دولة البصاصين

يا شارع الظلم بشويش
لملم عناوينك
عنوان ورا التانى
آن الأوان أبتدى
أجمع ف أحزانى
إطوى رصيفك تحت رجل شهيد
يحلم بيوم المخاض
يدعى بلغة الضاد
يارب قوينى ياعالم بأحوالى
تطلع خيوط الفجر ع المحروسة
خيط ورا التانى
يا شارع الظلم بشويش
لملم عناوينك
وبلاش تعافر
إمسح أثار الدم ع الاسفلت
الدم ده دمى
إفتح عيون سجانك النعسان
متشيلوش همى
همى أنا شايله
لما إنكسر ف إيدية
عقرب ساعة السجان
من يومها ما سألتوش
ولا هو طمنى
تحكى الولاد عنى
كان يوم معدى من هنا
صلى هنا إتوضى هنا
قابل حبيبته هنا
توصل نسايم عشقهم ولحد زنزانتى
ترسم جناح طائر على حيطانها
بيغنى حرية
هوّن علىَّ ساعات الظلم والضلمة
ياشارع الظلم بشويش
لملم عناوينك
عنوان ورا عنوان
لملم ف أسماء الطغاه
فرعون وجند همان
وكهنة المعبد
إجمع كرابيج العسس والبصاصين
من ضهر جدى
كرباج ورا كرباج
لكن أمانة بالهدوء بشويش عليه
ما تفزعوش م النوم
بالعافية قلبه إرتاح
من فزعة العسكر
م النسر والدبورة
م السخرة ضهره إنحنى
ف الأصل والصورة
تشهد عليه القنال
والجلابية الدايبة
من شيل الهموم والفاس
طول عمره عاش منداس
يا شارع الظلم بشويش
لملم عناوينك