الكلام ده ..كان زمان

وأنا صغير لما كنت بكتب وأقول أشعار ...يقلولي إسكت .
ولما كبرت شوية وبقيت أقول كلام معقول موزون ... يقلولي شاطر
كل ده لجبر الخواطر
يسقفولي ويفرحولي وقدام الناس يتفشخروا بيا
بس يا خسارة أنا عارف اللي جواهم
وعارف اللي في النية
هايجوا بالليل يقلولي .. إوعى تقول الكلام دا لحد يسمعك
يجوا يخدووك مننا .. منعرفش نرجعك
أبويا يقولي لو حد سألك .. ملكش دعوة وقول أنا مالي
وأمي تقولي يا ابني انا خايفة عليك .. دا الضنى غالي
الكلام دا كان زمان ..لكن دلوقتي كلام تاني
دلوقتي بمسك القلم وأزيل بيه الجروح
وأكتب وأعبر عن كل اللي جوايا
و كل اللي في الروح
وأكتب على الورق من غير براويز
أكتب للرخيص وأكتب للعزيز
واطلع بره البيت واكتب على الحيط
أمسك القلم وأقول يا هادي
في كل شارع في بلادي
صوت الحرية بينادي