"عاااارف يارب"

مقطع من ديوان جديد يصدر قريبا
الليل مش بقعه سودا ونزلت عليها المطرة
.....................................
.....................................
كان فيه ولد سنه من سني
ووشه فيه شبه مني
وكان يحب الليل كأنه جنينه بشجرها
وكأنها ورثه اللي فضل يرعاه
يعرف يغني للقمر
وكل ورقه في الشجر سمعاه
ويفوت عليه النهار كأنه حدايه
اتنين وكارهين بعضهم زي العدا في الوش
أيوه النهار مكار وبيلمع جزم
ويبيع سلاسل فالصو
وطباق بلاستيك من عجين الزبالة
بنته نحيفه واسمها قياله
بيلم علب الصفيح ويخبي فيها الشمس
ويقول بصوته الخشن
ورنيش
جنبه بتمشي الهدوم وقلبها فاضي
ورنيش
وبياعين مناديل وشحاتين بالنظره
الليل مش بقعه سودا
ونزلت عليها المطره
الليل قديم وواعي للسؤال
عارف عياله كلهم بالفطره
طب ليه خلقت لنا النهار عريان
نايم في بطن الكباري وصوابعه مشلوله
ياكل لمامة النواصي ويزك بالعكاز
لله
أنا باربي يا محسنين أيتام
حافي و حلمه لقمه بين كسر الإزاز
ديله يجرجر وبيلملم تراب الشارع
نفسه في تنهيده وحيده تتسمع في الليل
يحسها زي إيد نفسها تتحني
تعرف تداري الشقوق علي عتبة في الجنة
الليل عشيق الدفا ورهانه ع المواويل
موجه تشيلني كأني مركب وحيد
لسه بتجرب كلامها وتسمعه للنيل
يعني أحضان اليتامي لما يتلاقوا
وشهقة الشجر اللي نفسه يطيب
علي مهجتين في الدفا بيتشاقوا
أيوه القمر ابنه وضناه العايق
كبر وخاوي البنات
وفضل بعيد بينادي عشاقه
وأنا هنا زيه يا ليل
فيا شبه منه
وسني من سنه
عارف آوان النور
بس ما قدرتش أسمي النهار
شوفته تحت الجرايد بيلملموا جسمه
ومفيش دليل علي عيلته أو اسمه
آخرتها إيه؟
حبة تراب في مقابر الصدقة