عارف‮ ‬يارب

7
عارف‮ ‬يارب‮ ‬
أنا شوفت أكتر م اللي لازم أشوفه‮ ‬
مع أخر الصناديق‮ ‬
هاتحول هوا وأعمي‮ ‬
والزحمه تتنفس بواقي الضلمه‮ ‬
لزمتها إيه اللنض‮ ‬
قدام طابور بيعبي السواد في جيوبه‮ ‬
وفي النهايه ها‮ ‬يظهر البلياتشو‮ ‬
يبقي حكيم العيله‮ ‬
وصندل الباشا في عز الطين‮ ‬
ومصبراتي المجروحين ساعة الفراق‮ ‬
وها‮ ‬يظهر الحاوي‮ ‬
ويعمل مننا كوره سفنج‮ ‬
ألوان كتير سايحه‮ ‬
واللفه علي بعضها ملزوقه بالكُله
والنور بيعرج بس رابط عينه‮ ‬
جرب معايا‮ ‬
والحجر‮ ‬يقدر عليه اتنين‮ ‬
وتعمل إيه‮ ‬ياللي مالكش عينين
أيوه‮ .. ‬هنا‮ ‬
لأ‮ .. ‬من هنا‮ ‬
خليك‮ ‬يمين حبه‮ ‬
خليك شمال حبتين‮ ‬
أيوه كده في النص‮ ‬
تحت الجبل‮ ‬
فهمت الصباره معناها‮ ‬
وحاولت أفهم معاها‮ ‬
رحمة المسامير في جسم عيل مريض‮ ‬
عياط راجل جريح م الفضا في جيبه‮ ‬
فراق اتنين بيحبوا بعض بجد‮ ‬
وقلة الزقزقه فوق الشجر
كلمتكم عن مرهم اسمه الصبر‮ ‬
وكنت قاصد بكره‮ ‬
غلطان‮ ‬يا ليل لما قصدت خيولك‮ ‬
عندي شوية شوق قديم للنور‮ ‬
أنا اللي زارعهم هنا‮ ‬
عندي جنينه كلها عشاق‮ ‬
طعم الهوي ع المداق‮ ‬
شيلوا الحجر ويانا‮ ‬
وغنوا والأزميل هانسمع صوته‮ ‬
‮"‬أنا كنت مسافر في الصحرا‮ ‬
ومشواري طويل‮" ‬
الليل قديم بس صوتنا نهار‮ ‬
إنزل هنا‮ ‬
وقول للنار تصفي الجروح‮ ‬
خلي الحبايب‮ ‬يفرحوا بالشمس
ومن جديد هانشوف كلامها
ونبتسم للغيم‮. ‬
8
عارف‮ ‬يارب‮ ‬
أنا كنت زعلان قوي‮ ‬
حتي شوف البحر خاسس
والحجاره كلها اتعرِّت وبان عليها العمر‮ ‬
كانت هنا أورطة مراكب‮ ‬
وعنيا كانت حته م الصاري‮ ‬
ساعة نزول الشبك‮ ‬
بامد دراعي وياهم‮ ‬
والحزن‮ ‬يملا عنيا والسمك في الطاسه‮ ‬
وكانوا لما بيفطروا بيحلا زادي معاهم
هيلا هيلا‮ .. ‬هيلا‮ ‬
أيوه السما سمعاهم‮ ‬
من زمن قفلوا الهويس‮ ‬
ووراه أزايز البلاستيك‮ ‬
وبواقي الزرايب‮ ‬
وقشر البرتقان‮ ‬
كوافيل العيال‮ ‬
الحمير الميته‮ ‬
والحزن واقف وفي إيديه الريم‮ ‬
من قد إيه الليل‮ ‬يتيم‮ ‬
يا ميه ما تجربي روحك‮ ‬
يا ميه عمرك كام وعمري كام‮ ‬
فاكره عكاره رجلي ولا كبرتي
ولا نسيتي ونسة الأحلام‮ ‬
طب شوفتي جرح الصيادين ع الشط
من قد إيه ماعامش فيكي البط‮ ‬
بطلتي ليه تطلعي بفساتينك
وتشاوري للعشاق برمش العين‮ ‬
طب مين ها‮ ‬يكتب ع الخشب‮ ‬
‮"‬سيري باسم الله‮ ‬
مرساها ومجراها‮"‬
ويحفر بالضوافر سهم بيشاور علي القلبين‮ ‬
