من غير فشخرة

شد وجذب

اكتشفنا كلنا اننا نقدر نعيش من غير الفشخره الكدابة.. ونقدر ناكل فى البيوت.. والست المصرية طلعت شاطره وبتعرف تعمل كل أنواع الأكل..يعنى كنا نقدر نستغنى عن المطاعم اللى كانت خاربه بيوتنا وما كناش واخدين بالنا.. اكتشفنا ان الناس تقدر تتجوز من غير ما تكلف نفسها مصاريف فرح عالية جدا علشان الفشخره بس.. وتقدر كمان تعمل عزاء على المقابر بس علشان ما يبقاش موت وخراب ديار.. اكتشفنا ان نصف العدد اللى موجود فى الجهاز الادارى للدولة يقدر يدور المنظومة من غير أى مشاكل وبنفس الكفاءة ويمكن أحسن.. كورونا علمتنا واتعلمنا دروس كتير.. كفاية ان الناس بقت تغسل ايدها كل شوية وتهتم أوى بالنظافة..كمان الناس بطلت تبوس بعض بدل ما كل واحد كان يحضن التانى 5دقايق وبعدين يطعنه فى ظهره.. اتعلمنا ان يبقى فى تباعد وما نكحش ولا نعطس فى وش بعض ونقول اسفين.. عرفنا ان الدنيا صغيرة جدا وان مافيش حاجة تستاهل لا نضحك على بعض ولا نخدع بعض ولا حتى لما حد يطعنك من الخلف انك لازم ترد الطعنة.. عرفنا كلنا ان احنا كنا فى نعمة كبيرة أوى وان اللى كنا مش راضيين بيه من 5 شهور بنتمنى دلوقتى ولو ربعه.. مبقاش فى غنى وفقير.. كله على سرير المرض واحد..الناس كلها مستنيه الجوامع تفتح علشان تجرى عليها وتستغفر ربنا.. يا ترى لو تم اكتشاف علاج لكورونا والدنيا رجعت زى زمان الناس هتنسى وترجع تمارس نفس العادات السيئه..اعتقد ان الدرس كان صعب اوى على الدنيا كلها.. واللى مش هيفهم رسالة ربنا صح يستحمل اللى يحصل..لو ربنا رفع عنا الوباء لازم الناس كلها تحافظ على الخير اللى كانت بتعمله وقت الازمة.. لازم كمان يبقى فى رضا يعنى كل واحد يحس فى مكانه ان هو اغنى واحد فى الدنيا مهما كان وضعه.. ولازم الغنى يساعد الفقير بجد.. ولازم كمان نبطل فكرة الفشخرة الكدابة.. ونقلل تكاليف الجواز علشان ربنا يستر على كل البنات.. محدش فى الدنيا بيفضل على حال واحد.. فى ناس راضيه ومقتنعة وبتحمد ربنا وتقول ان ربنا نجانى من كورونا وده رزق كبير غيرى صرف فلوس كتير علشان ينقذ حد عزيز عليه وماقدرش.. وفى ناس مهما حصل لا بتقتنع ولا تتغير ومش فاهمة الرسالة.. اللى الواحد متأكد منه ان العالم بعد كورونا هيكون حاجة تانيه خالص.. هنعيش كلنا فى تباعد وده مش عيب بس العيب ان قلوبنا تبقى متباعده وما نحسش ببعض.. لازم يبقى فى بينا موده ورحمة من خلال التعامل مش من خلال التقارب الجسدى بس.. احنا فى مصر نقدر نطلع بمكاسب كتير من الازمة.. نقدر نتعلم ثقافة النظام والنظافة والقناعة وان يكون الايمان فى القلب مش بالذهاب للمساجد فقط.. نقدر كمان ما نستغلش بعض.. ولا نتمنى الشر لبعض.. اكتشفنا ان الدنيا زائلة فى أى لحظة.. وان السيرة أطول من العمر بكتير.. نقدر نتعلم ثقافة الشغل بضمير.. ونبعد عن استغلال بعضنا البعض.. نقدر نزرع ونحصد ونكفى نفسنا.. نقدر نبطل نتريق على بعض.. ونعيش حياه متوازنه فى كل شىء.. محتاجين نخلى بالنا من بلدنا أوى ونصدق ان خوفنا على بعض هيخلينا ننتصر على كورونا واهمالنا هيكون خسارة للجميع.. احنا نقدر نعدى الصعب لو صدقنا ان احنا فى خطر وكان عندنا قناعة اكيده ان ربنا قادر على ازاحه البلاء فى لحظة.. نخلص النوايا ونقول يارب بضمير وما نفكرش نرجع تانى لعالم ما قبل كورونا.. عبور الاختبار بنجاح قد يكون بداية لاختبار جديد من الله.. دعونا نخلص النوايا ونرضى بما قسم الله لنا وندعوا بضمير لازاحة الوباء قبل فوات الاوان.. حتمًا سياتى الوقت وتنتهى جائحة كورونا ومن سيتعلم الدرس ويستفيد من التجربة سيكون الفائز الاكبر.. أهم حاجة اكتشفناها اننا نقدر نعلم ولادنا من غير دروس خصوصية لان الدروس كانت اكبر مصدر لالتهام دخل الاسرة المصرية ومحدش كان حاسس بالناس وهى بتصرخ من جشع المدرسين..اللهم اجعل مصر وشعبها من الفائزين بعد جائحة كورونا واجعلنا من الذين يرضون بما قسمت لنا.. وتحيا مصر.