شذى تفتح النار على عبد الباسط حمودة

على صفحتها بالفيس بوك
قامت الفنانة شذى بالرد عبر صفحتها الشخصية ب"فيس بوك" على كلام المطرب عبد الباسط حمودة، الذى قاله فى برنامج العاشرة مساءً، وقالت: بالنسبه للأستاذ عبااااسط انا سكت أول مره وقولت راجل كبير وعيب أرد شارع الهرم اللي بنسبالك مقياس والموالد اللي واضح إن من كتر م إنت غنيت فيهم مضيقينك فبتحاول تعمل فيها متقبل الموضوع وبتقول وترد على نفسك وأساسا محدش عاب على اللي بيغنوا في موالد ولا شارع الهرم م كل واحد يغني مكان مهو حابب محدش يقدر يقيم حد ولا يحكم على حد.. انا فعلا محالفنيش الحظ الفظيع اني أغني فيهم اعملك إيه طيب ؟؟ إنت ليه بتحاول تعمل حوار وموضوع... للأسف يا سي عبااااسط انا مغنتش في موالد ولا غنيت في شارع الهرم ولا كنت مع اللي راحوا الهرم ولا بتنصل والواقع ان فيه إختلاف ثقافات وتربيه واسلوب.
وتابعت: بالنسبه لإنك فجأه عملت فيها( بيتهوفن الفن ) فأنا غصب عنك فنانه مش عافيه مني ومش رأيي ده رأي الجهات المحترمه المعنيه بالفن المحترم زي دار الاوبرا اللي اتشرفت وكنت صوليست فيها وطبعا مش هتفهم يعني إيه صوليست فهترجمهالك بلغتك يعني بقدم (نمره لوحدي )على أوركسترا بيقودها دكتور سليم سحاب وواحده تانيه كان بيرؤسها الدكتوره رتيبه الحفني الله يرحمها... فلو سمحت لما تطلع تاكل عيش في البرامج متحكيش في المحكي وتجيب في سيرتي وتبروز نفسك وتعمل فيها فلوطه لإنك نص معلوماتك الفنيه في الحلقه بعافيه.
وأردفت: طبعا أكيد مش هتفهم ولا حرف من اللي أنا كتباه ده لإن اساسا الاغنيه اللي ضربتلك وإتعرفت بيها كنت أساسا تايهه فيها وطول مده الأغنيه مش عارف نفسك يعني واحد طول الاغنيه بيقول( انا مش عارفني انا تهت مني ) هعتب عليه فإيه والنبي لما يلاقي نفسه بقى نبقى نتفاهم.