ياسين منصور: اخترت الترشح نائبًا للخطيب.. وأحلم بأن يلعب الأهلي في أوروبا

أكد ياسين منصور، المرشح على منصب نائب رئيس النادي الأهلي في الانتخابات المقبلة، أن قرار ترشحه جاء بعد تفكير طويل ودراسة دقيقة للظروف الشخصية والعملية، مشيرًا إلى أنه يرى الآن أن الوقت أصبح مناسبًا لخوض هذه التجربة من أجل خدمة النادي.
وقال منصور في تصريحات إعلامية: قررت الترشح في انتخابات الأهلي لعدة أسباب.. في الفترة الماضية كنت مشغول جدًا بسبب ضغط العمل، وكنت شايف إن منصب نائب رئيس الأهلي محتاج تفرغ ووقت كبير، لكن دلوقتي ابني انضم لأعمالي، وشايف إن الوقت مناسب أخوض الانتخابات وأقدر أدي للنادي بالشكل المطلوب.
وتحدث ياسين منصور عن علاقته بالكابتن محمود الخطيب، وقال:كابتن الخطيب أسطورة كروية مصرية وأهلاوية، لكنه اليوم مر بوعكة صحية بسيطة ونُصح بالراحة. كان فيه احتمال أن أنزل الانتخابات على منصب الرئيس أو كنائب، لكني قلت له: أنا عاوزك تبقى رئيس. مقدرش أجي من بره وأدخل على طول، لازم من 3 إلى 5 شهور أعرف إيه اللي جوه وأفهم الأمور كويس.
وأضاف: أنا عاوز أدخل النادي وأخد وقتي في فهم كل الملفات قبل اتخاذ أي قرارات، لأن الأهلي مؤسسة كبيرة وتستحق إدارة على أعلى مستوى».
وتابع المرشح على منصب نائب الرئيس : بحلم إن كل واحد في الأهلي، في أي موقع، يكون عنده مؤشرات أداء واضحة (KPIs) يتحاسب عليها ويكون عارف المطلوب منه بالضبط. لازم نتابع أحدث ما وصل إليه العالم في الإدارة الرياضية ونطبقه داخل الأهلي، لأن ده مكان يستحق يكون في المقدمة دائمًا.
وفي حديثه عن طموحاته، قال ياسين منصور : أنا شايف إن الأهلي ما يلعبش في إفريقيا بس، الأهلي لازم يكون موجود في أوروبا.. في دوري الأبطال أو الاتحاد الأوروبي. الأهلي براند ضخم في الشرق الأوسط وإفريقيا، وأنا مؤمن دايمًا بقوة البراندز. الأهلي براند رهيب وولاده عندهم طبيعة خاصة، لأن بالنسبة لهم النادي هو الأهم، مش المناصب أو الأدوار.
واختتم منصور :أنا بشجع الأهلي من وأنا عندي 4 سنين. أنا أصلاً إسكندراني، وكنت بروح ماتشات الأهلي لما ييجي يلعب في الإسكندرية، واتضربنا كتير من جمهور الاتحاد السكندري، لكن مكملين حب الأهلي لحد النهارده».