قصائد

سندات ملكية
لو مشيت ف شارعنا طوالي
ح تقابلك مدرسة سمير الابتدائية المشتركة
وقدامها :
عم حلمي بياع الدوم والبشملة
وعم فتحي بتاع الحلاوة العسلية اللي بيعملها قدامك
هناك
ح تلاقي الشارع أحن من أحلامك
تتكعبل ف نفس الحتة اللي دراعك الشمال
انكسر فيها وانت بتلعب كورة شراب متلزقة
بالسلوتكس او لبن الشجر زي ما كنا بنسميه .
كل الحاجات
اللي قلتهالك ف الأول عن :
مدرسة سمير
البياعين
الكورة الشراب
جزء صغير من حلقة مفقودة .

ف حصة الدين
ف مدرسة سمير الابتدائية المشتركة
كات بتتعبني أبلة هنية
بوشها الهادي
وخمارها الأبيض وهي بتحكي عن :
عذاب القبر / السلاسل
وطول أيام عذاب الآخرة عن أيامنا
وبطفولة سنة (5) ابتدائي أبلة :
هو ربنا بيحب يعذبنا , بيرتاح !؟
من يومها ماحضرتش ولا حصة دين .

ف مدرسة سمير الابتدائية المشتركة
كل ما اتسئل عن اسمي
يكون الرد
وفين سي السيد ؟
لغاية ما كنت ف سنة (6) وشفت " بين القصرين "
الفيلم اللي رمي جوايا بذرة تمرد
من أول رفض بخور يوم الجمعة
وغلب أمي وسكاتها
لغاية الكتابة عن رغاوي البيرة .

كنا بنخاف
لما نلاقيه ماشي ف الشارع
بعبع فصل 6/1
أستاذ إبراهيم عبد الرازق
وكنت بستغرب من حنيته وهو بيذاكرلنا
كل الدروس ببلاش
ويخلي العيال الأغنيا
يدفعوا غرامات لما ما يعملوش الواجب
ويجيب لنا بيها كتب خارجية
أستاذ ابراهيم
بطوله المخيف وصوته الجهوري
بيحيي العلم
ويصلي بينا الضهر
ويلعب كورة
مع ولاد الشارع .

سنة 6 ابتدائي
القبول
أول محك لفكرة الشهادات والمجموع
عيطت بحرقة لما جبت 95٪
ولما كبرت عيطت بنفس الحرقة
علي تقديري العالي
وقعدتي ف البيت .
هزيمة
كل ما تلبسني حالة بعينها
ادرب نفسي ع التجاوز
بمعني
اني أتعود عليها حتي ولوكانت مؤلمة
وأتعايش مع فكرة
ان البني آدم شجر
دايماً في خوف من الخريف
بس أنا
صاحبت الخريف وصعبت عليا
حسيت هو قد ايه
وحيد
ب اعد
الهزايم الصغيرة عشان اجتاز
معركة كبيرة في دماغي
وأحاول الاستفادة من أخطائي
ف تظهر لي
دايرة من السلوك الشائكة
اللي بتجرحني باستمرار .
وكل ما دمي يجري علي حتة
تنبت هزيمة
ف الاقيني أرض بتزرع جروح
وتنبت فيها الأيام
ببطء
الألم .. الوجع .. الوخذ
حاجات بتتلكع في مشيها
وساعة ما تصاحب حد
تكرمه في عطاياها اللي مش مبررة
وما فيهاش عدل
وبتكره الفراق حتي مع
تنظيم النفس
والعد من 1 ل 1000 .
ابتسامة الفار
عارف
حتة إنك تهرب من فكرة بتلح عليك
تخليك منفعل بشكل مش فاهمه
وكل ما تحاول تبرره تبان إزاز
فتسخر من نفسك أحيانا
وتتراجع كتير
ابتسم لك
وأنا عاملة فيك زي القط اللي زانق فار
وقاعد يبص في عنيه ويركز عشان ينهار
فسرح القط
وافتكر كام مرة انضحك عليه
وقد إيه كان مغفل وهو بيبكي بمنتهي الصدق والحرقة من أفلام عبد الحليم
وافتكرت حالاً
كام مرة اتوجعت وأنا ببعدك عن دماغي ساعة الكتابة
واعتبر إن التجارب الحقيقية أكبر من فكرة الكتابة .
ولما أفوق ع الفار
الاقيه لمح الدموع في عيني واستغلها كويس
عشان يصعب عليَ

هرب من غير ما أصعب عليه .
مخرج مناسب
باهيأ
نفسي لمرحلة جديدة من النضج
أحب فيها سني ، ملامحي
وأقلل من استبداد طباعي .
ده له علاقة بوجودك
لتكملة محاولاتي في فهم العالم اللي انت آخر خيط بيربطني بيه
لفهم تعقيد بساطتك
ولربط الأسماء بالصفات المتماسه معاك .
باهيأ لك
جزء من الذكري والتواريخ
مساحة من الأحاديث
سيبهالك بمنتهي الرضي
والترقب .
الوضع الحالي في نمط العلاقات
في طرح المقبول ولا مقبول
مرن
بيسمح بتقبل الأشياء علي علتها
من غير حتي ما يدور علي مبرر
يحفظ ماء الوجه
أو
يوجد مخرج مناسب للتناقض مع النفس
أصبح كل شيء
له مبرر بكلمة
عادي
لص محترف
مش غريب
ان كل الناس تقرأ ف عنيك الهزيمة
ويحزنوا
من غير ما يقولولك
بس الغريب
انت نفسك مش حاسس بيها
ولا معتبرها حصلت بالفعل
أنا متأكدة
انك بتدرب كويس وبانتظام
علي حماية روحك من الوجع
حتي لو اضطريت تلونها
أو تخلي طباعك زي مية الدهب
وعارفة حبك لثمرة جوز الهند
وعلاقتها بصلابة وشك
لكن ساعة ما نتقابل في المرايه
مش ح يفضل لك منها غير المية
اللي بكيتها عليك بجد .
وسط البلد ..
زحمة الكورنيش في أغسطس
مجانية المشاعر ، واعتياد اللقاءات الحميمية
كلها حاجات
بتقل روحي
بتخليني ما اقدرش امشي ع المية
ولا أطوي الارض
وعلي ما استعيد قدراتي من جديد
تكون علمت في الايام
بحاجات اكتر من قهر أغسطس
ومية جوز الهند .
قصص الحب
شبه شهر فبراير
طول أو قصر
برضه مش كامل .
وما تقدرش ترصد الأزمة ايه ؟
قوة شخصية وسخاء روح ،
ولا انك مغفل سرقك حرامي محترف ؟
أو انك
تتغاضي عن سرقة الناس لدمك
علي اعتبار انه بيتجدد
انك بتتفرج
وبتعمل منهم كراكترات تستفيد بيها
ف الكتابة
وتبقي انت
حقيقي حرامي محترف .