أنا باشكر الموقع ده على كل الأبواب، وخصوصاً باب "فضفضة"، وباحترم رأيكم جداً؛ بس أحياناً صعب يتنفذ. مشكلتي باختصار إن أنا بنت في أولى كلية، عندي 18 سنة، كنت بحب واحد من سنتين، وكان بيبعد عني كثير بالشهور، وآخر مرة بِعِد خالص. كان فيه واحد يعرف واحدة صاحبتي وبيقول إنه بيحبها؛ بس هي مش مقتنعة به؛ فجه كلمني كذا مرة وقال لي إنه بيحبني، وأنا صدّقته، وقال إنه هيتقدم لي بعد سنة، بعد ما يخلص دراسته. المشكلة إن أنا بافتكر اللي كنت بحبه الأول، وباقول: هل أنا اتسرعت؟ بس دي ما كانتش أول مرة يسيبني؛ مع العلم إن هو ما كانش بيغير عليّ ولا بيهتمّ بيّ قد كده، وكان بيقول لي مبرراته، وكنت باقتنع بيها زي إنه بيشتغل من الصبح لحد بالليل.. في حين إني بحب الإنسان الثاني ده جداً، وهو بيحبني أوي، وبيخاف عليّ، وبيغير عليّ، وبيهتم بيّ أوي، ومحسسني إن أنا حتة منه. والمشكلة الثانية إن صاحبتي بِعدت عني أوي وما كلمتنيش، وأنا على طول اللي كنت باكلّمها؛ فممكن يكون ده السبب؛ بس الموضوع ما كانش فارق معاها وما حبتهوش. bibo لو عايز تفضفض لنا دوس هنا