شد وجذب

الفشخرة الكدابة

أتمني ان تتبني الحكومة المشروع القومي الأكبر وهو اعادة بناء المواطن المصري علي أسس صحيحة تخلصنا من الفوضي والبلطجة والارهاب.. وتحيا مصر
هي الحكومة أصدرت قرارات او تعليمات للمواطنين يرموا الزبالة في الشوارع.. ولا قالت للحرامية اسرقوا قضبان السكة الحديد.. ولا قالت لموظفي الأحياء ارتشوا وغمضوا عنيكم عن اللي بيبنوا في الاراضي الزراعية.. ولا.... ولا... الخ.. ولا قالت للمهربين دخلوا الترامادول مع لعب الأطفال.. حد يقولي أمال دور الحكومة إيه.. ما أهو لازم الحكومة هي اللي تحاسب الناس عن المخالفات وتضع القوانين الحاكمة لفرض النظام.. طبعا هرد وأقول أكيد بس لازم نعرف كلنا ان اي حكومة في العالم لا يمكن ان تسيطر علي سلوكيات الشعب بنسبة 100٪.. زمان كان الناس هما اللي بيجبروا الحكومات علي اتخاذ القرارات لتعميم النظام مش بالبلطجة زي اليومين دول ولكن بالفكر والاحترام واتباع السلوك الايجابي.. المواطن في مصر رفع شعار انا ومن بعدي الطوفان وده اللي وصلنا للي احنا فية دلوقتي.. حاجات كتير غلط بسبب سلوكيات الشعب وحب النفس ورفع شعار انا والطوفان.. انا مش قصدي أني أقول ان الحكومة بريئة وبتعمل كل اللي عليها.. لا.. انا قصدي أقول ان احنا عايشين في بلد فيها حاكم ومحكوم والحاكم هنا الحكومة والمطلوب منها ان تنفذ القوانين بكل شفافية وكمان تضع قوانين تتناسب وامكانيات الشعب وان تتعامل مع الفساد بكل حسم بعيدا عن الوساطة والمحسوبية.. اما المحكوم وهو الشعب طبعا بدل ما احنا قاعدين ننظر ونقول شوف ده بياخذ كام ولا دية بتعمل أيه نحاول نصارح أنفسنا بأوضاعنا ونتعامل مع الواقع بضمير وبلاش نشتغل كلنا روساء حكومات او دكاترة.. كل واحد يشتغل شغلته ويعمل اللي عليه وبس ويحسن من سلوكياته.. يعني مش عيب أبدا انك تقف في طابور من غير ما تقول انت مش عارف انا مين.. ومش عيب انك ما ترميش زبالة في الشارع او تقف في إشارة المرور.. الناس مش هتقول عليك جدع لما تخالف القانون بالعكس هتقول عليك مش محترم وفوضوي.. ده مش دور حكومة ياجماعة ده سلوك شعب.. صدقوني اللي احنا فيه ده من صناعة الشعب المصري.. مش لازم تشوف الضابط علشان تخاف ومتعلمش الغلط خليك انت الضابط والرقيب علي نفسك لانها بلدك وبلد الضابط.. زمان في حي الحلمية الجميل اللي انا اتربيت فيه واللي تحول مع الأسف الي منطقة عشوائية نتيجة للإهمال والفساد كان بتاع اللبن والعيش يضعون الكيس وزجاجة اللبن امام المنازل وكنت تصحي الصبح تفتح الباب وتاخذ الحاجة والحساب كان بالشهر وكان مستحيل حد ياخد حاجة مش بتاعته.. دلوقتي بتقفل باب البيت بعشرة ترابيس وبتبقي خايف من اللصوص.. والنبي ما حدش يقولي ظروف الحياة والغلاء والدنيا صعبة.. كنّا ساعتها أفقر من دلوقتي بس كنّا راضيين وبنخاف ربنا وكان الأب يخاف يدخل مليم حرام علي ولاده علشان ربنا يبارك فيهم ولكن دلوقتي مع الأسف كلمة حرام تكاد تكون انتهت من قاموس حياتنا اليومية.. والعجيب اننا بنتعامل مع الحكومة وكأنها العدو الأكبر لنا وبنستحل نخرب او نسرق اي حاجة ونقول دي أموال حكومة ومش قادرين نصدق ان احنا اصحاب كل حاجة وان الحكومة هي الحارس علي ممتلكات الشعب وبتعمل عملية تنظيم علشان كل واحد ياخذ حقة.. عاوز أقول ان احنا لو فضلنا علي الحال ده وجبنا مليون حكومة جديدة مفيش حاجة هتتغير لان احنا مش عاوزين نتغير وبندور علي السهل.. حد يقولي ليه لما العراقيين جم مصر اشتغلوا وكسبو.. وليه لما السوريين جم مصر اشتغلوا وكسبوا وشغلوا المصريين عندهم واكتشفنا ان احنا مفيش عندنا بطالة وان كل اللي عندنا فشخرة كدابة ورافعين شعار حسنة وانا سيدك علشان احنا اتعودنا ناخد فلوس من غير ما نشتغل او ان كلنا عاوزين نبقي رجال اعمال وأغنياء من غير ما ندفع الثمن .. عارفين الأجانب بينجحوا عندنا واحنا بنفشل ليه.. علشان هما عندهم ضمير في الشغل وامانة وفكر مش عايشين علي الفهلوة والنصب والاتكالية.. مش عيب ان احنا نعترف بالغلط ولكن العيب ان احنا نبقي شايفين الغلط ونواصل السلوكيات الخاطئة.. سهل اوي ان احنا نتغير ونحسن سلوكياتنا بشرط يبقي عندنا إرادة حقيقة ونصدق ان اللي بنعمله غلط ولا يتناسب وقيمة وحجم مصر.. بنفرح اوي لما نتكلم علي البلاد المتقدمة ومش بنزعل علي حال بلدنا رغم ان احنا اللي وصلناها لهذا المستوي.. يارب يكون العام الجديد فتحة خير علينا ونبدأ نغير من أنفسنا.. مش عيب لما نكون فقراء بس عيب لما نكون دولة مش نظيفة وشعبها همجي.. خلوا بالكم احنا نقدر نعمل حاجات كتير بس محتاجين نرجع الضمير المفقود اللي خرج فجأة من البيت المصري ومازلنا نبحث عنه.. مفيش اسهل من النظام والنظافة والاحترام بس بشرط نكون احنا عاوزين ده.. لو نجحنا في احترام حقوق بَعضُنَا البعض ولو علمنا الجيل الجديد الأصول والعادات والقيم المصرية الحقيقة سنتحول في سنوات قليلة وننضم لطابور الدول الكبري التي احترمتها شعوبها فاحترمها العالم.