بالتفاصيل| نص التحقيقات مع رئيس مكتب التوثيق في قضية تزوير عصام صاصا

تصدرت قضية مطرب المهرجانات عصام صاصا في واقعة تزوير محرر رسمي توكيل عام في القضايا، الساحة على مدار الأيام الماضية، وحصلت «بوابة أخبار اليوم» على نص تحقيقات قضية تزوير عصام صاصا مطرب المهرجانات الشهير المتهم فيها برفقة شقيقه وآخرين.
اقرأ أيضا| مفاجأة في توكيلي الشهر العقاري بقضية عصام صاصا | مستندات
و كشفت أقوال رئيس مكتب توثيق مجلس النواب تفاصيل الواقعة، وجاء نص التحقيقات على النحو التالي:
س/ ماهي طبيعة عملك واختصاصك الوظيفي؟
ج/ رئيس مكتب توثيق مجلس النواب - مصلحة الشهر العقاري.
س/ منذ متى وأنت تباشر هذا الاختصاص؟
ج/ منذ عام 2021 وتاريخ تعييني 10 أكتوبر 1996.
س/ ماهي طبيعة عمل مكتب توثيق مجلس النواب؟
ج/ مكتب تابع للشهر العقاري داخل مجلس النواب.
س/ ماهي مهام وطبيعة عملك تحديدا؟
ج/ إصدار وتوثيق المحررات العرفية والرسمية الصادرة من مكتب توثيق مجلس النواب وبعمل كل حاجة بكتب التوكيل وبعدها تقدير على السيستم ولو مفيش ببعته للتقدير المركزي وبعدين الإيصال وبوثق التوكيل.
س/ ماهي الإجراءات المتبعة في تحرير التوكيلات؟
النواب أو ضيوفهم أو موظفين المجلس وقرايبهم وبيقدموا البطاقة الشخصية للشخص اللي عايز يعمل التوكيل وبتأكد من هوية الشخص صاحب البطاقة ولو في مدخلة بيانات بتكتب التوكيل لو مفيش حد أنا بدخل البيانات وبقدر الرسوم وبطلع الإيصال وبعدها بوثق التوكيل.
وأطلعت النيابة العامة في جنوب الجيزة رئيس مكتب توثيق مجلس النواب على صورة طبق الأصل من التوكيل رقم 965/أ لسنة 2024 توثيق مجلس النواب الصادر ل مطرب المهرجانات عصام صاصا باسم عصام طه طلعت لصالح محمد مصطفى حمودة.
س/ ما معلوماتك بشأن توكيل المطرب عصام صاصا؟
ج/ اللي حصل أن في واحد معرفتي اسمه حسني سيف شغال في شركة تأجير تمويل قالي في واحد عايز يعمل توكيل ومستعجل عليه في تاني يوم جه الراجل ده وطلعت برة وروحت خدت منه البطاقة والرقم القومي بتاع المحامي وعملت التوكيل وخرجت بصمته ومضيته وبعدين وثقت التوكيل وهو خده ومشي وبعدها التفتيش الفني كلمني في التليفون وقال عايزين صورة من التوكيل ده بعدها رئيس نيابة العمرانية كان عايز صورة من التوكيل وبعدين الأدلة الجنائية جت بخصوص توكيل عصام صاصا وعرفت بعدها أن التوكيل خاص ب عصام صاصا.
س/ متى وأين حدث ذلك؟
ج/ بتاريخ 11 مايو 2024 في تمام الساعة 2.14 دقيقة مساء بمكتب توثيق مجلس النواب.
س/ هل اطلعت على شخص مقدم ذلك الطلب بشأن عمل التوكيل؟
ج/ أيوة.
س/ ماهو مضمون طلب سالف الذكر؟
ج/ هو توكيل عام رسمي في القضايا.
س/ هل قمت بالاطلاع على هوية أو بطاقة تحقيق الشخصية الخاصة به؟
ج/ أيوة أنا شوفت البطاقة.
س/ هل تأكدت من هوية الشخص الماثل أمامك؟
ج/ أيوة هي الصورة اللي موجودة في بطاقة تحقيق الشخصية اللي معايا كانت مطابقة للشخص اللي واقف قدامي.
س/ هل قام سالف الذكر بالتوقيع على التوكيل؟
ج/ أيوة هو اللي وقع وبصم عليه قدامي.
س/ هل قمت بإفهام الماثل بطبيعة الإجراءات؟
ج/ أه فهمته أن التوكيل ده عام رسمي في القضايا.
س/ ماهو الاجراء الذي قمت باتخاذه بعد الانتهاء؟
ج/ تم حفظ أصل وصورة من التوكيل في مكتب التوثيق وصاحب الشأن بياخد أصل التوكيل وأنا بحتفظ بوصرة منه أصل وبيتم ختمها بختم شعار الجمهورية.
س/ ما قولك في تقرير أبحاث التزييف بأن الشخص الذي مثل أمامك قام بانتحال صفة عصام صاصا؟
ج/ لا معرفش هو كان معاه بطاقة تحقيق شخصية واتأكدت انه نفس الشخص.
س/ هل قابلت الشخص تحديدا وأين؟
ج/ أيوة هو كان قاعد في عربية برة المجلس وأنا طلعت من المجلس وروحت له العربية وقابلته.
س/ ما سبب قيامك بالخروج اليه؟
ج/ خدمة عملتها لحسني صديقي ومش عملها تاني أبدا.
س/ هل تقاضيت مبالغ مالية نظير ذلك؟
ج/ لا أنا مخدتش فلوس دي كانت خدمة بس