حسن شاكوش وعمر كمال يعترفان بسرقة لحن أغنية «بنت الجيران»

قدم حسن شاكوش وعمر كمال، إعتذارا للملحن محمد مدين والفنان محمد حماقي، عن استخدامهم لحن أغنية "حاجة مستخبية" في مهرجان "بنت الجيران".
وبث عمر كمال، مقطع فيديو عبر صفحته على "فيس بوك" قال فيه: نشكر الملحن الكبير مدين ونتأسف له لو هو زعلان مننا، بس هو مش زعلان مننا، الفيديو ده رسالة اعتذار مني ومن أخويا حسن شاكوش لمدين ومحمد حماقي، الأغنية عاملة 65 مليون بفضل ربنا، ثم الناس، ثم طبعا اللحن بتاعك اللي هو لحن أغنية "حاجة مستخبية".
وأضاف عمر: "إحنا عملنا فكرة بنقلش أو بنهزر مع الناس حاجة خفيفة، الحمد لله ربنا كرمنا فيها ونجحت، وبعد كده كان لازم الحق يرجع لأصحابه".
وأوضح حسن شاكوش: "أنا بقول لك يا مدين الأغنية نجحت بلحنك، وإحنا طبعا لازم نديك حقك ودي أغنية حاجة مستخبية لأخونا النجم محمد حماقي، والفترة الجاية إن شاء الله هنطور بشكل جديد ومختلف من المهرجان، وأنت يا مدين اللي هتعمل لنا الحاجة دي وهناخد منك لحنها".
وكتب الملحن مدين عبر حساب الشخصي "فيس بوك" على فيديو اعتذار عمر كمال وحسن شاكوش على سرقة اللحن، وكتب تعليق على الفيديو: "وانا مش زعلان منكم ولا حاجة و كلامكم ده يأكد أنكم فنانين بجد وبتحترموا وبتقدروا حقوق الناس ومستنيكم تنوروني في أي وقت".