إحم إحم

ألف ليلة وليلة 2016

بلغني أيها الملك السعيد ذو العقل الرشيد أن المصريين قضوا ليلتهم علي أحر من جمر النار في انتظار اعلان جوائز الاوسكار
عاد شهريار من رحلة صيد طويلة انقطع خلالها عن العالم كله ولما عاد طلب من شهرزاد أن تحكي له ماقد جري وكان في بلاد المصريين الفرسان، فجلست بين يديه وبدأت تحكي له بعد أن صلي علي النبي العدنان:-
- بلغني أيها الملك السعيد ذو العقل الرشيد أن المصريين قضوا ليلتهم علي أحر من جمر النار في انتظار اعلان جوائز الاوسكار.
- إيه الاوسكار ده يكونش زي البوكر والقمار؟
- ههههههه الله يحظك يامولاي شهريار،هم لاقيين ياكلوا لما يلعبوا بوكر وقمار،الأوسكار ديه مسابقة عالمية لأفلام السينما الذكية،قال بوكر وقمار قال ،سلامة عقلك يامولاي،انت كبرت في السن ولايكونش برج من عقلك طار؟
- قولي كلام منطقي يا شهرزاد وبلاش مبالغة وكلام معاد،عايزة تقنعيني ياشقية إن المصريين مش مهتمين بانهيار الجنيه أمام الدولار والأسعار اللي بقت نار ولا فارق معاهم زيت ولا سولار،وقضوا ليلتهم فرفشة وهزار منتظرين نتائج الاوسكار؟.
- زي مابقولك كده،أصلك مش متخيل المصريين،أنا عارفة طبعهم،الذوق كله عندهم والفن حاجة في دمهم،وكل واحد فيهم ينفع يكون أحسن مخرج وكمان صاحب أحسن سيناريو وفي التمثيل أحسن من ليوناردو دي كابريو.
- مين دي كابريو ده يكونش زي عنترة بن شداد ولا الكونت دي مونت كريستو؟
- لا يامولاي ده الواد الحليوة بتاع تايتانك اللي فاز بالاوسكار بعد سنين طويلة من الانتظار،ياه علي فرحة المصريين،فرحة نستهم مهازل البرلمان والحذاء اللي طار.
- كلام إيه ده ياشهرزاد،حذاء مين اللي طار وياتري نزل علي دماغ حد من الفاسدين ولا علي حد جاب لأهله العار،وفين راحت الهيبة والوقار؟
- هو أنا ماقولتلكش يامولاي؟مش سي توفيق بن عكاشة عزم السفير الاسرائيلي علي كنافة وبغاشة وعلشان كده مصطفي بكري وكمال احمد عملوا معاه الجلاشة؟
- طب وإيه مبررات ابن عكاشة؟
- توفيق عكاشة يامولاي بيقول إنه بحتة كنافة وبغاشة قدر ياخد كل أسرار الموساد والسي آي إيه علي فلاشة.
- طيب والزند سكتله ياشهرزاد؟
- الزند مشغول بيعمل قانون جديد يلبس الحديد لكل أب وام خلفوا إرهابي عربيد.
- أهي دي الأفكار الخالدة ياريت يحبس الوالد والوالدة ومعاهم الخال والخالة.
- ودول ذنبهم إيه بس يامولاي؟
- مش بيقولوا في مصر الخال والد والخالة والدة خلاص يبقي يتحبسوا مع الأب والأم في زنزانة واحدة؟ هو ده العقل والانصاف ياربة الصون والعفاف.
- ياسلام علي مخك البرلالنت يا سيد الزمان والمكان،لو يعرف المصريين أفكارك دي يمسكوك فورا رياسة البرلمان.
- انتي عارفة أنا اعتزلت السياسة من زمان ومقضيها صيد ثعالب وغزلان،السياسة وجعتلي قلبي خليها في داهية تغور،سيبك منها وقوليلي أخبار جمهور الزمالك المقهور.
- خلاص هانت يامولاي الزمالك ودع أصحاب الشعر الكنيش وجاب من اسكتلندا مدرب اسمه إليكس ماكليش.
- هههههههه ماكليش؟ياخوفي بعد ماتشين تلاتة نكتشف أنه «مالكيش» فيه!
- لا يامولاي ده مدرب مشهور ومفيش مباراة إلا وخرج منها منصور.
- فكرتيني صحيح إيه أخبار ميدو ومرتضي منصور؟
- إهيء إهيء إهيء أبوس إيدك يامولاي هاتلي السياف مسرور وبلاش سيرة ميدو ومرتضي منصور.
(فضحك شهريار بهستريا واستلقي علي قفاه فاتحا فاه لدرجة أن اللعاب منه سال وانقطع البث والإرسال).