من فن الواو

1
أبدأ بشُكري لإلهي
حمدُه وشكرُه شي رائع
واللي عن الرب لاهي
مذموم ف كل الشَرَائع
2
يا سيِّد الخَلق مَدحك
يبعت ف قلبي المَسَرَّة
الفرح في القلب يضحك
ويعُم كل المَجَرَّة
3
آه لو زماني عَدَل لي
والبدر عاود ظهوره
ل اضحك وأكيد العِدا اللي
قطفوا ف قليبي زهوره
4
عصفور وصوته يا محلاه
رقَْص قليبي بقصيده
خَلَقُه المُعظَّم وحَلاَّه
وصادني يوم رُحت اصيده
5
ع الباب واقف وبابكي
وحيطان سورِك عَواكي
يا غالية ولإمتي بابكي بابك
يقفل في وش الغَوالي
6
زعبَب علي الوِش أمشير
وفَرَش عليه من غُباره
يمكن تكون التباشير
للحِلو شيء من مرارُه
7
يا نهار يا نازِل علي نهار
العقل منِّي ما راسي
وقلوعي عايمة علي أنهار
وعَسَي تصادفِ مَراسي
8
للموج علي الشط رقصات
تفهمها بِيض الصَواري
وصبابا تهمِس بهمسات
يرقُص عمود السواري
9
طَلَّعتي عيني بلا جروح
وعرفتي إيه اللي تِهوَي
وسرقتي قلبي مع الروح
وطلِعتي بيهم في سهوة
10
وندَهْت قالوا: عايز مين؟
راحوا الأصايل وغابوا
راحو وع البُعد عَازمين
بعد الخسايس ما عابوا
11
ياللي جمالِك مع دِين
محبوبة م الرب قَبلِيَ
ولا ليكي أبداً معادِين
في الخَلق بحري وقُبلي
12
طيرُه أتاني يعوم عوم
وف ريشه عَلَّق رسايل
رفرف قليبي وحام حُوم
من فوق جميل الخَصايل