لن تسمح أمريكا وحلفاؤها بقيام ديمقراطية حقيقية في البلاد العربية «نعوم تشومسكي» الضربات الإرهابية الأخيرة في العريش وتونس، وإسقاط الطائرة الروسية فوق سوريا، بتعكس نوبة من نوبات الهستيريا، اللي أصابت الإرهاب واللي عملوه وكبروه، بعد الهزايم الكبيرة اللي طالتهم علي ايدين الطيران الروسي والجيش الوطني السوري وحلفاؤه، والمؤكد دلوقت، ان مجزرة باريس والانفجار اللي هز الضاحية الجنوبية لبيروت، كشفوا للعالم كله ان الإرهاب مالوش لادين ولا وطن، وان طباخ السم ح يدوقه، وان اللي يزرع الريح يحصد الزوابع، وبعد المجزرة الباريسية والانفجار البيروتي، وقف بوتين في مؤتمر العشرين، وقال ان فيه اربعين دولة ورا الإرهاب، وان من بينهم بعض الدول المشاركة في المؤتمر، وعرض مجموعة من صور الأقمار الصناعية لشاحنات تركية بتنقل البترول المسروق لحساب داعش واخواتها، وابتدت التشققات تصيب الجبهة الداعمة للإرهاب، وانضمت فرنسا بحاملة طائراتها «شارل ديجول» للقوي اللي بتحارب الإرهاب وابتدت تنسق مع روسياوسوريا، وأعلنت بريطانيا ان الأولوية عندها هي الحرب علي الإرهاب، وارتبكت حسابات أمريكا وحلفاؤها اللي بيدعموا الإرهاب واللي لسه مصرين علي إسقاط سوريا، وارتكبت تركيا حماقة إسقاط الطائرة الروسية، واعلن بوتين ان دي طعنة في الضهر، وان عواقبها ح تكون وخيمة، وجري اردوغان واوغلو علي مجلس الأمن وعلي حلف الناتو يستنجدوا بيهم علي طريقة: ضربني وبكي..وسبقني واشتكي، وربنا يستر في اللي جاي. والملاحظة اللي فرضت نفسها علي كل اللي تابعوا مجزرة باريس أو انفجار الضاحية: هي سرعة التصدي والكشف عن مرتكبي المجزرة والانفجار. في باريس قررت الحكومة التصدي والمواجهة الحاسمة للإرهابيين في ليلتها، وان ما يطلعش عليهم نهار إلا ويكونوا اتصفوا، وقبل ما يبرد دم الضحايا، كان الأمن محدد مين دول ؟ ومين وراهم ؟، وبعد كام يوم كان محدد الشقة اللي هربان فيها بعض الشركاء في الجريمة، وبالتنسيق مع الجيران، هاجم الشقة وصفي المجرمين، وتمت العملية من أولها لآخرها، مع تغطية إعلامية رفيعة المستوي، اعتمدت علي البيانات الرسمية الصادقة والدقيقة، وابتعدت عن الإثارة الصحفية الرخيصة اللي ممكن تثير الهلع عند المواطنين. وفي الضاحية الجنوبية لبيروت، ما عداش يومين تلاتة، إلا وقوي الأمن الداخلي ومخابرات الجيش اللبناني واصلين لمين ارتكب الجريمة، ومين وراه، وقدروا بسرعة يوصلوا لهم. ومع الأداء المهني الرفيع للأمن والإعلام في باريسوبيروت، حسيت - انا واللي زيي - بغصة في الحلق من الأداء الفاشل للأمن والإعلام في بلدنا في مواجهة الإرهاب، لحد النهاردة ما عرفناش مين اللي ورا الضربات الإرهابية المتتالية اللي طالت الجيش والشرطة والمواطنين الأبرياء، علي طول وعرض البلاد، ولحد النهاردة، ما زالت قوي الأمن بتضرب العاطل ع الباطل بشكل عشوائي، ومتصورة ان استتباب الأمن مش ح يتحقق إلا بالإعتداء علي الحقوق والحريات !، ومع ذلك يطلع رئيس الدولة في كل مناسبة يحيي الداخلية والشرطة ويشيد بأدائهم !!!، ولحد النهاردة قاعدين نتكلم ليل نهار عن تجفيف منابع الإرهاب، واحنا سايبين الفكر التكفيري يكبر ويتغلغل، من خلال إعلامنا اللي بيضللنا، ومنظومتنا التعليمية اللي بتجهّلنا!