م الآخر| ذكريات.. بس تقدر تعمل أحلى منها

- اسمع مزيكا حلوة
- كلم ناس بتحبها من غير سبب، وقولهم وحشتوني أووي
- كلم حد إنت عارف إن مفيش ناس كتيير بتسأل عليه، وقوله أخبارك إيه؟
- ابتسم ف وش أي حد ف الشارع حتى لو الناس قالو عليك أهبل
- فسح نفسك في أبسط حتة في مصر، واشرب عصير قصب في كيس زي زمان، واقعد في مطعم لوحدك واطلب سندوتشين فول وطعمية
- جيب مجلة ميكي واقعد زي زمان على السرير وإقراها
- انزل اتمشى بليل ف عز السقة، وحس الهوا لما يطس في وشك
- جيب مصاصة ليك ول أخوك واطلع البيت وافتحوها مع بعض زي زمان
- لف شوية وروح عند بتاع الآيس كريم واقوله بسكوتة مانجة لو سمحت
- روح اتفرج على المراجيح اللي كنت بتركابها زمان
- صلي ف أول جامع صليت فيه وإنت صغير، وافتكر لما مكنتش حافظ حاجة وكنت بتعمل زي ما بيعملوا وخلاص
- افتكر نفسك في أول يوم حضانة لما كنت بتعيط طول اليوم أكنك ف ميتم
- شكلك بلبس المدرسة زمان وإنتِ مامتك عملالك ضفاير والشراب الأبيض
- وأكتر مدرس كنت بتحبه وأكتر مادة كنت بتحبها
- افتكر لعبة لعبتها زمان ونفسك تلعبها
- ورحلة دريم بارك اللي طلعتها مع أصحابك في المدرسة، وافتكر كنت مبسوط إزاي
- افتكر رحلة تانية طلعت فشنك وكنتوا مبسوطين بردوة
- افتكر لعبك في الجناين ولما كنت بتقعد تحفر في الرملة، فاكر إنك هتعمل حمام سباحة وشوية وهتجيب العوامة عشان متغرقش
- ولما كنت بتروح البحر وإنت مبتعرفش تعوم، وإنت مغمض عينيك عشان متحرقكش
- افتكر لعبك في الرملة مع أخوك الصغير
- افتكر أيام ما كان حد بيمد إيده على إخواتك وإنت صغير كنت بتعمل فيه إيه!
- مامتك وهي عملالك سندوتشات المدرسة فترميها، لأحسن لو روحت بيها عارف إنك هتضرب
- افتكر قسمة كيس الشبسي مع صحابك، ولما كنتوا بتروحوا تاكلوا بجنية سندوتش فول وعصير قصب
- افتكر ايام الوكمان وشرايط هشام عباس ومحمد فؤاد
- افتكر مشاكل زمان اللي كانت على دي بتبصلي إزاي، ودي مرضيتش تلعب معايا في المراجيح
- افتكر أول مرة روحت فيها السيما وبعدها كلتو في كنتاكي، بالنسبالك كانت حاجة مش طبيبعة بغض النظر إن أكيد بعدها رجعتوا على المراجيح
- افتكر لما كنت بتعيط على حاجات هبلة زيك بس كان عادي
وما بين كل ده وده افتكر إصرارك علشان تعمل أي حاجة.. يمكن تكون كل دي ذكريات بس إنت تقدر تعمل ذكريات أحلى منها كمان.