تصريحات نارية لمرتضي منصور عن أزمة الصفقات ويهاجم ممدوح عباس ومشكلة قبل لقاء الإهلى فى كأس السوبر وعودة أحمد جمال ويؤكد فيريرا جراح

مرتضى منصور يرد على محامي ممدوح عباس ويكشف أزمة كوماندوز الزمالك قبل مواجهة الأهلي ويؤكد فيريرا جراح ويقرر عودة أحمد جمال إلى العمل فى قناة الزمالك

محمود هنداوي
أكد المستشار مرتضى منصور في مداخلة هاتفية ببرنامج زملكاوي على قناة الزمالك تقديم طارق يحيى .
ان ممدوح عباس ، ملوش ولا جنيه في نادي الزمالك وبأكد تاني ملوش اي جنيه في النادي ، يوم الأربع هكشف عن كل حاجه في المؤتمر الصحفي، هو طلع مع أحمد شوبير في 2006 ، وقال انا بتبرع للنادي ب40 مليون جنيه وبعد فتره قال ال40 مليون جنيه دول قرض، وقال ان الفلوس دي قرض ، وعشان تبقى قرض لازم يبقى فيه قرار مجلس إدارة ، والقرار ده يتعمل بيه محضر لمديرية الشباب والرياضة ويتوافق عليه والكلام ده محصلش.
واستكمل رئيس الزمالك ، ان الكلام ده برضو محصلش في فلوس تركي ال الشيخ للنادي الأهلي ، لكن انا عملت كده في الفلوس بتاعه تركي ال الشيخ للزمالك .
وشدد مرتضى انا مكتم على كل اللي بيحصل ده عشان في صفقات مع الاندية واللعيبة وخايف ان الصفقات تفشل، بيقولك انا حجزت على بنك واحد ، وحياه مامتك ده البنك الوحيد اللي فيه الفلوس اصلا ، وهو اللي فيه فلوس نادي الزمالك كلها الي هي فلوس عامة .
وعن مبارة لوسيل مع الهلال السعودي قال مرتضى منصور : ان الناس بتقول الزمالك اتعادل وخسر بضربات جزاء ، ده كويس ان الزمالك اتعادل واللعيبة عارفه ان محجوز على فلوسها ، احنا حاطين جزمة في "بوقنا" وساكتين ، ما تلم نفسك يا اخي بقا.
ده كلم كل الناس وقالوله اتهد وكلم عمرو الجنايني وقاله اتهد ، انا عاوز اعرف مين حامي البني ادم في البلد يطلع يقول انا حاميه ، هو نادي الزمالك ده عزبة امي ، بتضرب الزمالك في اخطر اسبوع عشان الصفقات ،احنا سكتنا لحد ما نخلص صفقاتنا عشان الاندية و اللعيبة متخفش والصفقات تفشل، انا بقولك يا ممدوح يا عباس اني اتصرفت وكل لاعب اتفقت معاه على فلوس هياخدها ، عشان احرق دمك يا ممدوح يا عباس انت و المحامي الاخواني بتاعك اللي فرحان انه عامل جريمة
وطمئن جمهور الزمالك يا جماعة محمد صبحي عقده سليم واخر البند كان 31 / 8 والمفروض قبل نهايه الموسم بساعة كان يبعتوا تفعيل العقد و لكن ده لم يحدث، فاركو مبعتوش الفلوس كمان وكنت بتمنى ان القيد في فاركو يبقى مفتوح عشان نديهم لاعبين من عندنا ، احنا علاقتنا جيده مع كل الاندية الجيش وانبي وبيراميدز والمصري.
وتحدث عن ازمة الاعلامي احمد جمال بعتلي قالي انا غلطت وبعتذر ، قولتله لا انت هتعتذر للجمهور ولشعب مصر وللجيش، انت مغلطش فيا وقولتله انت من بكرة في قناة الزمالك وده درس لاحمد جمال يتعلم منه ، وهو غلط واعترف بغلطه.
وبفيما يخص محترف كرة اليد قال في لاعب اسباني احنا جايبينه حاجه رهيبه ، كنا المفروض نبعت الاتحاد الاسباني والنادي بتاعه حوالي 260 الف يورو و مش عارفين نسجله عشان الحساب محجوز عليهاحنا عندنا بكره ماتش مهم قدام الاهلي في السوبر ومش عارفين نسجل اللاعب واحنا في حاجة ليه ، دي حاجه كده على الماشي لجمهور الزمالك .
مرتضى منصور : فيريرا جراح
ووجه رسالته يا جمهور الزمالك المحترم ، انت ليك عندي صفقات وبطولات ولكن مينفعش تدخل اودة العمليات على جراح اسمه فيريرا وهو شغال وعارف كل حاجه وتقوله افتح من هنا وهات ده، ارجوكوا سيبوا الراجل يشتغل ويشوف شغله واحنا هنجيب احلى صفقات ، مفيش لاعب مشي الا بتعليمات من فيريرا ، واللي اتمدله اعاره برضو بتعليمات من فيريرا ، واللي اتعار اتمدله مدة الاعاره في عقده ومتعملوش شرط جزائي
انا على اخري ، ارجوكوا يا جمهور الزمالك متضغطوش عليا انا لسه عندي 64 فيديو بيشتموا فيا وكلهم " سفالة" .
ووجه مرتضى منصور ، حديثه يا معالي رئيس الوزراء أحنا مش هنقدر نكمل طول ما ممدوح عباس مستمر و طايح ومحدش واقف قصاده ، نادي الزمالك لو معرفش يجيب صفقات هيبقى موقوف عن القيد لمده 3 فترات ، وانا بحظرك يا ممدوح عباس انت وابنك من غضب الجمهور
جذير بالذكر ان المستشار مرتضي منصور رئيس مجلس إدارة نادي الزمالك ، أعلن عن عقد مؤتمرا صحفيا بمقر النادي فى ميت عقبة ، يوم الأربعاء المقبل الموافق 14 سبتمبر الجاري في تمام الساعة الحادية عشرة صباحا .