القارىء ايمن غازي يكتب:كلنا شركاء

كل إنسان فى الأرض شريك للسفاحين فى دمكم والنكتة يا بنى إن رؤوس النظام غسلوا أيديهم وقالوا مش إحنا براءة دول بلطجية و أوامر وزير الداخلية بيشتغل من راسه هو بدون أمرنا نكتة لو ما كانت قلوبنا موجوعة بيكم كان يمكن ضحكنا
قبل ما ترحل يا طغيان ممكن تقول لى تار الشهداء دول فى رقبة مين؟
عايزينك تكون مسئول مرة و تقول كلمة صريحة دم ولادنا فى رقبة مين حضرتك؟ مش معقولة فى رقبة العادلى طيب و اللى حكم العادلى فينا يبقى مين؟ أنت ما فوتش على التاريخ و سمعت كلمة للفاروق رضى الله عنه لو أن دابة عثرت بطف الفرات لسألت عنها لما لم تمهد لها الطريق فما بالك بالدماء و الشهداء بذمتك و حبك لمصر و لنا قول لى بتعرف تنام ضميرك مستريح مفيش شهيد منهم زارك فى المنام و قال لك ليه كده ذنبى ايه؟ آسف نسيت إن حتى المنام و الأحلام صعب تدخل جنتك قصرك قلعتك
أنا مش بلومك دم شهداء مصر فى رقابنا كلنا. كلنا شركاء لك و لجلادك و زمرتك كل سلبى قاعد بيشوف قنواتك شركاء كذبتك برضه شريك فى دم ولادنا كل واحد صدق فى لحظة قنوات عميلة قيادتها عينهم واحد من شلتك برضه شريك كل اللى خاف على بيته و أهله و قعد يشوف من تحت السرير أخبار ولادنا عبر الشاشات برضه شريك وانا شريك وكل مصرى عربى غربى حر ساكت وشاف جرايمك برضه شريك
كلنا شركاء فى دم ورد بينا أتقطف ولا ولد من بين أيدينا حتى أتخطف مين كان بيسمع آهه من سالى مجدى لحظة ما قابلت ربنا. مفيش وصية للشهيدة وهى بين ايد ربنا و الله يا سالى معرف ديانتك مسيحية يمكن وممكن تكونى مسلمة لكن لو كنتوا سمعتوا منها وصية كانت أكيد تصرخ اخرج كفاية هو كرسى مصر لازم يا عينى يعوم فى دمى و دم اخوة يمكن سبقوا أو لحقوا بى أسماء وشوش بتضحك فيهم امل آآآآآآآآآآآآآآآآآآآآآآآآآآآه يا بنى اه كريم بنونه و احمد ايهاب و كتيييييييييييييييييييييير كتير غيرهم بيقولوا فى شهيد فى عمر ابنى اسمه عمرو الغريب ولا شهيد فى عمر اخويا اسمه احمد بسيونى دهسته سيارة امن سايقها كلب مسعور متسلط برضه من زبانية حضرتك ولا فى عمر ولدى سيف الله 16 سنة الله يا ولدى 16 سنة يا بنى يا خويا يمكن أبويا فيكم يا اشرف رجال لو كتبت اسمكم بدمى مستحيل اقدر اكافئ نقطة نزفت فى الميدان
لا. مبارك مش شريك معانا من يوم ما كان نائب رئيس وهو مش معانا يمكن يكون كان معانا برضه شريك بيحس يوم بالمسئولية يوم العبور و خلاص بقى حاكم ومالك لكل بر مصر لو كان شريك معانا و حاسس بالمسئولية كان استقال بدون طلب بدون مظاهرة مجرد يحس بأنه سبب فى دماكم و حزن أهل مصر كلهم تعرف يا احمد يا سالى يا حمادة لبيب يا كل شهيد ضحى عشانا سمعت نكتة فى إعلام بلدنا الوطنى يمكن وطنى علشان ملك الحزب اللى كابس فوق صدورنا كلنا قال أيه مين فوضكم تتكلموا عننا؟ 8 و نص مليون مجاهد ازاى يعبروا عن شعب مصر يمكن جهالة أو تجاهل يا بنى يا جاهل ياللى بتندغ فى الكلام ده كأنه لبانة أقولك ليه دول عنا بيعبروا كل بطل فيهم بيعبر عن أهله وأسرته اضرب فى 10 لا اضرب فى 3 علشان خواتنا بتوع نحدد نسلنا يبقى النتيجة أكثر من 25 مليون فوض لأبطال يناير يتكلموا عنا و عنهم يعنى أكثر من ثلث مصر هو رئيسك اللى قاعد مربع فوق صدورنا كلنا مين فوضه انتخابات حرة نزيهه بذمتك طب سيبنا منها النكتة دى خد كام من أصوات شعبنا بعد النزاهة و التوابل و التحابيش الطبخة كلها جابت يا دوب 5 مليون صوت تصدق انه بيهم بيحكمنا كلنا
خايف أنام يا حبايبى يضيع منا حلم سقيتوه بدمكم