قصة قصيرة‏:‏

مشوار قصير

اقفل الأغاني وشغل الشريط ده كان سائق الباص مستفزا‏,‏ له وجه كالح‏,‏ نشرت الحبوب المهدئة التي يتناولها خطوطا سوداء غائرة اسفل عينيه‏,‏ ترنح الباص علي الاسفلت بينما السائق ينفخ بغيظ‏:‏
‏-‏ -‏ اللي مش عاجبه ينزل يا جدعان
‏-‏ ننزل إزاي في نص الطريق
‏-‏ هو كده ركبتوا ليه من البداية
‏-‏ ما احنا قولنا لك بطل الهباب اللي شغال دا‏.‏
‏-‏ ياجدعان دا مزاجي
‏-‏ اتحشت في مزاجك لو جايب العربية لنفسك ما تحملش ركاب‏.‏
‏-‏ يووه
وداس السائق الغضوب علي المكابح‏,‏ فارتج الركاب الجالسون علي الكراسي‏,‏ وانزاح بعض الواقفين في الطرقة‏,‏ مما جعل الجميع يشترك في المناوشة التي كانت دائرة فقط بين ثلاثة من الشباب ذوي اللحي والسائق منذ كانت السيارة تعبئ ركابها علي المحطة‏..‏
‏-‏ جري ايه يا اسطي‏,‏ ما تفوق لروحك احنا معانا حريم وأطفال
‏-‏ انت ياعم الحاج افوق ايه؟ شايفني شارب
‏-‏ ايوه فوق واحترم نفسك‏,‏ ورد كويس
‏-‏ بتقول ارد أيه؟
واطلق السائق من منخريه صوتا قبيحا
‏-‏ لا دا انت زودتها قوي‏,‏ وحياة أمك لموديك المركز
‏-‏ وحياة ام مين يا ابن ال‏..‏
‏-‏ انت ياله فوق فيه حريم ياحمار
كل لحظة كان يدخل طرف جديد في المشكلة‏..‏ الاغاني في مسجل السيارة مازالت تتردد بصوت رفعه السائق كثيرا حتي غطي علي الضجيج الهستيري لبعض الركاب‏,‏ والمحصل يلف حول الركاب الواقفين وهو يتلوي كالثعبان‏,‏ استدار السائق بعنف إلي الجلوس‏,‏ واطلق نفس الصوت القبيح من منخريه معلقا أن هذا الصوت من أجل الحريم هذه المرة‏.‏
‏-‏ الله يخرب بيت الهباب اللي بتشربوه‏.‏
‏-‏ يا جماعة سيبوه هما السواقين كلهم اخلاقهم زفت
ثم توجهت المرأة الاربعينية التي نطقت بالجملة الأخيرة إلي السائق
‏-‏ طب سوق يا ابني وتوكل علي الله الراجل محجوز في المستشفي
هدأت العربة قليلا والمحصل يتصنع الجد وهو يبتسم بمكر‏:‏
‏-‏ ياعم حمدي سوق وما تسألش في حد‏.‏
انطلق السائق ببطء وقد هدأ صوت المسجل‏,‏ تكلم السائق مع راكبي الكرسي الأمامي بجواره‏,‏ بصوت تعمد ان يسمعه الجميع‏:‏
‏-‏ كل يوم نفس الشغلانه دي‏,‏ يجيلك عيل يقولك شغل لي قرآن ومش عارف إيه؟
‏-‏ عيل ايه يا بتاع انت‏.‏
التفت السائق إلي الشاب الملتحي‏:‏
‏-‏ حد وجهلك كلام انا مشغل قرآن من الصبح
تم مكملا حديثه إلي جار الركوب‏:‏
‏-‏ شفت‏,‏ شغلانه كلها قرف‏.‏
بينما العربة تغلي في الداخل وبعضهم يهدئون الشاب‏,‏ والرجل الذي تلقي السباب ومازال فائرا‏.‏
‏-‏ طب سيبوه يسوق واستحملوا لما نوصل
‏-‏ انا لو عاوز ابهدله هاخد رقم العربية ووديها المركز
‏-‏ التفت الرجل الذي تبادل السباب مع السائق منذ قليل إلي الشباب‏.‏
‏-‏ لو رجاله ما تعتقوهش وانا معاكم
‏-‏ خلاص يا رجالة ربنا يسهل ونوصل‏,‏ استحملوا
‏-‏ ياحاجة الأشكال دي ما يتسكتش عليها
‏-‏ ابن مين في البلد السواق ده؟
‏-‏ هو اللي زي دا يتعرف له اب‏.‏
يا جماعة دا ابن مروان ابو أحمد‏.‏
