مراية بتعمل زوووم

أخبّى الجرح فين .. ؟ وانا كل واحد يشوفنى يشاور ويقول لى هنا .. وكانى واقف قدام مراية بتعمل زوووم جوايا وتطلّع ابطال حكاياتى وتقدمهم للجمهور بالحجم الطبيعي
أخبّى الجرح ازاى .. ؟
وانا اللى شفاف دنيتى وسنينى ..
عصافير على شجرة
صيّادها نايم مستنى حد يقول له قوم
علشان يقدر يمارس قسوته ع الزقزقه
ويفتح كتابه ويضيف شمس تانيه
دوّبها الغروب
ويضيف حزن تانى لأى شعور بالفرح
أخبى الجرح ليه ..
مجرد ديكور يعنى لزواق الطريق
أو صورة مش محتاجة لحد يوصف جمالها
بس الرتوش اللى فيها ..
مبينة حاجة تكسف
ف لحظة خطفتها الكاميرا
من غير ماتقصد
أخبى الجرح والبس للحياه وش تاني
واقف قدام مراية فيها كادر واحد ..
شايل قلب خشب
وسنينه عصافير بلاستيك بالريموت بتموت
يعنى صوت الغنا مش هيضيف
لإحساسه أى شىء
ومش هيبقى هدف لأى صيّاد ..
عزّت عليه لحظات الانتصار
من وقت ما كان للكلمة الحلوة تاريخ ..
تقدر تسند راسك عليه وتعيّط
وانت مش مكسوف