قاعد بطرقع صوابعي والدموع حفاره‮ ‬
وأم العيال محتاره‮ ‬
قاعده تلم الحُصر وتكلمها‮ ‬
فين الصبايا الزين وتنهيدهم‮ ‬
فين الدعا وانت راجع‮ ‬يا حبيبي الفجر‮ ‬
والقميص مشتاق وبيرفرف عليَّ
كل دا منك‮ ‬يا ميه‮ ‬
زعلان قوي‮ ‬
وبكره تتعوض‮ ‬يابحر‮ ‬
وتعرف قيمة العشاق علي شطك‮. ‬
9
عااارف‮ ‬يارب‮ ‬
قصقص جناحها وهو بيغني‮ ‬
قال الجبل أَوُلَي بُه‮ ‬
يمكن‮ ‬يشيله من هنا ويرتاح‮ ‬
طارت معاه الحجاره‮ ‬
وكل حبه اشتروا خاطر مكان‮ ‬
هنا مكان الخليفه‮ ‬
هنا مقام الولي‮ ‬
هناك لسور المدينه‮ ‬
وصحيت البياعين‮ ‬
‮-‬ طازه‮ ‬يا جرجير ومنعنع
‮-‬ من‮ ‬غيطنا‮ ‬يا فول من‮ ‬غيطنا‮ ‬
‮- ‬يابو العيون السود والكحله رباني‮ ‬
‮- ‬أحمر‮ ‬يا خد الجميل‮ ‬
غنا قديم بيونس الصحرا‮ ‬
حمّل وشيل ع المراكب‮ ‬
والحزن ع الشط واقف في الوداع‮ ‬
مع السلامه‮ ‬يا ابن بطني‮ ‬
تلات جناين لواحد‮ ‬
وكلنا جعانين‮ ‬
طب مين‮ ‬يدوق م الشجر‮ ‬
ومين‮ ‬يربي الخيول‮ ‬
ومين‮ ‬يسوق الحمير‮ ‬
ومين‮ ‬يقيد المشاعل ويلبس الحرس الهدوم‮ ‬
ومن ساعتها واحنا في الغربه‮ ‬
سنين تطول وحزننا في البير‮ ‬
والسؤال لسه‮ ‬
منين‮ ‬ياريش طاير‮ ‬
وفين عصافيرك ؟
‮ ‬10
عارف‮ ‬يارب‮ ‬
الحزن كل ما احطه في الميه بيكبر
والضحك ما بيتباعش في الأسواق‮ ‬
كنت اشتريت حبه لوقت العوزه‮ ‬
والدود سرح في جناين العشاق‮ ‬
والشمس نصبت محزنه ع اللوزه‮ ‬
ودعت باقي الخُضره وأنا دبلان‮ ‬
ونسيت صوابعي في صدرها ومشيت
ما شاء الله ملكي‮ ‬غيط من الأحزان‮ ‬
وعنيا بتراعي الجروح كأنها عيالي‮ ‬
كان فيه دموع فالصو وعامله نفسها دمعات‮ ‬
ودموع بتوصل روحي بالسموات‮ ‬
ودموع بتنزل كدا وكدا‮ ‬
ودموع كأن عيالها قطر الندي‮ ‬
ودموع تشوفها تفهم القناديل‮ ‬
ودموع بتحفر للحنان نهرين‮ ‬
ودموع بتمسح نفسها وتصهرج‮ ‬
والنور بعكاز الضلام‮ ‬يعرج‮ ‬
هو انت إيه‮ ‬يا حزن‮ ‬
ياريتني ما حزنتك‮ ‬
أنا قلت روح للجبل‮ ‬
تحت الحصي والرمل‮ ‬
سبع سنين طواف وإيديا في جيوبي‮ ‬
سبحانه من سكنك في عش محبوبي‮ ‬
دمعي علي دمعه‮ ‬
والحزن مونة طوبه علي طوبي‮ ‬
والبحر بيفيض بس روحنا هناك‮ ‬
ويشهد الصيادين علي‮ ‬يتامي الوداع‮ ‬
رصوا الشبك ع المرار‮ ‬
وطلعنا بجروحنا‮ ‬
والشط مش ناقص وتحته كتير‮ ‬
قلوب عذاري‮ ‬
ونهنهه مره‮ ‬
وإيدين تشاور‮ ‬لبعضها برعشه‮ ‬
داب العياط في الرمل‮ ‬