، وسايبين - كمان - الظلم الاجتماعي يستشري ويخلق بيئة حاضنة للإرهاب. يا اهل الله ياللي فوق، ربنا يجلي بصركو وبصيرتكو، شوفوا الخلل جاي منين وعالجوه بذمة، ده اللي ما يشوفش م الغربال يبقي أعمي، واللي يزرع الريح يحصد الزوابع. في انتظار الخريف في مهرجان السينما الأخير في القاهرة، فاز الفيلم السوري في انتظار الخريف بجائزة الفيلم، وانا - للأسف الشديد - ما شفتش الفيلم، بس سعدني حظي وشفت حوار لمخرج الفيلم علي إحدي الشاشات التليفزيونية العربية، والمخرج الشاب اسمه جود سعيد، وبدأ تصوير الفيلم مع الضربة الأمريكيةلسوريا سنة 2013، وزي ما فهمت من كلامه، الفيلم بيحكي عن اللي بيحصل في قريتين سوريتين متجاورتين، بيستعدوا لإقامة مباراة في الكرة الطايرة بين فريقين من القريتين، في ظل العدوان الإرهابي اللي بتتعرض له سوريا، وزي ما فهمت من كلامه - برضه - بتختلط في الفيلم الدمعة والبسمة من خلال حكايات صغيرة لأهالي القريتين، بتعكس قدرة ثقافة الحياه والحب والفرح علي هزيمة ثقافة الموت والكراهية والخراب. والشيء اللي وجعني - زي ما وجع جود سعيد - انه وصلت له دعوة رسمية لحضور المهرجان مع فيلمه، ورفضت الحكومة المصرية منحه التأشيرة، وده خلي بطلة الفيلم الفنانة سلاف فواخرجي تتعاطف معاه وترفض حضور المهرجان برغم حصولها علي التأشيرة، واتعرض الفيلم في المهرجان، وفاز بالجائزة، وتسلمتها - عنه - منتجة الفيلم. واللي اعرفه، واللي بتعلنه الحكومة والرئيس في كل مناسبة، اننا مع الشعب السوري في محنته، واننا مع الدولة السورية وجيشها الوطني، والمؤكد ان هذا المخرج الشاب اللي عايش في سوريا، واللي أخرج فيلمه في ظل الحرب والضرب والعدوان، مش ممكن يكون إرهابي، ومش ممكن يكون حضوره للمهرجان بيشكل أي تهديد للأمن المصري، طب ليه بقي رفضت مصر منحه تأشيرة لدخولها ؟! بصراحة.. انا شايف في الواقعة دي دليل إضافي علي الخيبة الأمنية اللي احنا عايشين فيها، وتأكيد إضافي لكل ما يطالب به الشرفاء من أبناء هذه الأمة من أول الثورة، لازم نعيد النظر في الداخلية وسياساتها الأمنية وكفاءتها المهنية، وانا واثق ان في الداخلية نفسها، العديد من القيادات الشرطية السابقة والشابة، اللي عندها دراسات علمية وخطط تفصيلية، لتطوير المؤسسة الأمنية، وآن الأوان بقي لوضع هذه الدراسات والخطط موقع التطبيق، عشان نطلع م الخيبة القوية اللي مغرقانا. فيروز.. جارة القمر من أيام احتفل لبنان بعيد الاستقلال (22 نوفمبر 1943)، وقبله بيوم (يوم 21 نوفمبر) كان لبنان والعالم العربي بيحتفلوا بعيد ميلاد فيروز الثمانين، وف زماننا ما كانش ممكن نقول لبنان من غير ما نفتكر فيروز، وما كانش ممكن نقول فيروز من غير ما نفكر في لبنان، وانا وولاد جيلي من المبدعين (جيل الستينيات) انفتحت قلوبنا وعقولنا علي ثقافتنا الوطنية والعربية والانسانية، وكان للأدب والغناء اللبنانيين مكانة خاصة عندنا، وزي ما صوت ام كلثوم جمع الأمة العربية علي حب مصر، كان صوت فيروز بيجمعنا علي عشق لبنان. والحقيقة اللي ما حدش يقدر ينكرها، ان لبنان الصغير جغرافيا (10,452 كيلومتر مربع) كان طول عمره كبير تاريخيا بفضل أبنائه المبدعين في كل العصور، من أول قدموس الفينيقي اللي اخترع حرف الهجاء، لغاية آخر سلسال الرحبانية (إلياس وزياد وأسامة)، وانا وولاد جيلي من المبدعين، عشقنا فيروز والرحبانية من أول ما اذاعت لها الإذاعة المصرية غنوة «يابا لالالا» و«وقف يا أسمر في إلك عندي كلام»، والصورة الغنائية «الراعي الأسمر»، وابتدينا ندور علي أغانيها القديمة مع حنان، أو أغانيها المتجددة بعد كده، وكنت أنا واصدقاء العمر نبيل تاج ومحيي اللباد (رحمه الله) من دراويشها، وكان شيخ طريقتنا في عشقها الفنان الجميل الراحل بهجت عثمان (بهاجيجو)، اللي كان بيعرفها وبيعرف الرحبانية، وبيروح يزورهم في لبنان، ويرجع لنا بكل جديد من تسجيلاتهم. ولما سمعنا غنوتها : «نحنا والقمر جيران.. بيته خلف تلالنا.. بيطلع من قبالنا.. يجمع الألحان، نحنا والقمر جيران.. لما طل وزارنا.. ع قناطر دارنا.. رشرش المرجان»، ما بقيناش عارفين هيه بتغني عن نفسها وعن أهل ضيعتها، ولا بتغني عن لبنان كله، ولا عن كل الحالمين بعالم أفضل. وانا اعتقد ان أهم إضافة للغناء العربي، بعد إبداعات الآباء المؤسسين للغناء المصري وأبناؤهم من المبدعين الكبار، كانت الإضافة اللي قدمها الرحبانية بصوت فيروز (قيثارة السماء زي ما سماها كامل الشناوي). ومن خلال ألحانهم البديعة، غنت فيروز للعواصم والبلدان العربية، من دمشق الشام، لمكة، لمصر، للقدس وشوارعها العتيقة، ومع هزيمة الأنظمة العربية عسكريا سنة 1967، أشعلت في قلوب العرب روح المقاومة وغنينا معها : الغضب الساطع آت. وخلال الحرب الأهلية اللبنانية (1975 - 1990) كان صوت فيروز العابر للطوائف والطبقات والفصائل المتناحرة، بينور للبنانيين في المنافي أو في ميادين القتل علي الهوية، طريق الحق والحرية: ارجعي يا بيروت.. ترجع الأيام. ومن خلال ألحان الرحبانية الرائعة، جربت فيروز بصوتها العبقري العديد من الصيغ الغنائية، من الأغنيات الراقصة (في البدايات)، للموشحات المشرقية والأندلسية، للمواويل والدبكة الشعبية، للتراتيل الدينية، لما يشبه صيغة الأوراتوريو عند الأوروبيين في قصيدة النبي لجبران خليل جبران. ومن خلال إبداعات الرحابنة أعادت فيروز للمسرح الغنائي جلاله القديم، في مسرحيات زي احجار الصوان، وفخر الدين، وزنوبيا، وجسر القمر، والليل والقنديل، والشخص، والمحطة، ولولو، وبترا، وناس من ورق، وصح النوم، وهالة والملك وغيرها وغيرها، وأثرت السينما بأفلامها الغنائية زي «سفر برلك»، و»بنت الحارس»، «وبياع الخواتم». وسنة 1961 كان صوت فيروز العذب هوه اللي بيحضن عذاباتنا وأشواقنا انا وولاد جيلي، ولقيتني باكتب قصيدة من وحي عشقي لصوتها. فيروز فيروز.. أيا فيروز يا جزيرة المرجان والفيروز لو إن بحر الشوق له طيرة لأكون أنا.. ..طير بحر أشواقي اضرب جناح في الموج.. ..في موج الشوق وجناح يلالي.. في العلالي.. .. فوق
الليل علي مْداين حزينة انفرش الليل.. بضافر قسوته.. ف قلبي هبش نفَسي اتْكرش وكل شيء في الدنيا كش حتي الوليد.. .. في بطن أمه بينكمش ومن بعيد.. صوتك ضفيرة حرير يفرش سلالم فوق حيطان البير والبير قرار أسود .. وانا طالع طالع علي سلم حرير طالع والريح صرخة خوف لكن مانيش سامع غير صرخة الفجر الوليد النور في صوتك الطيب.. يا بنت النور
جدي اتقتل.. إلريح بلع صوته كرباج افندينا سقاه موتُه أختي وياما ليّا من إخوات فوق جسمها.. ..قطر المقاساه فات عيل.. وعيل.. نزلوا كالأموات أموات لكين.. .. ببطون بتستنظر وقلوب بتتعور وعيون بتصرخ صرخة مقلوبة (وسعيد أبو مهران) بيتعذب ناب العذاب فايت في أعصابه قاسي كتير لاكين إيه نابه الأرض لسه بتطرح الحنضل قلبه بيصرخ صرخة مقلوبة وانتي كإنك يا فراشة منقطة بهمي بتدُوري وسط الريح وبتلمي كل الصريخ اللي اتقتل في الريح وتلوِّنيه.. .. بعيون بتعرف معنة التباريح يا حنَيِّنه يا ام الغنا تفاريح
كما عروسة البحر تغسل شعرها في الضي وتنطوره في الريح وتتبسِّم كما عروسة البحر أحلامنا لما بنسمع صوتك الطيب بيتنسِّم صوتك يا بنت الناس .. ضفيرة حرير يفرش سلالم فوق حيطان البير والبير قرار اسود وانا طالع طالع علي سلم حرير طالع