ورد يناير

الربيع باعت بشاير .. طارح الورد ف يناير والشباب الحر ثاير .. طالب الفجر الجديد
الشباب الحر صوتك
ينجدك من قبل موتك
همه دول خيرك وقوتك
والأمل بيهم يزيد
مين وقف يحمي الشوارع
مين في وقت الشدة سارع
عالكنايس والجوامع
كل ايد تحضنها إيد؟!
مين بجسمه حمي آثارك
وبدماه كتب انتصارك
فوق خيول وجمال تتارك
اللي عايزينا عبيد؟
اعرفي يا مصر قيمتك
وارفضي إعلان هزيمتك
دول ولادك دول كرامتك
موش بتوع سيخ الحديد
اعرفي قيمة شبابك
اللي نزفوا فوق ترابك
واللي كل ما طال غيابك
كل ساعة يموت شهيد
اسمعي بقي نبض قلبك
خللي مطالبهم مطالبك
واللي نهبك واللي سلبك
ما يساويش دمعك أكيد
اللي باع لولاده أرضي
لأ.. مالوش كرامة عندي
يمشي مقهور.. يمشي مرضي
المهم يغور بعيد
مصر شيلي دباباتك
أولي بيهم بواباتك
وانسي بقي كل اللي فاتك
وافرحي.. اليوم ده عيد

قيلت في إذاعة ميدان التحرير قبل تنحي الرئيس السابق