حبيبى

(1) بعتّ لك ويّا القمر ..تحيّة .. وقلت له : «لو ضيّها يشبه لضيّك ..تبقى هىّ. لو شعرها الإسود جدايل ..
لو خدّها يشبه لنسمة مغربيّة
لو تشبهك لحظة ظهورك ,بس هى
مستحية.
تبقى هىّ
(2)
بعتّ لك و يّا القمر ..فرح.
وبعتّ ويّاها
عناقيد أمل طارحة..
وقلت له : بشويش عليها يا قمر
أحسن تكون سارحة
فى أمنيات ممكنة
أو ذكريات جارحة .
(3)
بعتّ لك ويّا القمر ..صحبة ..
ياسمينة ;وردة ; سوسنة ..
مع فلّة متصاحبة ..
ومعاها حبّة أغنيات ,
وأمنيات رحبة .
(4)
بعتّ لك ويّا القمر ..لهفة ..
وبعتّ ويّاها كمان
للحنان وصفة ..
وقلت له:” وصلها يا قمر
‹ لامّ الرّموش تحفة
وقول لها :»إن الغرام فاض ..
وانّ الحنين كفّى.
عاشق صفاك ياقمر
وعينيها دول أصفى
(5)
بعتّ لك ويّا القمر ..غيّة ..
حمام جميل أبيض
يهوى الملاغيّة ..
شايل على جناحه اليمين زاد ..
وعلى الشّمال. ميّة .
(6)
بعتّ لك ويّا القمر ..روحى
شايلة سرّك فى الهوى ‹من قبل ما تبوحى
وعارفة دقّة خطوتك ..
لمّا تيجى ,أو تروحى .
(7)
بعتّ لك و يّاالقمر .. قلبى .
لمّا تناديه, تأمرى .. فورا يلبّى .
لسّاه بيحلم بيوم ..
تكونى فيه جنبى .
(8)
بعتّ لك ويّا القمر ..مهجة..
بتحكى قصّة حبّنا
لكن بميت لهجة
لاجل امّا توصل مسمعك ..
وتحسّى بالبهجة .
(9)
بعتّ لك ويّا القمر ..مكتوب ..
وسألته : ليه شغلنى الجميل كده ياقمر..
ده انا كنت ناوى أتوب
رد القمر وقال:
دا كل شىء مكتوب
(10)
بعتّ لك ويّا القمر ..رسالة ..
على جناح الطّير بالحب متشالة
من قلب هدّه الفراق , ودموعه سيّالة..
مستنّى منّك ردّ على صفحة ضياه
هاقراه مطرح ما اكون
ما انا أصلى رحّالة
(11)
بعتّ لك ويا القمر ..كلمة ..
خمس حروف لكنها.. بتضوى فى الضّلمة
« حبيبي « ..
أيوة حبيبى ..
ده انا حبى ليك نعمة
(12)..
بعت لك ويّا القمر قصيدة
اقريها لاجل تونّسك .. لمّا تكونى ‘ وحيدة ..
علشان تقرّب مشاعر ..
كانت بعيدة
يمكن فيه احتمال ..
لنهاية تكون ...... سعيدة. .