كان السائق يتابع كل كلمة‏,‏ فداس المكابح مرة اخري فارتج الركاب
‏-‏ مين اللي ما يتعرفش له اب يا ابن ال‏...‏
‏-‏ وله انت نسيت نفسك ولا ايه يا‏...‏
‏-‏ لا دا العمل زاد عن حده‏.‏
تلقي السائق صفعة علي جانب وجهه من الرجل‏,‏ هبط من كرسي القيادة حاملا في يده قضيبا من الحديد‏,‏ لف حول السيارة وفتح باب الركاب لكن صريخ النساء واجهه وبعض الايادي طوقته بقوة فعجز عن التقدم‏,‏ لم يكف عن السباب هو والرجل الذي ناوله كفا علي وجهه منذ قليل‏,‏ ودفع المحصل خارج الباب‏,‏ كانت سيارة ميكروباص من البلدة قادمة من المدينة‏,‏ توقفت وهبط سائقها صاحب الوجه الأقل حدة من وجه سائق الباص‏:‏
‏-‏ خير يا اخوانا فيه ايه؟
سارع سائق الباص إلي زميله كأنما يستميله في محاكمة‏:‏
‏-‏ مشغل المسجل‏,‏ واحد يقولك مش عارف إيه‏,‏ لأ وواحد يشتم‏.‏
توجه سائق الميكروباص إلي الركاب‏:‏
‏-‏ يا جماعة نستحمل بعضنا‏,‏ دا المشوار كله نص ساعة
بعض العجائز والنساء دعمن كلام سائق الميكروباص بهز الرقاب وتكرار نفس الكلام لكن اصواتا اخري علت بالاحتجاج‏:‏
‏-‏ الموضوع انه قل ادبه علي ناس محترمه‏.‏
قال سائق الميكروباص وهو بين الجد والسخرية‏:‏
‏-‏ كلنا محترمين‏,‏ اطلع يا حمدي وهدي العمل‏.‏
وضربه بمرح علي مؤخرة وأسه صعد السائق وشغل الباص مرة اخري وهو يهدد‏:‏
‏-‏ اللي ها يستفزني مش هيشوف طيب‏.‏
صعد المحصل هو الآخر وقد اوسع له مكانا في الجانب بعيدا عن المتعاركين‏,‏ خطت السيارة بقوة وهي تحمل في احشائها مزيجا متناقضا من روائح العرق‏,‏ والملابس‏,‏ والاجساد‏,‏ والافواه‏,‏ والقلوب‏,‏ غير ان صوتا اخر اشعل المواجهة من جديد‏:‏
‏-‏ ما تهدي السرعة يا اسطي وفوق للطريق‏,‏ انت مركب فيران معاك‏.‏
‏-‏ انا قلت اللي مش عاجبه ينزل‏.‏
‏-‏ الواد دا ما عدش يركب عربية أو حد يركب معاه‏,‏ احنا نأخده من قفاه نسلمه للمركز واحنا معديين ناحيته‏.‏
‏-‏ من قفاه؟‏!‏ انت مساك حرامي وللا أيه؟‏!‏ وضابط ايه اللي هيأدبني‏.‏
‏-‏ يا جماعة استهدوا بالله احنا ما صدقنا‏.‏
‏-‏ منتش شايفة ياحاجة‏,‏ خلصنا من موضوع المسجل جينا للسواقة واحنا علي طريق ما يعلم به إلا ربنا‏.‏
كان الطريق من القرية إلي المدينة المجاورة خمسة كيلومترات بعرض ثمانية امتار بها مهاوي وكسورات‏,‏ اما الطريق الترابي الداعم إلي الجانب الأيمن في طريق الذهاب فقد هوي معظمه في مجري الماء مما يهدد بخطر الحيدة عن الاسفلت‏,‏ والجانب الايسر ضيق تنحدر الاراضي الزراعية اسفله بقليل مما يجبر الجميع علي التزام الرصيف رغم عيوبه التي تجعل السيارة تترنح اذا ما زود السائق من السرعة‏.‏
‏-‏ انت يابني قولنا لك هدي شويه فيه واحدة حامل وعيال صغيرة‏.‏
‏-‏ ياجدعان محدش يوجه لي كلام
‏-‏ امال نكلم مين؟ هو عفريت اللي سايق‏.‏
‏-‏ خلاص يا رجالة‏,‏ ما تهز اوش نفسكوا معاه‏.‏
‏-‏ بتقولي ايه يا وليه؟‏!‏
ورفعت فتاة كانت تجلس في الكرسي الخلفي من نبرة احتجاجها‏:‏
