باكو شيكولاتة

من طفلة إلي والدها أبعد عنها لظرف ما وحدي في البلكونة.. بالعب ويا عروستي.. اللي دايما بتونسني.. وبتحرسني وماما ف الصالة بتضحك مع عمو اللي لابس بيجامة بيضا
زي بتاعتك يا بابا
وأنا زعلانة خالص..
من عمو
علشان بينام..
دلوقتي مكاني
وماما قالت لي:
ح تنامي لوحدك ف الأوضة
وانا خايفة يا بابا
م العفاريت
لما بتغضب مني
كانت بتخوفني بالعفاريت
دلوقتي بتقول لي:
مفيش حاجة اسمها عفاريت
هو صحيح العفاريت..
بتموت
.............
عمو جاب لي شيكولاتة
زي بتاعتك..
لكن..
طعمها مش حلو
وماما عايزاني أقول له..
يا بابا
طب ازاي..
هو فيه في الدنيا حد
ليه اتنين أب
ماما زعلت مني وعماله تعيط
.............
إمبارح رحت معاهم..
حديقة الحيوان
استنيتك عند الفيل
يمكن تيجي..
زي زمان
علي فكرة الفيل
كان زعلان..
ومكشر
ورافض ياخد أكل ف زلومته
هو الفيل برضه..
باباه مسافر
وقاعد ويا عمو ومامته
.............
طب كلمني ف التليفون..
زي الأول
والا أقول لك سر خطير
إنت واحشني بجد يا بابا
نفسي أشوفك..
واسمع صوتك
ف البلكونة ح ستناك
وهات لي معاك
باكو شيكولاتة
وحضن كبير