مرتضى منصور يكشف تفاصيل إتفاق أمير مرتضى مع أحمد دياب على صفقات تبادلية بعد جلسة تسع ساعات ويؤكدشوبير ملوش لازمة في فيوتشر

مرتضى منصور: لا أعلم شيء عن الصفقات الجديدة .. وشوبير ملوش لازمة في فيوتشر

سارة عبد الباقي ومحمود هنداوي

أكد المستشار مرتضى منصور ، رئيس نادي الزمالك، أنه لا يعلم بتفاصيل صفقات الزمالك للموسم المقبل حتى الآن، رغم كونه رئيساً للنادي .
وقال مرتضى منصور ، في مداخلة هاتفية فى برنامج زمالكاوي مع خالد لطيف على قناة الزمالك: "أمير مرتضى مبيرضاش يقولي أسماء الصفقات قولتله أنت رخم يلا، أتفقت مع أحمد دياب على تبادل لاعيبة، ودياب اجتمع مع أمير مرتضى من يومين، وقالي متعرفش أن أنا قعدت مع أمير 9 ساعات؟ قولتله ولا قالي دقيقة منهم، لكن الأهلي عنده لجنة جوة لجنة جوة لجنة، وبياخدوا فلوس، لكن أقسم بالله أمير مرتضى مبيخدش جنيه وبيدفع من جيبه".
وتابع رئيس الزمالك : "هنشوف فيريرا عايز مين ومين هيمشي الموسم الجديد، واتفاقي مع فيوتشر ده تاعب شوبير، كان بيلعب على وتر خلافي معاهم، وكلهم في فيوتشر قالوا شوبير ملوش لازمة".
وأكمل مرتضى منصور : "صححت أخطائي اللي كانت في 2005، متوهش جمهورك يا أستاذ محمود يا خطيب وصحح أخطائك زي ما أنا عملت، أنا عمري ما غلطت في جمهورك ولا في أعضاء الجمعية العمومية اللي أنا عضو فيها من قبلك، ولا رموزك ولا رؤساءك السابقين، مسلط أيمن شوقي وزكريا ناصف يغلطوا فيا، يا أهل المغنى دماغنا وجعانا دقيقه هدوء".
وأضاف منصور : "إحنا بنتشتم والبذاءات شغالة 24 ساعة وبيقولوا إني قليل الأدب، كابتن هناء حمزة هي كابتن النادي الأهلي من قبل الخطيب، لكن محدش بيترحم، ومن فضلك يا أستاذ خطيب أبعد بنتك المحترمة عن الموضوع، هندخل الستات وهنعيط؟ معيطوش ليه لما السيد تركي آل الشيخ قال عصابة؟ وقال أخدوا الساعات؟، لو رديت عليا وقولت أنك خدت 263 مليون جنيه من تركي آل الشيخ، و11 ساعة ألماظ هعتذر".
وأتم مرتضى منصور، قائلاً: "إن شاء الله نتوج يوم الثلاثاء ببطولة الدوري أمام الاتحاد، أي سفينة بدون ربان ماهر بتغرق، وبلاش الوقيعة بيني وبين فيريرا أنا بوفر لفيريرا اللي يحتاجه، وبيعمل شغله وأنا بعمل شغلي".