نعم أو‏..‏ لا‏..‏ أنا نازل يوم‏19‏ مارس

أنا وأنت وأنتي لازم نكون إيجابين يوم‏19‏ مارس القادم‏,‏ كلنا بنقول هننزل ندي صوتنا في الاستفتاء علي التعديلات الدستورية‏,‏ هيكون شكلنا حضاري‏,‏ هنحترم بعض هنكون منظمين بنحمي بعض وهدفنا واحد وهو‏..‏ مصر‏. هذه الكلمات جاءت من صاحب حملة هاكون إيجابي ونازل يوم‏19‏ مارس أدي صوتي في التعديلات الدستورية‏.‏وتباينت الآراء من المشتركين حول قبول التعديلات أو رفضها‏,‏ حيث علق عزت الصوفي قائلا‏:‏ محدش يوافق علي التعديلات ولازم مجلس رئاسي و بعدها تشكيل لجنة تأسيسية لعمل دستور جديد للبلاد ثم انتخابات رئاسة حرة و من ثم ننخرط في العمل السياسي الحقيقي ونكون قادرين علي عمل انتخابات برلمانية نزيهة‏,‏ في حين قاطعته ياسو يوسف بقولها‏:‏ يبدو أن البعض لم يقرأ الجزء المتعلق بإلزام الرئيس والبرلمان المنتخبين بالقيام بالإجراءات اللازمة لإعداد دستور جديد‏,‏ يعني كدة كدة هيتعمل دستور جديد‏,‏ ولكن التعديلات الحالية التي أجريت عليه مؤقتة لحين انتخاب رئيس للجمهورية‏,‏ وعندها قاطعها مصطفي الدابي قائلا‏:‏ ده كلام فاضي وبيضحكوا علينا‏,‏ حيث ان التعديلات تنص علي أن لكل من رئيس الجمهورية‏,‏ وبعد موافقة مجلس الوزراء‏,‏ ولنصف أعضاء مجلسي الشعب والشوري طلب إصدار دستور جديد‏,‏ يعني ممكن مجلس الوزراء مايوافقش أو نصف أعضاء مجلس الشعب وبالتالي لا يتم عمل دستور جديد‏,‏ ده تهريج‏!‏ أما لقاء علي قالت‏:‏خدوا بالكم إن المادة‏76‏ بعد التعديل بتقول ان اللجنة اللي بتراقب علي الانتخانات لا يجوز الطعن فيها‏,‏ يعني لو عايزين يزوروا هيزوروا‏,‏ كما أن تعديل المادة‏139‏ بتقول إن رئيس الجمورية لازم يعين نائب أو أكتر‏,‏ المشكلة إن لما نحط طبقات كتير تحت صاحب القرار هيبقي صعب إن البني آدم اللي فوق خالص يحس باللي بيحصل تحت و هنرجع تاني للي حصل مع عز و جمال‏,‏ الريس ماكنش بيوصلوا أي حاجة لأن في اتنين تحته بيقولوا أن كله تمام‏!‏ ورغم تباين الآراء بين مؤيد ومعارض إلا أن الكل إتفق علي النزول يوم‏19‏ مارس القادم لأنهم علي يقين أن صوتهم‏..‏ هيوصل‏.‏