يوميات مواطن مصرى 2 (مباحث يا بيه)

هذه اليوميه كانت فى عهد الرئيس المخلوع منذ حوالى عام
-------------------------------------------------------------------------
النهارده كان يوم عادى زى أى يوم راكب الميكروباص بس كنت بجانب السائق طبعا قاعد ويغلفنى سحابه من دخان السجائر الذى أصبح هو ما يتنفسه البشر أه أصلهم واحنا صغيرين فى المدرسه ضحكوا علينا وقالوا لنا الانسان يتنفس أكسجين ويطرد مقابله ثانى أكسيد الكربون بس الحقيقه اننا أصبحنا نتنفس مركبات الكربون الثقيله بجميع أنواعها اضافه للنيكوتين وتقريبا أختفى الأكسجين من قاموس التنفس زى ما يكون مقرر تم الغاءه من المقررات المدرسيه التى يتم الغائها المهم نرجع للميكروباص واحنا ماشيين فجأه يقول السواق للأخ اللى راكب جانبى ارمى السيجاره بسرعه بعدين لمحت بعينى رجلين يرتدون ملابس ملكيه يوقفون الميكروباص ويدور حديث بينهم وبين صاحب أحد المداخن داخل الميكروباص
-الراجل المباحث : هات بطاقتك
-الراجل اللى بيدخن : ليه
-الراجل المباحث : مباحث أنت بتدخن
-الراجل اللى بيدخن : لا مفيش سجاير
-الراجل المباحث : طب هات بطاقتك أنا مشتبه فيك
-الراجل اللى بيدخن : أوعى بس ياعم مفيش بطاقه
-الراجل المباحث : طب انزل بقى يلا انزل
الكثره تغلب الشجاعه وينزل الرجل من الميكروباص وينادى أحد الركاب على الرجلين معلش سيبوه خلاص بقى كل سنه وأنتم طيبين .
أنا مش عارف ايه دخل كل سنه وأنتم طيبين بالموضوع النهارده لا عيد ولا فيه أى مناسبه بس قلت لنفسى متاخدش فى بالك.
كملنا طريقنا بعدين بأسأل السواق مين دول قالى يابيه دول مباحث التدخين قلتله ايه مباحث التدخين دى قالى ممنوع التدخين فى الميكروباصات.
يا حلاوه أمال أنت بتعمل ايه من الصبح بعدين أنت ماسك سيجاره فى ايدك اهه ده كان ردى على السواق والذى أتحفنى برده الرهيب يا بيه ميقدرش يكلمنى أنا سواق يعنى ممكن ما أقفش له بعدين غرامه التدخين 150 جنيه ولو خبطه بالعربيه هادفع 200 جنيه يبقى ايه أوفرلى بعدين لو حد كلمنى هاقول ما أعرفش أنه مباحث باحسبه راكب عشان لابس ملكى وأى كلام يا باشا
بعدين هما بيعملوا كل ده عشان بياخدوا 10 % من المخالفه هما بيدفعوه مخالفه فوريه 11.5 جنيه ولو مدفعش ياخدوا بطاقته ويعملوا محضر يدبسوها فيه ويبعتوه على القسم بتاع منطقته وممكن يخلوا الغرامه 1000 جنيه ويكتبوا تعدى علينا وكام مشكله كده عشان يزودوا عمولتهم الحكومه ذكيه عملتلهم نسبه علشان يشتغلوا بزمه فافتروا على الناس يعنى يطلعله 3000 جنيه آخر الشهر جنب مرتبه وأهى ماشيه بعدين الزبون كان محترم وده غلط عارف لو كشمله وبلطج معاه مش هيكلمه يعنى قدم بلاغ فى واحد بلطجى فى منطقتك هيقولولك فى القسم معلش هنكلمه ومتضايقش نفسك عشان عارفين انه بلطجى لكن لو قدمت بلاغ فى واحد معروف أنه محترم يجيبوه من قفاه دى مصر يا بيه عمرها ما هتتعدل يا باشا الراجل ده لو كان بيدخن سيجاره حشيش مكانش حد كلمه بس تقول ايه بقى يلا نصيبه كده.
تخيلوا التقويم للناس عندنا بقى كده وأهتمامنا بمكافحه التدخين بقى أقوى من مكافحه المخدرات والحشيش وليه الواحد مننا ميخافش على أخوه من ضرر سيجارته ويزعق معاه لو قال له طفيها ويخاف من مخالفه. القرش بقى هو المتحكم فينا هو كرباجنا.