‏-‏ ما يصحش اللي بيحصل ده‏.‏
تخفز الشباب والرجال مرة أخري‏,‏ إلا ان امرأة عجوز نظرت للفتاة‏,‏ ثم رمت نظرة تحذير للجميع‏:‏
‏-‏ احنا ندعي ربنا نوصل بالسلامة ونخلص اللي ورانا‏.‏
‏-‏ الكلام دا خلاص انتهي‏,‏ احنا بقينا في عصر جديد‏.‏
‏-‏ عصر اية ومغرب ايه ادي الثورة اللي خلت الاشكال دي تعلي صوتها‏.‏
التفت السائق مرة أخري‏.‏
‏-‏ انا قلت ماحدش يوجه لي كلام‏.‏
ياجماعة سيبوه يسوق‏,‏ هما طول عمرهم كده‏,‏ ايش جاب الثورة لدول
‏-‏ يعني يموتنا ونقول سيبوه يسوق‏.‏
‏-‏ يعني مفيش حد عاقل يهدي الدنيا‏.‏
‏-‏ ياحاجة محدش يقبل باللي يحصل دا‏.‏
‏-‏ ربنا يستر‏.‏
كان السائق يقف فور ان يشير إليه احدهم علي الطرق الزراعية الجانبية‏,‏ يصعد الراكب الجديد‏,‏ يأمره السائق ان يجد لقدمه مكانا ينحشر فيه‏,‏ تم يدوس علي الوقود فتنطلق السيارة بسرعة وبقدرة قادر تتزحزح الاجساد قليلا فيستقر الراكب الجديد‏,‏ غير ان الاختناق والتوثب تصاعد إلي مداه الأخير‏:‏
‏-‏ لا بقه‏,‏ محدش يستحمل كده‏.‏
‏-‏ انت مش قاعد علي كرسيك يا استاذ خلاص‏.‏
‏-‏ خلاص إزاي احنا عارفين نعقد‏,‏ واللا الحريم اللي واقفين واللي قاعدين‏.‏
رد صوت نسائي‏:‏
‏-‏ هو انتوا خليتوا فيها حريم‏!‏
فالتفت السائق مرة أخري‏.‏
‏-‏ كل واحدة تقعد في بيتها معززة مكرمة‏.‏
‏-‏ انت بتلف لنا تأتي ليه‏,‏ خليك في سواقتك
كانت النساء اللاتي تكلمن قد اطلقن ابتسامة خفيفة لتهدئة الأجواء‏.‏
‏-‏ يا اخويا انتوا بتقولوا كلام وخلاص‏.‏
لكن ابتسامة الاستسلام من النساء والبنات لم تزد الشباب والرجال إلا عنادا اشتعل عندما وقف السائق لينتظر راكبين اشارا إليه من طريق جانبي‏:‏
‏-‏ لابقه دا انت ابن‏..‏
‏-‏ انت بتقول ايه‏,‏ انت كفرت‏!‏
‏-‏ ياجدعان استهدوا بالله‏.‏
‏-‏ فيه عشرين جنيه علي الأرض‏.‏
‏-‏ ياجماعة خلي بالكم‏.‏
‏-‏ ماعدش حاجة ونوصل‏.‏
‏-‏ ابن ال‏..‏ لازم يتربي‏.‏
ومما زاد الأمر عبثا ان الراكبين امتنعا عن الركوب بعد ان شهدا بوادر معركة‏,‏ انطلق السائق الغضوب علي الطريق سريعا‏,‏ ترنح الباص الذي يقوده باليومية علي الطريق الممتلئ بالحفر‏,‏ والمنحدرات الخفيفة‏,‏ لعبت الكيوف التي يتناولها السائق في رأسه فكان يري الطريق رؤية مشوش‏,‏ كانت بوادر معركة اشد علي وشك بينما السائق يلتهمه الغضب والخوف في نفس الوقت‏,‏ من الناحية المقابلة وعلي بعد قليل اتت سيارة ميكروباص وامام الباص عربة كارو‏,‏ تفادي السائق عربة الكارو بسرعته لكن لم يتمكن من التحكم في الباص الذي ارتجت احشاؤه بكل الاجساد المزنوقة في الداخل‏,‏ والتي في تطوحها اخلت بتوازنه فمشي علي الجانب الترابي المنحدر‏,‏ علا الصراخ‏,‏ والسباب‏,‏ والفزع في الداخل بينما الباص يهبط سريعا إلي بطن الماء‏.‏
فكري عمر الدقهلية


إضافة تعليق

البيانات مطلوبة

اسمك
*


بريد الالكترونى *
البريد الالكتروني غير صحيح

عنوان التعليق *


تعليق
*