحنا شرطة… شرطة (أيوه قالتها مرتين) !!!
أنا (مصدوم ومذهول، بس لسه محتد): وإيه يعني شرطة، هو شرطة يعني تمشي عكسي وتعملي غلط وأسكت ؟ ده بدل ماتبقي قدوة ؟!! علي فكرة البلد عمرها ما هتتعدل ولا هتنضف طول مافيها ناس بتتصرف زيوكوا..
"السيدة المحترمة" (بصوت عالي وعجرفة متناهية بردو): أنت مالك ومال البلد ؟!! ماتخليك في حالك وتمشي ؟ وبعدين بقولك إحنا شرطة، هتمشي ولا لأ ؟!!
أنا (في قمة الذهول وبحاول أمسك نفسي من الغلط): طب وحياة أمي ما هاعديكي.. أنا مش مصدق إن في ناس بالبجاحة دي ولسة بيتصرفوا كدة (بكلم نفسي بصوت عالي….. جداً) ولسه بيقولوا شرطة وهما ماشيين عكسي(لسه بكلم نفسي وبضرب كف علي كف)
وهنا تنزل من العربية الأبنة (المحترمة بردو) لتنضم للسيدة المحترمة: أنت إيه مجنون (بتكلمني) ؟؟؟!! ده مريض نفسي (بتكلم والدتها المحترمة)!!! هتفضل واقف كدة لحد مايقبضوا عليك (بتكلمني)؟!!
السيدة المحترمة: ده فعلا مريض نفسي، ده محتاج يتعالج!!!
الأبنة المحترمة:
he's lunatic, he's totally crazy!!! (a very good American accent that indicates a good level of education)
السيدة المحترمة:
yes he is (confirming her daughter) he's totally crazy, i can't believe what he's doing!!!!
أنا: أنا مجنون ؟!! أيوه أنا مجنون، بس والله العظيم ما هتمشي عكسي
السيدة المحترمة: يعني أيه؟؟ هتفضل بايت هنا في العربية ؟
أنا: أيوه هفضل بايت هنا.
السيدة المحترمة: ياللا يا …………. (بتنادي بنتها اللي مابطلتش زعيق وكلام عربي علي إنجليزي من ساعة مانزلت، مش فاكر الأسم للأسف) إركبي العربية وسيبيه، ده مجنون بجد محتاج يتعالج يا حرام صعبان عليا (لهجة سخرية وتعالي)
ركبت عربيتي تاني، كنت بديها فرصة تعيد تفكير وتقييم للموضوع تاني وهما كمان ركبو عربيتهم، كنت بفكر ممكن أعمل إيه، دورت بسرعة علي أي عسكري شرطة أو شرطه عسكرية، بس مالقتش حد في حوالينا.. وقررت تركب عربيتها هيه وبنتها كمان وقالت للسواق يرجع، كان كل ما يرجع علشان يوسع لنفسه و يكمل عكسي (اللي هوه هيبقي ماشي في نص الطريق لأن الطريق 3 حارات) أطلع قدام الشوية اللي هوه رجعهم علشان أجبره يرجع لحد الملف و يمشي في الإتجاه الصح، للأسف كان لسه بيحاول يعديني ويكمل عكسي لكن ماكنتش مديله فرصة علشان كنت بمشي قدام أي مسافة بيرجعها ورا، وهنا قررت السيدة المحترمة تنزل من عربيتها مرة تانية بس المرة دي علشان تقف قدام عربيتي وماعرفش أطلع قدام وتدي للسواق بتاعها فرصة إنه يعدييني… فقررت إني أستخدم نفس أسلوبها علشان هو كمان مايعرفش يمشي عكسي ويعدييني (بصراحة الفكرة عجبتني) وطبعا كانت هيه مستمرة في الكلام بتعالي وعجرفة وسخرية من قد إيه أنا مجنون ومريض نفسي ومحتاج أتعالج، بس أنا كنت فهمت ان الكلام مش هايجيب نتيجة فماكنتش بتكلم خالص، ولا بحاول أبص ناحيتها.. فقررت هيه ترجع تركب العربية تاني وأنا فكرت أرجع عربيتي أصورهم علشان أكتب اللي حصل ده… شافتني السيدة المحترمة وأنا بصور العربية وبرجع لورا شوية علشان لوحة أرقامها تبان في الصورة فبدأت تزعق تاني هيه وبنتها المحترمة: أيوه صوّر صوّر، هتعمل بيها أيه يعني، تعالي صورنا إحنا كمان، تحب تصورنا وإحنا بنركب العربية ؟!! ياريت تصورنا "پوزات" كمان
صورت الصورة دي.. والسيدة المحترمة رجعت عربيتها لأن السواق فشل يعدييني من الزحمة الشديدة اللي في الشارع وبدأ يرجع بضهره لحد الملف وفضلت مستني لحد ما دخل الملف ومشيت لأني بقيت أنا اللي معطل الشارع من غير سبب، وسمعت كلاكسات كتيير ورايا، بصيت في المرايه لقيته رجع يمشي عكسي تاني، بس للأسف كنت بعدت خلاص ومش هقدر أعمل حاجة..
أحب أقول فالآخر إني كنت بحاول مانقلش غير اللي حصل بالظبط، بعيد عن أي إستنتاجات وصلتلها من الموقف، أو أي إنطباعات شخصية عن السيدة المحترمة وبنتها المحترمة...
أنا طالب منكم إنكم تنشروا الصورة دي علشان الكل يعرف إن في ناس متعلمة كويس وبردو مش عاوزين يصلحوا نفسهم علي الأقل..
أرقام العربية : ص ب ع 2ه6
ولو حد عنده أي إقتراح إزاي نمنع تعديات السواقة ياريت يسيب تعليق هنا…
أخيرا، آسف إني أخدت كتير من وقتكوا، وأسف علي أسلوب الكتابة (أنا أول مرة أنشر حاجة طويلة كدة)… وشكراً