1-قد ما بحب الليل .. يجري قُدامي طول الحلم كأنه بيرتب لأُمسية رُعب يملأ عقلي بخفة شبح. ما نفتكرش الأحبة غير وقت الشدة. متاخد من مواقف بتهلكني . أطلع من تحت اللحاف يتكسر ازاز الشباك في ثانية أبرد تتبخر الأيام زي الدفا أرقص علي الإزاز زي حاوي هندي يسقفولي يناولوني الإزاز أمضغه .. ليل يناولني للتاني .. أترعش ... ولد تايه في السوق ريحة البهارات تاكُل المناخير .. عطن السنين علي القلب روماتيزم صوت البقر أعلا من صوت الحمير بقيت أكره قد ما بحب .. الحاوي يشلب دم قلبي ينزف حنين ولا يفتكرونيش الا لما أرقص .. مين اللي رافع الرجلين يرفس . قانون السوق الكف والقفا . الولد تعبان من النهجان. الطبيعة بنت الغيطان والسحر روح الصحرا أما المدن بلياتشو وليلها بيخبي اللي بيشوفه . 2-جدار قديم عشر سنين فاتوا فجأة كوم دوسيهات ماليها التراب وأنا موظف أرشيف في دراعي الأكمام السوده أخبي القميص الأبيض م الحبر والأحلام السما ما تبتسمش زي أم لرضيعها لكني لسه باضحك لما بافتكر موقف حلو وأرمي ورا ضهري . أطلع السلم أعاني من وجع سمانتي كأني طالع جبل شايل دوسيهات لعشر سنوات وضهري متشرّخ .