اهىء,,, اهىء ... اهؤ...!!!

بقلم نادية حسن
مقال اسبوعي في المواجهة بين الرجل والمرأة
زمان علمونا ان الكذب عكس الصدق وان الصدق منجى وابعد عن الكذب عشان الكذب ملوش رجلين وحتى لومشى الف كيلو اكيد هايقع ..!!! لكن بصراحه انا كنت شايفه غير كده خالص ..!!! كنت بشوفه منجى وبيفتح ابواب كتيره اوى وانه عنده مليون رجل ...وبصراحه كده لاقيت ان الناس مش بتحب الا الشخصيه الغير عاديه اما الشخصيات السويه فلا تلفت انتباه احد,,,وانا لا احب ان اكون مهمشه بل اعشق بؤرة الاحداث وبكل صراحه بمجرد ما ابدأ الكذبه الاولى لا اجد اى صعوبه لا فى التانيه ولا المليون..!!! المهم اتخرجت من الجامعه واتعينت فى بنك بواسطه انكل زهير جوز خالتى ومن اول يوم عرفت ان حجمى فى البنك ده مش هيزيد عن طولى بالمناسبه انا انتمى للقامه القصيره...ولايوجد ما يميزنى عن اى حد غير انى لامؤاخذه يعنى زى ما بيقولوا حمارة شغل... اه نسيت اقولكم انى من طنطا ومعرفش ليه اهل مصر مهما لبسنا شبهم وتكلمنا زيهم بيعرفوا اننا مش قاهريين..!!!
وفى يوم سألت زميله لى انتى عرفتى منين انى مش من القاهره لقيتها بتشاور علىجزمتى البيضاء ... ولما سألتها ودى كمان فيها ايه قالت لى اصل محدش بيلبس جزم بيضاء الصبح غير اهل البلاد؟؟؟ وبعد سته اشهر من الشغل المتفانى لازلت مهمشه فى هذا البنك وهنا قررت ان اعود لموهبتى فى تغيير الاحداث وسرد حكايات وهمية اصل بصراحة كلمة الكذب دى تقيله...!!! المهم انى نزلت تانى يوم الشغل وكآبة الدنيا على وجهى بعد ارتدائى لفستان اسود ولميت شعرى بشريط اسود ووضعت قلب بصله فى منديل لزوم نزول الدموع ...ودخلت عليهم المكتب دون ان انظر لاحد وكل علامات الحزن على وجهى واقتربوا منى واحد تلو الاخرى ايه مالك؟؟؟
اهىء اهىء ...والدى مستحملش فراق والدتى اللى توفيت من سته اشهر وخلاص بقيت لوحدى ...اهىء اهىء اهىء..!!!
لاحول ولاقوة الا بالله واصبح الكل يهتم بى...الا انه سرعان ما هدأت القصة وقررت ان اجبس يدى,,!!ولاداعى لسؤالى ازاى جبست ايدى 20 جنيه يجبسوا اى حاجه!!
وبمجرد مادخلت جه الاستاذ صلاح ليطمئن على (اخيرآ نطق)
ابدا اهىء اهىء اصل جوزى ضربنى رغم انى بخدمه خدمة العبد للسيد اهىء اهىء
لا سلامتك الف سلامه هابقى اطمن عليكى..
بعد شهر جبست رجلى اهىء اهىء منه لله جوزى ... واقترب الاستاذ صلاح اكتر واكتر وازاى انه كان يتمنى اقابله من زمان وانه بيكره جوزى اللى مش مقدر قيمتى وانه قلبه بتقطع عشانى,, وبصراحه انا كمان كنت معجبه به اوى واتمنى انه يكون زوجى لكن اعمل ايه فى الكذبه اللى اخترعتها,,,,,,,
بعد اسبوع
صلاح انا اتطلقت خلاص ممكن نرتبط ببعض,,!!!
ابتعد عنى الكل لانى اصبحت حاملة لقب مطلقه وصمه العار ولا اعرف لماذا توقف صلاح عن حواراته معى ؟؟؟ مع نقلى لفرع البنك فى اسكندريه
بعد شهر من وجودى فى البنك ارتديت فستان اسود اصل ما ما ماتت حزنا على بابا اهىء اهىء اهىء....