شذى لعبد الباسط حمودة: الأغنية اللي اتعرفت بيها كنت "تايه" فيها.. وأنا فنانة غصب عنك

ردت الفنانة الشابة شذى، على الفنان عبد الباسط حمودة، الذي انتقد تصريحها بأنها لم تغني في ملاهي شارع الهرم، خلال استضافته ببرنامج "العاشرة مساء"، قائلا: "إنتي مغنتيش في شارع الهرم.. بس كنتى بتروحي شارع الهرم".

وردت عليه شذي، عبر حسابها الخاص بموقع التواصل الاجتماعي "فيسبوك" وقالت: " بالنسبه للأستاذ عبااااسط حموده انا سكت أول مره و قولت راجل كبير و عيب أرد شارع الهرم اللي بنسبالك مقياس و الموالد اللي واضح إن من كتر م إنت غنيت فيهم مضيقينك فبتحاول تعمل فيها متقبل الموضوع وبتقول وترد على نفسك وأساسا محدش عاب على اللي بيغنوا في موالد ولا شارع الهرم م كل واحد يغني مكان مهو حابب محدش يقدر يقيم حد ولا يحكم على حد".

وأضافت: " انا فعلا محالفنيش الحظ الفظيع اني أغني فيهم اعملك إيه طيب ؟؟ .إنت ليه بتحاول تعمل حوار و موضوع ... للأسف يا سي عبااااسط انا مغنتش في موالد ولا غنيت في شارع الهرم ولا كنت مع اللي راحوا الهرم ولا بتنصل و الواقع ان فيه إختلاف ثقافات و تربيه و اسلوب".

وتابعت: "بالنسبه لإنك فجأه عملت فيها( بيتهوفن الفن ) فأنا غصب عنك فنانه مش عافيه مني و مش رأيي ده رأي الجهات المحترمه المعنيه بالفن المحترم زي دار الاوبرا اللي اتشرفت وكنت صوليست فيها و طبعا مش هتفهم يعني إيه صوليست فهترجمهالك بلغتك يعني بقدم (نمره لوحدي )على أوركسترا بيقودها دكتور سليم سحاب و واحده تانيه كان بيرؤسها الدكتوره رتيبه الحفني الله يرحمها ... فلو سمحت لما تطلع تاكل عيش في البرامج متحكيش في المحكي و تجيب في سيرتي وتبروز نفسك و تعمل فيها فلوطه لإنك نص معلوماتك الفنيه في الحلقه رايحه في داهيه".

وختمت كلامها قائلة: "وطبعا أكيد مش هتفهم ولا حرف من اللي أنا كتباه ده لإن اساسا الاغنيه اللي ضربتلك و إتعرفت بيها كنت أساسا تايهه فيها و طول مده الأغنيه مش عارف نفسك يعني واحد طول الاغنيه بيقول( انا مش عارفني انا تهت مني ) هعتب عليه فإيه والنبي لما يلاقي نفسه بقى نبقى نتفاهم ".