والحزن هو اللي نجي م الموت‮ ‬
شوفته كأنه ملاك بيتهجد‮ ‬
شايل معاه الحزاني ومركبه قشه‮ ‬
بيصلي لدموع الأطبا ويسجد‮ ‬
ملس عليه وأكرمه بحفان فرح صافي‮ ‬
خليه‮ ‬يغني للماجور والفرن‮ ‬
ويقول حكاوي الفلاحين في الجرن‮ ‬
ويلبس الجلابيه واللاسه‮ ‬
ويفهم الشوك اللي جرح رجليك‮ ‬
أبدأها من قلبك وقول أغانيه‮ ‬
لسه الشجر محتاج تطل عليه‮ ‬
والضل مش ليك لوحدك‮ ‬
فما تجرحوش بالشمس‮. ‬
‮ ‬11
ياااارب‮ ‬
عليت جبال القش‮ ‬
والفيران سرحت في‮ ‬غيط الدُرا‮ ‬
والقرد بيوضي الحواه بالنار‮ ‬
والليل مربع ع الكنب في المندره‮ ‬
طب أعمل إيه والقمر‮ ‬غفلان‮ ‬
قاعد مكاني وبسقي جوز البط‮ ‬
وفي بالي‮ ‬غنوه نصها تايه‮ ‬
أنا قلت أغنيها ولو ناقصه‮ ‬
الليل تقيل بس النهار عشمان‮ ‬
خدت القمر من إيديه وابتديت الرقصه‮ ‬
استني حبه نسيت خيالي معاك‮ ‬
وأنا قلبي من‮ ‬غيره طريد الحزن‮ ‬
ما تسهنيش وتاخد اسمي م الدفتر‮ ‬
تعالي نتعرف علي الميه‮ ‬
علي الحنان وهو ماشي بيقطَّر
القش هايش وعامل نفسه كوم فضه‮ ‬
أطهر ما فينا البكا‮ ‬
والنيل نزل في بحره‮ ‬يتوضا
ومن ساعتها المراكب فهمت المالح‮ ‬
والصيادين نسيوا بكا إمبارح‮ ‬
وأنا نسيت نفسي في‮ ‬غناهم وانتشيت
أجمل ما فينا لقموه للموت‮ ‬
فضيت عينيا م الدموع ومسحتها بكمي‮ ‬
وشوفته علي حبل الغسيل بينقط‮ ‬
أنا كنت نايم ولا كنت بسقَّط‮ ‬
ولعت كوم القش والدخان عمّي عيني‮ ‬
وفِضِل لي حبة رماد‮ ‬
شوالين سواد دفنتهم في الرمل‮ ‬
الشعر لو حقاني ما‮ ‬يبطلش حمل‮ ‬
ولا قش ولا‮ ‬غيرُه‮ ‬
وآدي الشجر ونسان مع طيرُه‮ ‬
شاورت له حياني بالرفرفه‮ ‬
وفضلنا مع بعضنا نحكي ولا نملش‮ ‬
الشعر لو حقاني ما‮ ‬يقلش‮ ‬
تلاقيه هنا وهناك‮ ‬
منه الفيران تستخبي في الجحور‮ ‬
مش قلت لك لا قش ولا‮ ‬غيره‮ ‬
اللي باقي لنا النور‮ .‬
12
عارف‮ ‬يارب‮ ‬
الصبح قامت وشالت مشنة الرحمه‮ ‬
وفي صدرها حبة كلام دفيين
طرحتها سودا‮ ..‬
والشعر من تحتها مفروق‮ ‬
والله‮ ‬يا موت انت عديم الذوق‮ ‬
في السكه قالت لشالها‮ ‬
ما اشوفش دمع عينيك‮ ‬
أنا رايحه أفرح معاه‮ ‬
وانت عليك الرفرفه بالشوق‮ ‬
افهم كلامي واوعي لخطوتي وأنا رايحه‮ ‬
رمت السلام وإيديها في السياله
قالت العواف‮ ‬يا حبيب روحي‮ ‬
ملس عليها الهوا شال طرف جلابيتها‮ ‬
ضحكتها طالعه بالندي أما الشفايف صابحه‮ ‬
إزي حالك‮ ‬يا حبيبي‮ ‬
وإزي حال الشجر فوق قبرك‮ ‬
