«أمهات مصر»: نتابع الأبناء حتى الإعدادية لتأسيسهم.. وأخريات: «للجامعة»

طرح اتحاد أمهات مصر للنهوض بالتعليم، برئاسة عبير أحمد، سؤال على أولياء الأمور من الأمهات حول: هل يتم متابعة أبنائهم في المذاكرة والدراسة أم لا؟ وما هو السن والمرحلة العمرية التي تستحق المتابعة؟.
وتفاعل المئات من أولياء الأمور من الأمهات على صفحة اتحاد أمهات مصر بفيسبوك، حيث قالت ولي أمر: "لغاية ما يخلص الإعدادية بعد كده اسيبه من أولى ثانوي يعتمد على نفسه وأتابعه فقط لو احتاجني لازم أكون جنبه، المناهج بتتطور ولازم كلنا نساعد ولادنا مفيش أي حاجه لوحدها، الفكرة مش أني اسيبه الفكرة أني أكون مطمنة عليه ومتأكدة أنه خلاص فاهم مصلحته وهيمشي أموره صح، المرحلة دى وكل المراحل تحتاج متابعة ومراقبة وتواجد بإستمرار لغاية ما يعدوا بر الأمان".
وأضافت ولي أمر: "طبعا بنتابع وهنستمر على المتابعة، مفيش سن بالنسبة لي هقف عنده لأني شايفه إن عدم المتابعة هيسبب في الإهمال". وتابعت أخرى: "حسب الطالب اللي قدامك، في حد بيحتاج تنقليه خطوة خطوة وفي حد تاني تأسيسه وتسيبيه وفي حد بيحتاج رؤوس أقلام مش أكثر".
واستكملت أخرى: "البنات واحده واحده بيحبوا يعتمدوا على نفسهم مع متابعة بسيطة اسمعلها حاجة واقفة أمامها واشرحلها لكن الصبيان حنفضل متابعين لغاية مالا نهاية". وذكرت ولي أمر: "المفروض إن من أولى ثانوي خلاص يعتمدوا على نفسهم، بس المشكلة دلوقتي الدراسة الأون لاين محتاجة متابعة علشان ممكن الوقت كله يضيع مع السوشيال ميديا للأسف".
ةذكرت: "أنا بفضل أتابع لحد تالته إعدادي شرح ومذكرة، بذاكر معهم كلمة بكلمة، أما ثانوي متابعة من بعيد من غير ما أدخل في منهاهجهم". تضيف ولي أمر أخرى: "بتختلف من أم لأم على حسب ظروفها لكن الإهتمام أكبر بيبقى للطفل الأول وبعد كده بيقل، لكن أنا شايفة إن مرحلة ابتدائي مهمة للتأسيس بعد كده متابعة بسيطة لأن الأم بيكون عليها عبء كبير".
وأشارت ولي أمر أخرى إلي: "أنا حاليا ابني في أولى إعدادي ومش عاوز يذاكر لوحده وحاولت كتير مفيش فايدة لو سبته لوحدة مايعملش حاجة خالص". وقالت أخرى: "لحد تالته إعدادي بتابع، أما من أول أولى ثانوي مع نفسه علشان يبدأ يعتمد ويشيل المسؤولية لكن بتابعه من بعيد"، وتابعت أخرى: "أنا بذاكر معاهم بصراحة ومش بناخد دروس، أنا إللى قايمة بالدور كله لوحدى بالرغم من أنى إمرأة عاملة، ربنا يعيني ويعنكم جميعا".
اقرأ ايضا| خاص | «التعليم» تعلن تخفيض مصروفات المدارس الخاصة