نفسك في صدري بيمرجحني وأنا رايده‮ ‬
إديني إيدك‮ ‬يا جميل‮ ‬
واجرح كفوفي بدفاها‮ ‬
كرداني زغرط والعيال حواليا ملمومه‮ ‬
قوم اتعدل وهات راسك علي صدري‮ ‬
من‮ ‬يوم ما ودعتنا وسيبت الطحين زعلان‮ ‬
الدار بينزل بياضها والهدوم بهتت‮ ‬
سبع سنين وعينيك في قلب الطاقه‮ ‬
ع المصطبه مفروده جلابيتك‮ ‬
وجوه جيب الصديري‮ ‬
علبة نشوق وبطاقه‮ ‬
عينيك بتلمع وتحتها اسمك كأنه خيالك‮ ‬
باين عليَّ‮ ‬جيت علي بالك‮ ‬
عيطت من‮ ‬غير دموع‮ ‬
وقومت واقفه لك‮ ‬
وقلت للحطب اللي فوق السطح‮ ‬
وللفاس اللي صدِّت من سنين في الركن‮ ‬
الصبح جايه لك‮ ‬
ماشيه بعافية إيديك‮ ‬
حتي شايف شالك‮ ‬
شبك في فرع الشجره فوق قبرك‮ ‬
بطل شقاوه‮ ‬يا عشيق روحي‮ ‬
أنا جيت اعفَّر رجلي في ترابك‮ ‬
واشوف جمايل خطوتك ع الأرض‮ ‬
طب ليه‮ ‬يا دمع تمسح كحلتي‮ ‬
جرّب حنانك في وش مش فرحان‮ ‬
ارتاح شويه ونام كأني معاك‮ ‬
وونس الليل بالدعا‮ ‬
وأنا سمعاك‮ ‬
والصبح جاياك‮ ‬
وشايله مشنة الرحمه‮ .‬
13
عارف‮ ‬يارب‮ ‬
كان كل ورده‮ ‬يودعها‮ ‬
تطلع مكانها جنينه‮ ‬
والورد‮ ‬ياخده من إيديه‮ ‬
ويعدي‮ ‬بيه الشارع‮ ‬
عكازه قدامه ونضارته تخبي الليل‮ ‬
يمشي ويسمي الجناين‮ ‬
يعني جنينة الفل بيسميها روح الروح‮ ‬
وعود المسك اسمه شمخة العاشق‮ ‬
أما البنفسج قال له عنوانك تروح بيت الغرام‮ ‬
علي كدا كانت حروفه كلها من قلبه‮ ‬
أما الوحيده اللي سأل عن اسمها‮ ‬
كات زهرة الصبار‮ ‬
ملس علي شوكها‮ ‬
وقال لها‮ : ‬أبوكي مين ؟
قالت‮ : ‬أخويا البرد‮ ‬
إيديه تسوقه ع الطريق‮ ‬
أيوه هنا‮ ‬
علي اليمين حبه‮ ‬
ها تلاقي زهر القرنفل‮ ‬
‮ ‬ودا برج بيدفي الحمام‮ ‬
والورد عامل ونسه في الشارع‮ ‬
وبيبتدي‮ ‬ينقي الكلام‮ ‬
عدا وكان الفرح بيرف في الجلابيه‮ ‬
شاور بإيده للفضا والنور ملا كفه‮ ‬
الليله دخله والسما بكريه‮ ‬
عايم في بحر الشفايف‮ ‬
بتمرجحه الميه‮ ‬
قالت الملايكه سيبوه‮ ‬ينشف علي راحته‮ ‬
وملوا القلل وحطوها علي الشباك‮ ‬
غنا الماورد بنعرفه من ريحته‮ ‬
كنا عصاري وزي عادته الليل‮ ‬
ساكن عينيه كأنه ابنه الوحيد‮ ‬
عدا وساب ع العتبه حبة ورد‮ ‬
سهرنا وياهم‮ ‬
كأننا لسه أول مره نعرف بعض
وكأن سرب الطيور من بقية العيله
رقصنا فوق الحصي‮ ‬
إيدينا متشبكه والورد تحت وفوق‮ ‬
والليل هرب من عينيه وحكي لنا
واقف علي باب النهار ولا خافش‮ ‬
ياورد عندك حق
إحنا اللي ما بنشوفش‮ . ‬